खाङ्‌मुमा 13:11 - बान्‍तावा राई

¹¹ खोन्‍किना हेन्‍खामादाङ्‌का लोन्‍ताओ नि अ़क्‌तात साक्‍स़ङ अ़ङ्‌का खाङ। मोसोओछाङ थुबाछाओवाङा ह्‍वातात अ़खुक्‍खाचि याआङा, मेन मो अ़धिवाङ प़वात्‍नि चेवाङा।

खाङ्‌मुमा 13:11 Σταυροειδείς Αναφορές

मत्‍ति 7:15

सोज्‍जेओ निनाम्‍हाङ्‌य़ङ खाकालुचिएदाङ्‌का चाप्‍चेत्‍तानिन्‍चिन। मोचि आम्‍नुओ रादा भेरावाको म़लिकि म़ता, मेन अ़चुकोङ्‌हुत्‌या क़माकात्‍तुओ बेन्‍पाचिवात्‍नि मोचि म़मु।

रोमि 16:18

देकिनालो ओवाको म़नाचिआ आन्‍हाङ्‌पा ख्रिस्‍त ऩब़रुन, मेन खोचिओ अ़चुमित्‍मावा आप्‍पि म़ब़त्‍नान्‍चिन। मोचिओ चानुओ दोलेङ्‌वा य़ङ खोन्‍कि चानुओ य़ङ्‌चिआ सोत्‍सोत्‌वाओ म़नाचि म़धान्‍तुचि।

२ थेसलोनिकि 2:4

खोसाआ निनाम्‍हाङ खोन्‍कि झारा म़नाचिआ म़ब़क्‍तुङुचिओचिओ अ़चुदेङ्‌सालाप्‍पादा फित्‍चि मुचि खोन्‍कि मोचिदाङ्‌का आप्‍पि तोक्‍पो मुनान्‍चिन। खोन्‌ओसा, आप्‍पिङा निनाम्‍हाङ नि झारा खाएत्‌याङ्‌सा निनाम्‍हाङ्‌ओ अ़चुब़क्‍खाखिम्‌दा मो युङ।

खाङ्‌मुमा 11:7

मोचिआ अ़चुसालुम्‍स़ङ्‌ओ अ़चुकाचि अ़चिन्‍चुकि अ़थेन मात्‍द़ङ्‌ओ हुत्‌युङ्‌का लोन्‌ओ मो सायाम्‍पोक्‌आ मोचिएनान ङेन मु, खोन्‍कि मोचिएदा छोकि मोचि सेरुचि।

खाङ्‌मुमा 12:17

खोन्‍किना मो अ़धिवाङ प़ मो मेत्‍छामाएदा चाअ़त्‍लो अ़च़ऱपाकारा। खोन्‌ओसा मोसाआ मो नि मेत्‍छामाओ अ़छाचिएनान ङेन मुमा पुङ्‌सु। मोचि निनाम्‍हाङ्‌ओ अ़चुय़ङ काकाङ्‌चि खोन्‍कि येसुआ अ़मुवाओ खोन्‍कि म़चिन्‍तुचिओ य़ङ्‌दा सोम्‍कुवा कामुचिओ।

खाङ्‌मुमा 13:1

खोन्‍कि धियाङ्‌वामादाङ्‌का लोन्‍ताओ अ़क्‌तात साक्‍स़ङ अ़ङ्‌का खाङ, मोसोओ दस्‌कातात अ़खुक्‍खाचि खोन्‍कि सात्‌कातात अ़ताङ्‌चि म़याआङा। मोसोओ दस्‌कातात अ़खुक्‍खाचिदाङा दस्‌कातात ताङ्‌बोप्‍माचि म़याआङा, खोन्‍कि मोसोओ झारा अ़ताङ्‌दा निनाम्‍हाङ सुङ्‌माय़ङ ऩङ याआङा।

खाङ्‌मुमा 13:17

मो सेप्‍खा मात्‍द़ङ साङ्‌आछाङ खित्‍मा माङ्‌लो इन्‍मा ऩतोक्‍तुन। मो सेप्‍खा मो साक्‍स़ङ्‌ओ अ़ऩङ ओ माङ्‌लो मो अ़खिप्‌आ मोसोओ अ़ऩङ खाङ्‌मुसु।

खाङ्‌मुमा 13:4

म़नाचिआ अ़धिवाङ प़ अ़ब़क्‍ताङा, देकिनालो मोसोओ अ़पाङ साक्‍स़ङ प़युङ्‌सु। मोचिआ ओवात्‍नि य़ङ्‌सा साक्‍स़ङ्‌छाङ अ़ब़क्‍ता, “ओ साक्‍स़ङ्‌वाको नि साङ युङ्‌याङ कि? ओसोओ अ़देङ्‌सालाप्‍पादा साङ ङेन मुमा ऱ कि?”

खाङ्‌मुमा 16:13

खोन्‍किना अ़ङ्‌का अ़धिवा प़ओ अ़दोदाङ्‌का, साक्‍स़ङ्‌ओ अ़दोदाङ्‌का खोन्‍कि सोज्‍जेओ निनाम्‍हाङ्‌य़ङ खाकालुओ अ़चुदोदाङ्‌का भोप्‍रोकोक्‌वाकोचि सुम्‌कातात चिम्‍माकात्‌ओ लावाचि म़लोन्‍ताङाओ खाङ्‌च़ङ।

खाङ्‌मुमा 17:6

येसुएदा मोचि सोम्‍कुवा म़मुवाओसा मेत्‍छामाआ साकोङ्‌छ़ङ कामुचि सेरुचिओ खोन्‍कि मोसाआ अ़चुह़ दुङुकि सेरुओ खाङ्‌कि अ़ङ्‌का चाअ़त्‍लो अ़दोम्‍ताङ्‌दाङ।

खाङ्‌मुमा 17:8

खाना त़खाओ मो साक्‍स़ङ अ़क्‍दु ह़ङाङा, हान मात्‍द़ङ। हान्‍छाङ मो अ़थेन मात्‍द़ङ्‌ओ हुत्‌दाङ्‌का लालोन खोन्‍कि लुक्‍सि खात। हेन्‍खामादा कायुङ म़नाचि, साङ्‌कोओ अ़ऩङ हेन्‍खामा मुन्‍मा बुयादाङ्‌काङा ह़ङ्‌म़ङ्‌ओ छाप्‍लाखादा मान्‍छाप्‌युक, मोचिआ मो साक्‍स़ङ अ़खाङ्‌कि दोम्‍तुदाचि, देकिनालो मो अ़क्‍दु ह़ङाङा, मेन हान मात्‍द़ङ खोन्‍कि मो माय़ङ लाता।