Nugana 31:42 - Buki Tabu Lowaenei 1919

⁴² ‘Abo tamagu ‘ina Eaubada, Aberaamo ‘ina Eaubada, ta Isaako ‘ina ‘Ebematauta, nigea ma‘ieagu, ‘ai‘aila ‘u da etunegu manimenimegumo. Eaubada ‘igu elo‘uia i ‘itena ta nimagu ‘idi guinua, ta guruwana ‘i ba‘emu.

Nugana 31:42 Σταυροειδείς Αναφορές

Nugana 11:5

Ta Ieoba ‘i mwa‘uta sabi ‘ita ‘asa nina ta anua kesorana nina, taudi tomota natunao si ‘abina.

Nugana 16:11

Ta Ieoba ‘ina anelose ‘ena ‘i gwae, U ‘ita, u ‘euwana, ta me‘olotona ‘u da enatunena: ta ‘u da eesena Isimaela, ‘imu elo‘uia Ieoba ‘i nonona ni‘atu ta ‘enega.

Nugana 16:13

Ta Ieoba tauna ‘i eonena ‘ana esana i ‘inanena, ‘Oio Eaubada to‘ita: ‘i gwae ta ‘enega, Ni‘atu tauna i ‘itegu gete tuga nai ia dune murigwaiabu?

Nugana 27:33

Ta Isaako ‘i dededera sinabwana, ta ‘i gwae, Ga iaita tauna esio ni‘atu i ‘ewa, ta ‘eguia ‘i me‘ena, ta iauna ‘enega ia ‘e‘a nugana ta muriega ‘u mai, ta ni‘atu ia onaobobomena? tamo, ta onaoboboma ‘i da loba.

Nugana 29:32

Ta Lea i ‘euwana, ta natuna me‘olotona ‘i enatunena, ta ‘i eesena, Rubena: ‘i ona ta ‘enega, Ieoba ‘igu elo‘uia i ‘itena ta ‘enega; gete tuga mwanegu ‘i da obobomegu ta ‘enega.

Nugana 31:12

Ta ‘i gwae, Gete tuga ‘u da ‘ita tu‘e, ta u ‘ita, gota me‘olotodi iauiaudi iau ‘edia si mwera ma‘adi Saba, iomwaiomwaridi, guaiaguaiadi: iage iauiauna Labana ‘i guinua ‘emuia ni‘atu ia ‘itena ta ‘enega.

Nugana 31:24

Ta Eaubada Labana goma Siria ‘ena ‘i mai boiboi ‘ana madawarega, ta ‘i eonena, ‘U da ‘ita‘i‘isio ‘oio ta gea‘abo Iakobo ‘ena ‘u onaona nai bobo‘ana nai to‘umalina.

Nugana 31:29

Nimagu ‘ina waiwaiega ia da gieto‘umaliemi: ta tamami ‘ina Eaubada guruwana ‘i eonegu, ‘i gwae, ‘U da ‘ita‘i‘isio ‘oio be gea‘abo Iakobo ‘ena ‘u onaona nai bobo‘ana nai to‘umalina.

Nugana 31:5

ta ‘i eonedi, Tamami maninina ia ‘itena, nigea ‘eguia nadigega tuta lowa; ta tamagu ‘ina Eaubada ma‘ieagu ‘a miami.

Nugana 31:53

Aberaamo ‘ina Eaubada, Naora ‘ina Eaubada, tubudi ‘idi Eaubada, ‘i da loina mwatuidaia. Ta Iakobo ‘i ona‘upa‘upa tamana Isaako ‘ina ‘Ebematauta ‘enega.

Nugana 32:9

Ta Iakobo ‘i gwae, Ie tubugu Aberaamo ‘ina Eaubada, ta tamagu Isaako ‘ina Eaubada, Ieoba ie, tauio ‘u eonegu, ‘Imu ‘asa ‘ena ‘u da ‘ila, ta ‘imu bu‘unao ‘edia, ta ia da giebobo‘aneio:

Nugana 35:3

be ta da tooro, ta Betela ‘ena ta da tu‘e; ta ‘ena ‘ebetaria ia da ‘abi Eaubada ‘enaia, tauna ‘eguia ‘i onalimanama ‘igu dedoi ‘ina ‘asiata ‘enega, ta ‘edega ia tautauia tauna ma‘ieagu.

Nugana 46:1

Ta Iseraela ‘i logara ma‘ina iage iauiauna, ta Beeriseba ‘ena ‘i mai, ta ‘i taria tamana Isaako ‘ina Eaubada ‘enaia.

Salamo 31:7

Ia da guausoara ta ia da uiawana ‘imu nua‘ole‘ole ‘enaia: ‘Igu dedoi ni‘atu u ‘itena ta ‘enega; Iaruiaruagu ‘ina ‘ebededoi ‘u mwaratonidi:

Si Apwesa 3:7

Ta Ieoba ‘i ona, ‘Igu tomota Aigupito ‘ena ‘idi elo‘uia ni‘atu ia ‘ita ‘ai‘ailina, ta ‘idi bwau ‘idi to‐loina‐guinua manudi ni‘atu ia nonona; ‘idi ‘ate‘uia‘uia ia mwaramwaratoni ta ‘enega;

Isaia 8:13

Bodao ‘idi Ieoba, tauna wa da etabuna: ta tauna ‘i da ‘imi matauta, ta tauna ‘i da ‘imi ‘ebe‘atesa‘ara.