Isaías 2:8 - Biblia Enxet

⁸ ¡Sawheykekxók eyke nahan aqsok kéleykmássesso m'a apchókxa! Apkelpeykessamók énxet'ák ma'a aqsok apcháyókxa apkelánéyák apagko' nak, eñama nak apmék apkelánéyák.

Isaías 2:8 Σταυροειδείς Αναφορές

1 Reyes 16:7

Apxeyenmeyk axta Wesse' egegkok yaqweykenxa kólteméssesek ma'a Baasá, tén han apnámakkok, apchásenneykekxo axta m'a aplegasso appeywa Jehú, Hananí axta apketche, hakte asagkek axta ektémakxa aqsok apkelane nápaqto'. Aplókassegkek axta Wesse' egegkok ma'a Baasá, hakte hawók axta ektémakxa aqsok apkelane m'a Jeroboam, tén han apnámakkok, cham'a apmassésseykmo axta.

2 Reyes 17:10

Apkeláncháseykegkek axta han meteymog apkeláyókxa, tén han kéleykmássesso Aserá, cham'a ekyókxoho egkexe, tén han ma'a kóneg nak yámet élyentaxno nak pessesse agkok,

2 Reyes 17:16

Apyamasmeyk axta ekyókxoho m'a apkeltémókxa axta etnahagkok ma'a Dios Wesse' apagkok, apkeláneykegkek axta han ánet weyke étkók kelennay'awo sawo ekyexwase égmenek kélpeykáseykekxa, apkeleykmassáseykha axta han Aserá. Apkelpeykessamók axta han chá'a m'a yaw'a aphéyak nak néten keñe han ma'a Baal.

2 Crónicas 27:2

Leklamók axta apwáxok Wesse' egegkok ektémakxa aqsok apkelane m'a Jotam, ektémakxa axta aqsok apkelane m'a Ozías, apyáp axta. Axta eyke etaxnók ma'a Wesse' egegkok tegma appagkanamap apagkok. Yágweykmók axta aqsa apkeláneyak apkeltémakxa élmasagcha'a m'a énxet'ák.

Isaías 17:8

Kamaskok sa' elenmexekxohok ekheykegkaxa m'a meteymog apkelwatnamakxa nak chá'a aqsok tén han ma'a mók aqsok apkelane apagko' nak chá'a m'a énxet. Melanók sa' chá'a kaxwók ma'a yámet awhók élpagkanamaxche apkelpeykessamo nak chá'a, tén han ma'a meteymog kélwatnéssamakxa nak chá'a aqsok ekmátsa nak ekpaqneyam éten agkok ma'a aqsok kéláyókxa.

Isaías 26:13

Wesse', Dios egagkok, nentemegkek negko'o kelwesse'e egagkok ma'a pók kelwesse'e nak, negya'ásegko' eyke exchep apteme wánxa Wesse' egegkok.

Isaías 37:19

tén han apkexakkassama nátex ma'a aqsok apcháyókxa nak, hakte naqsók háwe dios ma'a, énxet apkelane, eñama nak ma'a yámet tén han meteymog. Cháxa keñamak apmassésseykmo nak.

Isaías 40:19

Elának chá'a xama aqsok kéleykmássesso m'a énxet apkeleykmassáseykencha'awo nak chá'a ektémakxa xama aqsok, keñe m'a apkelane nak chá'a aqsok étkók éltaqmalma, elyepetchesek chá'a émpehek ma'a sawo ekyátekto ekmomnáwa, elanaksek nahan chá'a eknatanma m'a sawo ekmope ekmomnáwa nak.

Isaías 41:29

¡Mékcha'awo agko' ekyókxoho m'a! Méko xama aqsok kalanagkok; kéleykmássesso aqsa, meyke nak ekyennaqte.

Isaías 57:5

kélláneykegkek chá'a kéltémakxa ekmaso megkólmasexta'a m'a kóneg nak yenta'a robles tén han ma'a ekyókxoho yenta'a élyawe élyentaxno nak pessesse agkok, kélnapmeyk nahan chá'a sakcha'a kélméssama aqsok kéleykmássesso m'a nekhaw'ék yegmen ényé nak, élpatyapeykegkaxa nak ma'a meteymog.

Jeremías 1:16

Keso apkellegeykegkoho peya nak ko'o allegássesagkohok ma'a énxet'ák melya'assáxma, seyamasma nak ko'o; apkelwatnéssama nak chá'a aqsok ekmátsa nak ekpaqneyam éten agkok ma'a aqsok kéláyókxa éleñama nak mók nekha', apkeláneyak apagko' nak chá'a tén han apkelpeykessamo.

Jeremías 11:13

Xámok agko' aqsok apkeláyókxa m'a énxet'ák Judá, hawók ma'a tegma apkelyawe apagkok nak, keñe m'a énxet'ák apheykha nak Jerusalén, apxámassamók apagko' apkelánéyak ma'a apkelwatnamakxa aqsok yaqwayam elmések chá'a aqsok ánek ekmátsa nak ekpaqneyam éten agkok ma'a Baal, hawók ma'a ektémakxa nak ekxámokma ámay ma'a tegma apwányam.

Jeremías 2:28

Énxet'ák Judá, ¿háxko ekheykegkaxa m'a aqsok kéláyókxa kélláneyak axta? ¡Xámok agko' kéxegke aqsok kéláyókxa, hawók ma'a tegma apkelyawe kélagkok nak! ¡Tásek sa' kalxegmak ma'a, awanchek sa' kexaha kalwagkasek teyp eyáhapwa'a sa' ekmaso kélheykha!

Oseas 12:11

Heykegkek aqsok kéláyókxa éleñama mók nekha m'a Galaad, aqsok kéláyókxa élmowancha'a amya'a eyke. Kélnapmeyk chá'a weyke kelennay'awók ma'a Guilgal; máxa meteymog ektaháneykekxal'a mók temék apkelwatnamakxa nak chá'a aqsok, neyseksa m'a kélpeyncheyam nak xapop namyep.”

Oseas 13:2

¡Makhemek eyke makham apkeláneyak melya'assáxma! Elpeykásekxak chá'a m'a sawo élmope élmomnáwa, elanagkok chá'a m'a aqsok kéleykmássesso, ekxéna enxoho chá'a apkelwáxok, apmako enxoho chá'a elának ma'a apmopwána nak apkeleykmassáseykha. Keñe etnehek chá'a apkelpeywa s'e: “¡Kólnáhakkas aqsok kélnaqtósso!”, keñe chá'a énxet'ák elpetsesek ma'a weyke étkók kéleykmássesso nak.

Oseas 14:3

Mopwanchek negko'o hẽlwagkasek teyp ma'a Asiria, mogwanchek nahan ólxeganmok ólchántek yátnáxeg. Kamaskok sa' kaxwók óltéhek negko'o ‘Dios egagkok’ ma'a aqsok nenlánéyak egagko' nak, hakte xép apwánxa apagkok kóteyágwók ekmayósa kóllanok ma'a élyeheykha nak, xép Wesse'.”

Oseas 8:6

israelitas? ¡Háwe Dios ma'a weyke étkok kennawók eñama nak Samaria! Apmopwána apkeleykmassáseykha apkelane xa, nekha'a étkók sa' kóltemessásekxa'.

Miqueas 5:12

asawhaksohok sa' amasséssessók ma'a énxet'ák apagkok ekha nak apkelmopwancha'a, meyke apkeltennasso yaqwánxa katnehek egmonye' sa' atnéssesek;

Deuteronomio 4:28

Sa' kólpeykeshok chá'a aqsok kéláyókxa énxet nak chá'a apkelane m'a, cham'a kéleykmássesso élánamáxche nak yántéseksek tén han ma'a meteymog, megkate nak exma, tén han megkañe nak ektemegweykmohóxma, tén han megkato nak ekto, tén han ma'a meyke nak énnama.