Kolose 3:15 - Loina Tabu Auwauna NT

¹⁵ Be wate Keliso 'ina nuwasiwalowa 'atemi 'ida loinedi. Gete manuna Yaubada maibo'ada 'ibwauyeda ga taeboda 'ebweuna, be manuna tada lokagutoki Yaubada 'ena.

Kolose 3:15 Σταυροειδείς Αναφορές

Yoni 14:27

“'Abo'agu ni'atu be yapilisinemi, 'enega taugu tuga 'igu nuwasiwalowa 'enega yada 'ebwa'emi, ta nuwasiwalowa nina nigeya nadigega me bale'u si'ebwa'ebwa'emi. 'Enega geya'abo waenuenuwanaluwa nai wa'ate'ate sa'ala.

Yoni 16:33

Ona gete yasimanena 'emiya be 'enega ma imi gwausowala wada miyami, manuna 'abo'agu ma'emi. Ta ma'etamo bale'uya wamiyamwau, ta tuwa tuga wada 'atepatu, manuna 'abo'agu loina bale'u yaewaiwai sinena.”

Loma 1:21

Manuna simwalatonina tauna Yaubada, ta nigeya sida 'amayabena be 'enaya sida lokagutoki, ta esi sikwanikwani ta sinuwanuwa besobeso, 'enega guguyoi 'atedi 'iloemaedi.

Loma 14:17

Ta esi wada nuwa'i'isi 'aene Yaubada 'ina 'ebeloina nigeya masula be bwasi manudi, ta esi bubuna bobo'ana be nuwasiwalowa be gwausowala, Yaluyaluwa Tabuna 'enega, manudi.

Loma 15:13

Ta ona'ai'aila, Yaubada namo ma 'ana emisa, manuna taunamo 'enega lema bobo'adi talobalobadi, 'enega nuwanuwagu be ma imi gwausowala wada emisa 'aene 'imi miya sida bobo'ana, ta wate Yaluyaluwa Tabuna 'ina waiwaiyega 'imi emisao nidi 'ida giesinabwa 'ai'ailidi.

Loma 5:1

'Enega gete tugai 'ida emisega ni'atu Yaubada 'i'awa palupaluyeda ga Yaubada ma'edai taegosigosiyana, 'ida 'Inapwana Yesu Keliso 'enega.

1 Kolinita 10:17

Beledi nina 'ebweuna 'enega maibo'ada ta'e'ai, 'enega Keliso oona 'enaya taeboda 'ebweuna.

1 Kolinita 7:15

Ta 'abo yaita 'oyo mwaneyo nigeya Yaubada 'ena 'iemiemisa ta nuwanuwana be 'isa'ileyo, 'uda gisine ta geya'abo 'uegagale. Manuna Yaubada nuwanuwana be wamiya siwalowa, ta geya nuwana egewagewana.

2 Kolinita 4:15

Gete maibo'ana 'omi manumi, be 'enega Yaubada 'ina oboboma 'i'elelewana tomota yauyaudi 'ediya, taudi ma'edao tada lokagutoki sinabwana, be wate Yaubada 'ana tupu be 'ina esaesa sida sinabwa 'ai'aila.

2 Kolinita 9:11

be 'imi esaesa 'enega sawesawemiya gwegwe sinabwana wada egueguyaiyedi, be wate 'imi 'ebwayadaita nina 'abo'ama 'ada 'ebwaya togomabeso 'ediya, be 'enega taudi sida lokagutoki sinabwana Yaubada 'ena.

Epeso 4:16

Manuna 'abo'ada Keliso oona welawela'anao, ta 'igiewaiwaiyeda 'atuwa oona nina 'ana walowaloyao, be 'ana tubweyao maibo'adi 'idi guinuwega sielemalema be obobomega sisinasinabwa ta siewaiwai.

Epeso 4:4

Ona'ai'aila ooda 'ebweuna, ga 'ida nuwayaina wate 'ebweuna namo tuga, ga manuna 'ibwauyedama 'omi ta 'abo'ama, ta Yaluyaluwa Tabuna wate 'ebweuna,

Epeso 5:1

Yaubada 'ina obobomega ni'atu 'i'awa natunemi, 'enega tauna 'ina bubuna wada etotowanei,

Epeso 5:20

be tuta maibo'ana wada lokagutoki yage maibo'adi manudi, 'ida 'Inapwana Yesu Keliso 'ana esanega, Tamada Yaubada 'enaya.

Kolose 1:12

wada lokagutoki Tamada 'ena, manuna tauna 'ina tagwalega sena maemaedanina 'ena tamiyami, 'ina tomotaiyao ma'edao.

Kolose 2:7

manuna Keliso nina 'imi emisa 'alena, ta 'ana togiesinabwa, ta wate 'ana togiepa'ala, nadigega 'ae'ita'esemi, ga manuna walokagutoki sinabwana.

Kolose 3:17

Ta 'imi guinuwa maibo'adi, nate 'imi onao nai 'imi paisewao, maibo'ana 'ida 'Inapwana Yesu 'ana esanega wada guinuwa, ma imi lokagutoki Yesu 'ana esanega, Tamada Yaubada 'enaya.

1 Tesalonaika 5:18

Ta wate tuta yauna wada lokagutoki Yaubada 'ena, 'abo 'imi miya bobo'adi nai to'umalidi 'ediya. 'Imi gwausowala nina nate Yaubada 'ina nuwena, 'abo'ada Yesu Keliso 'ina bodao manuda.

1 Timoti 2:1

'Enega 'igu loina gete 'imi deliegogonao 'ediya, nugana wada sidasida Yaubada 'enaya tomota maibo'adi manudi, ta manudi wa'awanoi be wasidasida ma imi lokagutoki Yaubada 'ena.

1 Timoti 6:12

ta wate tapwalolo 'ana guinuwa bobo'adi 'ediya 'utoo be 'uewaiwai, ta yawasiyo ataya wate 'ugiyai'i'isi, manuna lowa Yaubada 'iesinuwemuya, tuta nina 'imu emisa Yaubada 'enaya 'usimana apwesena tomota yaudi matadiya.

Ibeliu 13:15

'Enega Yesu 'ilemelemeda be tuta yauna 'ediya Yaubada tada tuputupu. Gete 'ida taliya nonowana, 'eguma tauna 'ana esana ta'awa'awa sinabwae.

E'ita'ita 7:12

sigwaegwae, “Ona'ai'aila, 'ida Yaubada nina 'ena tada lotuputupu, be 'awa esaesa be mwalatoi be lokagutoki be 'amayaba be waiwai sida miyaataya 'enaya.”