Yoni 17:24 - Loina Tabu Auwauna NT

²⁴ “Tamagu ye, taudi ni'atu 'u'ebwayaedi 'eguya nuwanuwagu be ma'egwao 'ada miyami. Ta gote 'ena 'igu esaesa nina 'u'ebwa'eguya sida 'ita, manuna muliyega be bale'u 'ana mweluluwa ta 'oyo 'ugimi obobomegu.

Yoni 17:24 Σταυροειδείς Αναφορές

Madiu 25:21

“Ta 'inapwana nina 'igwae, ‘Bobo'ana, 'oyo togwaunuwa 'ai'aila ta palupaluna. Ni'atu 'uetapewa yage gidalidi 'ediyega, 'enega 'amu loina yage sinabwadi manudi ya'ebwa'eyo, be wate 'igu 'ebe gwausowala gete 'ena 'uda miyami.’

Madiu 25:23

“'Enega 'inapwana nina 'igwae, ‘Bobo'ana, 'oyo togwaunuwa 'ai'aila ta palupaluna. Ni'atu 'uetapewa yage gidalidi 'ediyega, 'enega 'amu loina yage sinabwadi manudi ya'ebwa'eyo be 'oyo wate 'igu 'ebe gwausowala gete 'ena 'uda miyami.’

Madiu 25:34

be 'enega toloina 'abo'agu taudi 'ataiguya yada eonadi be yada gwae, ‘'Omi Tamagu 'ina obobomega wada gwausowala, wamai be 'imi 'ebeloina nina bale'u 'ana mweluluwa'unu 'enega 'igibubunaya manumi wada 'ewa.

Madiu 26:29

Ta yaeonami tuta gete be mulinaya oine gete geya'abo 'enega yanumanuma limana ga 'ana laba 'omi ma'egwao oine auwauna tanunuma Tamagu 'ina senaya.”

Luke 12:37

Ta 'abo matadi pa'alina be sigibugibubudi ta siyamwayamwa be 'ilobadi, 'iabe sida gwausowala sinabwana. Ona'ai'aila 'idi 'inapwana nina 'iabe 'ina 'ali'eiyao nidi 'adi 'oama 'i'ote, ta 'ali'eiyao nidi simiyatowa ta tauna manudi 'ida etopaisewa.

Luke 23:43

Ta Yesu 'igwae, “Yaona 'ai'aila 'emuya, 'oyo ta 'abo'agu 'iabe sena bobo'ana 'ena tada miyami.”

Yoni 1:14

Ona nina ni'atu 'edaya 'ietomotai, ga 'ina esaesa 'ena 'a'itena, tosinabwa sana 'ituyayalina, manuna tauna Yaubada natu'ai'ailina, ta wate tauna tooboboma ta adelina palupaluna maibo'ana.

Yoni 12:26

“'Enega 'abo yaita nuwanuwana be 'eguya 'ida etoguinuwa, nugana 'ida muliyegu, be 'enega to sena 'enaya yamiyami tauna ma'iyagu, ta wate 'abo yaita manugu 'ida etoguinuwa, Tamagu 'ida 'awa bobo'ane.”

Yoni 14:3

Ta 'abo yatatauya sena nina 'ena be 'imi sena yagibubu, ma'etamo yada ilama be yada 'au'ewami be sena nina 'ena yamiyami 'omi wate 'ena wamiyami.

Yoni 15:9

“Ta nadigega tuga Tamagu 'iobobomegu, 'abo'agu wate yaobobomemi, be 'igu oboboma nina 'ena wada miyami.

Yoni 17:2

Manuna 'oyo loina 'u'ebwa'egu tomota maibo'adi manudi, be 'enega 'abo'agu yawasi ataya yada 'ebwaya taudi maibo'adi 'u'ebwa'eguya 'ediya.

Yoni 17:22

“Lowa 'imu esaesa maemaedanina 'u'ebwa'eguya ni'atu tomotai nidi ya'ebwa'edi, be 'enega sida e'ebweu, nadigega tuga 'abo'ada tae'ebweuna.

Yoni 17:5

Tamagu ye, gete tuga matamuya 'agu esana 'uda gitu'eye, nadigega tuga lowa 'oyo be 'abo'agu 'ida esaesa nina 'ena tamiyami, ga muliyega bale'u tamweluluina.

Yoni 6:37

Tomota nidi taudi Tamagu 'i'ebwa'egu ma'etamo 'eguya simama be geya'abo sa'i yae'idi'idiyedi.

Yoni 6:39

'Agu toetune nina 'igu tomota 'i'ebwa'eguya, ta gete 'ina nuwena be 'aene geya'abo yaita 'ebweu 'ediyega 'iloseloseyei, ta esi tuta 'ana 'ebe losalowa 'enaya mwawasega yada gietoolodi.

Yoni 8:58

Ga gote 'inapwanao nidi 'ieonedi, 'igwae, “Yaona 'ai'aila 'emiya, 'aene muliyega be Ebelaamo 'itutubuwa ta 'abo'agu tuga yamiyami.”

1 Kolinita 13:12

Gete tugai 'ida mwalatoi nigeya sinabwana, 'atuwa ma'ama'ayau nadigega, nai kunuwadawada nadigega, ta esi ma'etamo be 'enega 'ana 'ai'aila 'ida apwesa 'edaya. Ta 'abo'agu sinasinapu tupwana namo yamwalamwalatoni, ta ma'etamo esiya maibo'ana yamwalatoni, nadigega gete tuga Yaubada 'imwalatoi 'ai'ailigu.

2 Kolinita 3:18

'enega nigeya 'ebweu talabodaboda maninidaya 'imiyami, ta 'Inapwana 'ina esaesa maemaedanina 'ena tadunedune, ta tupwana be tupwana 'isa'usa'u gelaseda tauna 'ana 'ita maemaedanina nadigega. Guinuwa gete 'Inapwana 'enega, tauna yaluyaluwa tuga.

2 Kolinita 4:6

Manuna Yaubada nina 'igwae, “Guguyoi 'ena maedana 'ida sae,” be Yaubada 'atemaya 'isaesae, 'enega tauna 'ina maedana Keliso manininaya 'a'ita'ita.

2 Kolinita 5:8

'Enega ta'atepatu, ta nuwanuwada bwalada tapilisinedi be 'Inapwana 'ina senaya taapwesa.

Pilipai 1:23

Ona'ai'aila, yage 'eluwa 'ediyega 'adi esinuwa 'eguya mwau wawasae. Nuwanuwagu be bale'u gete yapilisine be Keliso ma'iyagu 'amimi, nate 'ebe gwausowala sinabwana.

1 Tesalonaika 4:17

ta 'enega 'abo'ada wate mayawasida ma'edao tatutu'e galewaya, be 'ida 'Inapwana ma'eda taelobaloba pwana 'ediya, be tauna ma'edai tada miyaataya.

1 Pita 1:21

Ga tauna Keliso nina 'enega Yaubada waemisena 'aene tauna mwawasega 'igietoolo limena ga 'ebemi esaesa 'ena 'isa'una, 'enega 'imi emisa be 'imi nuwayaina wasa'u 'ai'ailidi Yaubada 'enaya.

1 Yoni 3:2

Gosegwao, gete tuga Yaubada 'i'awanatuneda be ma'etamo to'ase 'iapwesa 'edaya? Nate namo tamwalamwalatoni 'aene 'ina ilalimanama 'enaya 'ana 'ita tauna tada 'ita, ta 'abo'ada 'ada 'ita 'iesa'u gelasedi be tauna nadigega.

E'ita'ita 21:22

'Asa nina 'enaya nigeya Anuwa Tabu ya'ita'ita, manuna 'Inapwana Yaubada Toewaiwai sana be Lami taudi Anuwa Tabu nidi tuga.

E'ita'ita 3:21

“Ta 'abo yaita 'omi 'iewaiwai, yada tagwala 'enaya be ma'iyagu 'ada miyatowa 'igu 'ebemi esaesa 'ena, nadigega tuga 'abo'agu yaewaiwai, ga Tamagu 'ina 'ebemi esaesa 'ena ma'iyagu 'amiyatowa.