Yoni 5:19 - Loina Tabu Auwauna NT

¹⁹ 'Enega Yesu tomota nidi 'ieonedi, 'igwae, “Yaona 'ai'aila 'emiya, 'abo'agu nigeya sawesaweguya be taugumo yada guinuwa, ta esi 'igu guinuwa getei to'ase nadigega ya'itena Tamagu 'iguiguinuwe; 'enega yage nidi Tamagu 'iguiguinuwedi 'abo'agu wate nadigega yaguiguinuwa'esa.

Yoni 5:19 Σταυροειδείς Αναφορές

Madiu 26:39

Ta Yesu 'ialaga tupwana ga bale'uya 'ibe'u sanamwa'uta ta 'isidasida, 'igwae, “Tamagu ye, 'eguma kapekapeyana 'elouya keigana gete 'eguyega 'u'ewayaulei, ta geya'abo 'abo'agu 'igu nuwena 'enega, ta 'oyo esi 'imu nuwena 'enega 'uda guinuwa.”

Luke 21:15

manuna 'abo'agu 'etamo ona palupaludi ta mwalatoi ya'ebwa'emi, be 'enega 'ami talauwalao geya'abo si'awa'awa kabokaboemi.

Yoni 10:18

Nigeya 'ebweu yaita 'iloiloinegu be yamwamwawasa. Taugu tuga yatagwalegu be yamwamwawasa, ta sawesaweguya be yawasigu ya'ewa limai. Manuna gete nadigega Tamagu 'ina nuwena, ta wate 'ina loina 'eguya.”

Yoni 12:49

Manuna ona nidi nigeya 'igu nuwenuwega, ta esi 'agu toetune nina to'ase nadigega 'iemataluweguya yasimanedi 'emiya.

Yoni 12:50

Ta 'ina emataluwa yamwalatonina yawasi ataya 'ena 'imiyami. 'Enega to'ase nadigega Tamagu 'ina emataluwa 'eguya gete nadigega yasimasimanediwa.”

Yoni 14:10

Nai nigeya 'uemiemisegu 'aene 'abo'agu Tamagu 'ena yamiyami, ta wate Tamagu tauna 'eguya 'imiyami, aga?” Ta Yesu wate 'ediya 'igwae, “Ona nidi ni'atu yaonaedi 'emiya nigeya 'abo'agu 'igu ona ta Tamagu esi 'enega, manuna tauna 'eguya 'imiyami, ta wate 'eguyega 'ina guinuwa 'iguiguinuwedi.

Yoni 2:19

Ta Yesu 'ediya 'igwae, “Anuwa gete 'eguma waligei, 'asiyata 'etoi 'ena yada 'abilima.”

Yoni 3:3

Ta Yesu 'ilolagata ga 'ieonena, “Yaona 'ai'aila 'emuya, 'eguma nigeya 'utubutubuwa limana, geya'abo Yaubada 'ina 'ebeloina 'u'ita'ita.”

Yoni 5:21

Nadigega tuga Tamagu tomwawasa 'igietoolodi ga yawasidi 'i'ebwa'edi, 'abo'agu wate nadigega yawasi auwauna yada 'ebwaya tomota 'ediya, yaisigedi taudi yaesinuwedi.

Yoni 6:38

Manuna 'abo'agu galewega yamai nigeya 'igu nuwena taugu sabi guinuwena, ta esi tauna 'ietuneguma 'ina nuwena.

Yoni 8:28

'Enega Yesu 'ieonedi, 'igwae, “'Abo'agu Tomota Natuna, ta ma'etamo wada gitu'eyegu, be 'enega nate 'ena wada mwalatonigu yaita 'abo'agu, be 'enega wada mwalatoni 'aene taugu nigeya 'igu nuwena 'enega yada guinuwa, ta esi to'ase nadigega Tamagu 'ie'itegu 'ediyega yaonaona.

Yoni 9:4

Tauna 'ietuneguma 'ina guinuwa tada guinuwedi tuta 'asiyata 'ena, manuna 'eguma boiboi 'imamai nigeya 'ebweu yaita sawesawenaya be 'ida paisewa.

Guinuwa 2:24

Ta Yaubada mwawasa 'ina sena mwauna 'enega 'i'etoseyena, ga 'igietoolo limena, manuna nigeya sawesawenaya mwawasa 'ina senaya 'imiyaataya.

Loma 6:4

manuna 'ina bapitaiso 'enega, 'atuwa nadigega 'abo'ada be Yesu Keliso 'ida mwawasa, be 'ida sa'u'ali'ali, ta 'ida toololimana wate nadigega leleleya. Manuna Keliso nina Tamana 'ina waiwaiyega 'itoolo limana, 'abo'ada nadigega 'igietoolo limeda ga yawasida auwauna talobena.

Loma 8:11

Ta Yaubada Yaluyaluwanana 'enega Yesu mwawasega 'igietoolo limena, 'abo 'emiya 'imiyami, Yaubada 'iabe wate Yaluyaluwana nina 'enega oomi mwawamwawasidi 'ediya yawasi auwauna 'ida 'ebwa'emi.

1 Kolinita 15:12

'Ima loguguya 'emiya 'asimanena 'aene Keliso mwawasega 'itoolo limana, ga waemisena. Ta to'ase manuna ga 'aimi waona 'aene tomota nigeya sawesawediya be mwawasega sitoolo limana?

2 Kolinita 4:14

ta Yaubada 'amwalatonina 'aene 'ida 'Inapwana Yesu mwawasega 'igietoolo limena, be 'abo'ama wate Yesu ma'emai 'ida gietoolo limema, be 'omi wate ma'emao 'ida 'au'ewada tauna matanaya.

2 Kolinita 5:10

Manuna ma'etamo 'abo tuta nina Keliso 'ina 'ebemi esaesa 'ena 'imiyatowa sabi loineda, maibo'ada 'ada e'isa 'enega tada loba, nai bobo'ana nai to'umalina, nadigega 'ida guinuwao bada bale'uya.

Epeso 3:16

ta yasidasida 'enaya be 'aene 'ina esaesa be 'ina waiwai 'ediyega 'itatagwala 'emiya, be Yaluyaluwana 'atemi 'ida giewaiwaiyedi,

Pilipai 3:21

Be tuta nina 'iilama ooda 'ida sa'ugelasedi; batuwa nenetadi, ta 'ida sa'ugelasedi 'atuwa tauna oona waiwaina ta 'esasena nadigega, ta 'ina guinuwa gete tauna 'ina waiwaiyega, manuna tauna sawesawenaya be yage maibo'adi 'ediya 'ietoloina.

Pilipai 4:13

sawesaweguya miya maibo'adi 'ediya yada gwausowala tuga, manuna tauna ma'iyagu 'amiyami ni'atu 'igiewaiwaiyegu.

Kolose 1:11

Ta wate tauna 'ina waiwai sinabwana 'enega 'ida giewaiwaiyemi, be 'imi guinuwa yauyaudi 'ediya wae'alama'i'ita, be wada toolopa'ala, be wate ma imi gwausowala

Kolose 1:16

manuna tauna yage maibo'adi galewaya be bale'uya 'aledi, yage nidi ta'ita'itadi, be yage nidi nigeya tada 'itedi, nai taudi aniloseyao nai toloinao waiwaidi nai yaluyaluwao, maibo'adi Yaubada 'imweluluidi Natuna 'ina guinuwega, ta Natunana manuna.

1 Tesalonaika 4:14

Ta 'abo'ada Yesu taemisena 'aene mwawasega 'itoolo limana, ga nadigega wate taemisa 'aene gosedao nidi ni'atu sikwaiya Yaubada 'ida ila limanedima, Yesu ma'enao.

1 Pita 3:18

Ona'ai'aila, Keliso ma'ebweuna 'imwawasa 'ida to'umalinao manudi, ta tauna tai bobo'ana, ta 'abo'ada toto'umalida ga manuda 'imwawasa, be gote 'enega 'ida 'au'ewada Yaubada 'ena. Ta Keliso oona namo siloemwawasina, ta yaluyaluwana nigeya.

E'ita'ita 2:23

Ta wate natunao yada loemwawasidi, be 'enega ekalesiyao maibo'adi sida mwalatonigu 'aene 'abo'agu tomota yauyaudi 'idi nuwanuwa 'atediya maibo'ana yamwalamwalatoni, ta wate maibo'ami 'emiya yada e'isa to'ase nadigega 'imi guinuwao, nai bobo'adi, nai to'umalina.