Guinuwa 19:13 - Loina Tabu Auwauna NT

^13-14 Ta 'aina me Yudia 'idi to'obao nada simiyami ga taudi sisakosakowasi ta 'oba 'enega sigilegile'oasa. 'Enega 'aina 'ediyega Paulo 'ina guinuwa alena sinonona, taudi totaliya sinabwana, 'ana esana Sikiba, natunao me'olotodi site sebeni. 'Enega site sebeni nidi sitoona 'aene 'Inapwana Yesu 'ana esanega yaluyaluwa bi'i tole'oasao 'ediyega sida ula apwesedi, ta 'ebweu kabaleya sieonena, sigwae, “Yesu nina, Paulo 'iguguyae, tauna 'ana esanega 'aloineyo be tai 'upilisine be 'utatauya.”

Guinuwa 19:13 Σταυροειδείς Αναφορές

Madiu 12:27

Ni'atu waona 'aene 'abo'agu Bielisibubi 'ina waiwaiyega yaluyaluwa bi'i yaula apwesedi, ta yaita sana 'ina waiwaiyega 'omi waulaula apwesedi? Bielisibubi 'enega, nai Yaubada 'enega? Gete manuna wanuwanuwa be wada mwalatoni 'aene yaita 'abo'agu.

Madiu 26:63

Ta Yesu tuga 'i'alaenono. 'Enega totaliya sinabwana Yesu 'ieonena, “'Uona 'ai'aila Yaubada matanaya, mwa'adega 'oyo To'etoseyana niyo, ta Yaubada natuna, nai nigeya?”

Maki 5:7

ta 'imagana toila, 'igwae, “Yesu ye, 'oyo Yaubada Toewaiwai sana Natuna, to'ase 'utootoo be 'uguinuwe 'eguya? Tuwa! Yaubada 'ana esanega yasida 'emuya be geya'abo 'uda giegie'elouyagu.”

Maki 9:38

Ta Yoni 'ilolagata ga 'igwae, “'Inapwana, 'ebweu tai 'a'itena 'amu esanega yaluyaluwa bi'i 'iulaula apwesedi, 'enega 'a'etobodena, manuna tai nina nigeya 'ida boda.”

Luke 11:19

ta yaita sana 'ina waiwaiyega 'omi yaluyaluwa bi'i waula apwesedi? Bielisibubi 'enega, nai Yaubada 'enega? Gete manuna wanuwanuwa be wada mwalatoni 'aene yaita 'abo'agu.

Luke 9:49

Ta Yoni 'ilolagata ga 'igwae, “'Inapwana, 'ebweu tai 'a'itena ta 'amu esanega yaluyaluwa bi'i 'iulaula apwesedi. 'Enega 'a'etobodena, manuna tai nina nigeya 'ida boda.”

2 Kolinita 11:4

'Enega 'abo yaita 'iweewai be Yesu tetelina 'emiya 'iloguguya, ta nigeya 'abo'ama 'ima loguguya nadigega, tauna 'enaya watagwalemi tuga. 'Omi ni'atu tetela bobo'ana 'ena watagwalemi ga Yaluyaluwa Tabuna 'emiya walotoona, ta sa'i mali tetela be mali yaluyaluwa 'ediya watagwatagwalemi.