Luke 24:27 - BAṈARA KO VAIRU AMA LEVELEVEO

²⁷ Nio Jisu ta oka zakaremu puekake nioqa Tabu ama Riki kikovevo vokale avo, Mosese o rikiekema buka poso kasi azo ti kiadama poropita madu ko riki poso kasi.

Luke 24:27 Σταυροειδείς Αναφορές

Maka 4:34

Ni kiadama quli ti o mati nianiiekikake podepodeti kale. Ni voko bazubazu ta podepodeti kale ko kiada. Melai so keru vo ni voko disaipeli madu ke kiadakoi ke eva keru inio vota o mati uria rupasika kiadama quli.

Luke 24:25

Nio Jisu ta eri kiolake nioqa kasi, “Qea sarubea qela, matu niuniala inio qeta eva, nio pui qe tuvevo pueka kiadama quli se poropita madu kikevevo seko riki kale!

Luke 24:44

Ni vota eri kiolake sekasi, “Komi kio aṉa lula a melai bazuekema quli me so keru aṉa a melati eve keru me. Koa kiadama quli koko rikiziovima aṉa kolai ereivako Mosese ko Bazu kale, ni se poropita madu ko riki kale ni Devita ko kera kale ama ta tuvevo kota elou,” kiolake.

Jone 1:45

Nio Pilipi ta o luluevake vo Jisu, ni koko tova inio vota o veake vo Nataniala ni o bazuevake vo, “Eṉeta ṉe veala vo tivoine vo o kaseini vo Mosese ko Bazu kale, ni se poropita madu ko riki kale. Vo inio vo Nazareti ala Jisu, Josepa vo meqora,” kiolake.

Jone 12:41

Aisea ta so kiove, ako vota o keve vo Jisu ko ṉaṉaidara, ni so inio vota o kasevake.

Jone 5:37

Ni vo Mama, vo o soroeleni aṉa, vo melai olai bazubazutani aṉa. Melai meta puliama taku kale inio meba tava viqe voko kora, ni pui meba tava keve voko loilo,

Jone 5:39

Meta me lezumuka ko Tabu ama Riki kikolani, ako meta eri kimela ta kokale inio me qovou ko noqola kama saevo kimela sole. Maba ko ikio koa Tabu ama Riki ko kolai bazutako aṉa,

Iruruputo 10:43

Kiadama poropita madu ta kevai bazute vo, ni ke kaseke ta sea kiadamu seke tuvevo puevo amu vo ta kota ma akoilou seko sarueko poso vo Jisu kale kude,” kiolake.

Iruruputo 3:18

Melai vo Baṉara ta lula o pidokike se poropita madu kale kude ta vo o soroevo ala Pakio ta o tolailou; ni kota tuvevo ko evake vokale.

Iruruputo 3:22

Ako Mosese ta eri kiove sole, ‘Vo Baṉara mevo Lekasa ta o soroevou kala Poropita mekasi, omadeuvo vo aṉa o soroele jari, ni vota kala pado me ṉavi kale ala inio. Meta tava zorikomo kiadama quli vo o kaseko ama ni erekomo.

Iruruputo 3:24

“Kiadama poropita madu seke bazubazuteni, Samuela ni se voko tova ke eveni ta ke kaseke so keru komia taku kale ko ereivako quli.

Iruruputo 7:37

Ni Mosese inio vo eri kioveni sea Izireli ama maba poso kasi, ‘Baṉara ta o melai soroevou me kala pado Poropita, omadeuvo vota o soroela aṉa jari, ni vota kala pado me ṉaviko qoqono kale ala,’ kioveni.

Iruruputo 8:35

Nio vo Pilipi ta o tanitake pesio koa Tabu ama Riki ko kobu kikolani kasi azo ti kobeta baroake vai bazueko vo Jisu Karisito ko Uri ama Bazu.

Kelokelozato 19:10

Aṉata a loqunake voko kiti raki kasi tu a ilusivo vo kialake, melai vota eri kiolake aṉa kasi, “Pui ilusilo aṉa! Ako aṉata kala pado ṉokale ala nabulu lala inio, ni ṉoko lotu tamania kalea lala, ni seke kati inazani vo Jisu o puratikema tuveano kalea lala sole. Ilusiva vo Baṉara o kiada. Ako koa tuveano vo Jisu o puratikema ikio se poropita madu komai avoziako sole,” kiolake.