Esdras 10:14 - Biblia Enxet

¹⁴ Tásek eyke ko'óneyk elhekxak apkelámha apmonye'e egagkok nak negko'o s'e, yaqwayam enxoho henlánekxések negko'o amya'a, keñe sa' apyókxoho apheykha nak tegma apkelyawe egagkok, tén han apkelméyak nak kelán'ák megkatnaha nak apkelpeywomo xamo', elmeyenták ekhem ekxénáxchexa enxoho, yetlo apkelxegexma'a m'a apkelámha apmonye'e nak chá'a tegma apwányam apagkok, tén han ma'a énxet'ák segyekpelchémo, ekwokmoho ekmassa sẽltaqnawéyak negko'o m'a Dios egagkok, eñama nenlane xa.

Esdras 10:14 Σταυροειδείς Αναφορές

2 Reyes 23:26

Axta eyke kamassegweykmok aplo Wesse' egegkok, apkeltaqnaweykegkek axta makham ma'a énxet'ák Judá, eñama m'a ekyókxoho aqsok élmasagcha'a apkelane m'a Manasés, eklókassama axta m'a Wesse' egegkok.

2 Crónicas 28:11

Kóleyxho sa' sekpeywa, kóltaqheksoho sa' makham ma'a kélmá axta, kélnámakkok kéxegke m'a, apkeltaqnaweygko apagko' kéxegke m'a Wesse' egegkok.

2 Crónicas 29:10

Xénchek ko'o kaxwók ewáxok axnéshok mók sélpaqhetchásamáxkoho Wesse' egegkok, Dios apagkok nak Israel, yaqwayam kamaskok sẽltaqnawéyak negko'o.

2 Crónicas 30:8

Nágkólteme élyennaqte kélwáxok, aptamheykegko axta m'a kélyapmeyk nano'; kólya'assásekxa kélmék Wesse' egegkok, yaqwayam enxoho kóllánekxak ekhémo mók kélpaqhetchásamáxkoho, kólmeyenta m'a tegma appagkanamap apagkok nak, apteméssessama axta appagkanamap meyke néxa. Kóllána apkeltémo nak chá'a kóllának ma'a Dios Wesse' kélagkok, keñe sa' kamaskok eltaqnaweygkok kéxegke.

Esdras 10:13

Nenxámok eyke negko'o, megkamassak han ekmámeye, mogwanchek negko'o aghakha aqsa s'e meykexa nak negyexanmomakxa, háwe han yaqwatakxoho s'e nenlana nak, hakte nenxámok negko'o nenlánéyak nak se'e mólya'assáxma nak.

Esdras 10:15

Apyókxoho axta leyawok apkelwáxok ektáha axta apkelweykekxa makham kélnaqleykekxa axta megkatnahakxa apkelókxa etnahagkok xa ektáha nak, keñe axta Jonatán memako etnehek xa ektáha nak, Asael axta apketche, tén han ma'a Jahazías, Ticvá axta apketche, apkelweyhenákxók axta han ma'a Mesulam, tén han Sabtai, apteme axta levita. Keñe axta apkelmaxnéssesso Dios énxet'ák apagkok Esdras apkelyésencha'a yaqwayam etnehek apkelxegexma'a nápakha énxet, apteme axta chá'a apkelámha apmonye'e apagkok ma'a apnámakkok apagko' nak, apchaqnákxeyk axta han émha amonye' ekhem ma'a aptáhakxa axta diez pelten, cham'a apyókxoho apkelyésamap axta, yaqwayam enxoho elxének yaqwánxa etnéssesek ma'a aqsok élánamáxche nak.

Salmos 78:38

Apyósekak axta eyke apkelányo m'a Dios, meyaqmagkásekxeyk axta chá'a apkeltémakxa ekmaso, axta han emassésseykmok; megyohók axta chá'a katxek apwáxok aplo.

Isaías 12:1

Sa' kóltéhek kólpaqmétek kéxegke xa ekhem nak: “Wesse', ekméssek xép ekpayheykekxa ewáxok, hakte etaqnagkamchek axta eykhe ko'o exchep, massék eyke m'a aplo, egkeyásékxeyk makham meyke ektáhakxa ewáxok.

Números 25:4

Aptáhak axta apcháneya Moisés se'e: —Yánchásekxa sa' apyókxoho apkelámha apmonye'e nak énxet'ák, elnáhap sa' nahaqtók ko'o ekhakxoho ekhem. Keñe sa' kamaskok séltaqnagko ko'o m'a énxet'ák Israel.

Deuteronomio 13:17

“Nágkólmekxa aqsa kéxegke xama enxoho m'a aqsok élxénamaxche nak kólmasséssók, keñe sa' meltaqnaweygkehek chá'a kéxegke m'a Wesse' kélagkok; kélyósekak sa' chá'a elano', exámásekxak sa' nahan, ekhawo m'a apkeltennassama axta etnéssesek ma'a kélyapmeyk nanók axta kéxegke,

Deuteronomio 17:9

kólyo'ókxés sa' chá'a m'a levitas aptamhéyak nak apkelmaxnéssesso Dios énxet'ák apagkok tén han ma'a énxet'ák segyekpelchémo apkeltamheykha nak chá'a xa ekhem nak yaqwayam sa' exekmósek chá'a m'a aqsok apkelánéyak. Sa' exének chá'a ekpayhókxa kólteméssesek ma'a,

Josué 7:26

Keñe han kéláhakkáseykxo ekxámokma agko' ma'a meteymog, makhemek makham émha xa meteymog nak. Cháxa keñamak ektéma nak makham ekwesey yókxexma ekyapwate Acor ma'a. Tén axta ekmassa apkeltaqnawéyak Wesse' egegkok ma'a énxet'ák Israel.