Apocalipsis 4:11 - Ñʼoom xco na tqueⁿ tyʼo̱o̱tsʼom cantxja ʼnaaʼ Jesucristo

¹¹ ꞌU Ta Tyꞌo̱o̱tsꞌoomyâ na tꞌmaⁿ cwiluiindyuꞌ, jeeⁿ matsonaꞌ na cwitꞌmaaⁿꞌndyuꞌ. ꞌU tijoom cantycwii cantyja najnduꞌ. ꞌU saꞌ chaꞌtso na niom. Tuiinaꞌ ncꞌe na lꞌue tsꞌomꞌ ndoꞌ ndimꞌaⁿnaꞌ ncꞌe ꞌu.

Apocalipsis 4:11 Σταυροειδείς Αναφορές

Hechos 14:15

Tyolaxuaana tyoluena: —Chiuu sa ꞌo nnꞌaⁿ na luaaꞌ ñeꞌcalꞌaꞌyoꞌ. Mannꞌaⁿ jâ chaꞌna ꞌo. Tquioñꞌo̱o̱ⁿyâ ñꞌoom naya na nndyeꞌyoꞌ cha caꞌndyeꞌyoꞌ nmeiⁿꞌ na cweꞌ tsꞌiaaⁿꞌndyo. Calatꞌmaaⁿꞌndyoꞌ nquii Tyꞌo̱o̱tsꞌom na wandoꞌ ee jom tqueeⁿ cañoomꞌluee ñequio tsjoomnancue ñequio ndaaluee ndoꞌ chaꞌtso nnom na cwilaxmaⁿnaꞌ.

Hechos 17:24

’Jom sꞌaaⁿ tsjoomnancue ñequio chaꞌtso ꞌnaⁿ na niom nnomnaꞌ. Cwiluiiñê na matsa̱ꞌntjoom chaꞌwaa cañoomꞌluee ñequio tsjoomnancue. Joꞌ chii ticaⁿnaꞌ wꞌaa na nlꞌa nnꞌaⁿ yuu na nncꞌoomñê.

Romanos 11:36

Ee chaꞌtsoñꞌeⁿ niom ncꞌe jom, ndoꞌ tseixmaⁿñꞌeeⁿ joꞌ. Joꞌ chii macanda̱ jom caluiitꞌmaⁿñê chaꞌwaati xuee. Amén.

Efesios 3:9

Ndoꞌ tyꞌioom tsꞌiaaⁿ ja na catsꞌaaya na cꞌooliu nnꞌaⁿ chiuu nncwjiꞌnꞌmaaⁿñê ꞌo nnꞌaⁿ na nchii tuiindyoꞌ judíos. Quia na jnaⁿjndyeecheⁿnaꞌ na sꞌaa Tyꞌo̱o̱tsꞌom chaꞌtsoti na maniom seijndaaꞌñê na luaaꞌ nncuaa, sa̱a̱ hasta quia jeꞌcheⁿ matseicano̱o̱ⁿ na ljoꞌ,

Hebreos 1:10

Mati matso Tyꞌo̱o̱tsꞌom: ꞌU Ta, quia na jnaⁿjndyeecheⁿ chaꞌtso, ꞌU tqueⁿꞌ tsjoomanancue; manncuꞌtiꞌ tqueⁿꞌ ljo̱ꞌluee.

Hebreos 1:2

Sa̱a̱ jeꞌ ncuee na macanda̱, jnda̱ mamatseineiiⁿ nda̱a̱ya ñequio ñꞌoom ꞌndyoo Jnaaⁿ. Chaꞌtsoti na niom, ñꞌeⁿ juu quia tqueeⁿ joonaꞌ, ndoꞌ seijndaaꞌñê na chaꞌtso joo joꞌ calaxmaⁿnaꞌ cwentaaꞌ juu.

Apocalipsis 1:6

Jnda̱ tqueeⁿ jaa na tꞌmaⁿ cwiluiindyo̱ na mꞌaaⁿya nacje ꞌnaaⁿꞌ Tyꞌo̱o̱tsꞌom. Ndoꞌ tqueeⁿ na cwiluiindyo̱ ntyee na cwindya̱ꞌntjo̱o̱ⁿya nnom Tyꞌo̱o̱tsꞌom na juu cwiluiiñe Tsotyeeⁿ. Catseitꞌmaaⁿꞌñenaꞌ jom ndoꞌ caluiitꞌmaⁿñê cantyjati najndeii na matseixmaaⁿ chaꞌwaati na yo. Amén.

Apocalipsis 10:6

Tyeⁿ ñꞌoom tjoomꞌm na cjoomꞌm na malcweeⁿꞌeⁿ xueeꞌ Tyꞌo̱o̱tsꞌom na tjaa yuu ntycwii na wandoꞌ, nqueⁿ na sꞌaaⁿ cañoomꞌluee ñequio tsjoomnancue ñequio ndaaluee ñequio chaꞌtso nnom na niom joꞌ joꞌ. Luaa ñꞌoomtyeⁿ na seineiiⁿ, tsoom: —Taxocwindooꞌti Tyꞌo̱o̱tsꞌom.

Apocalipsis 14:7

Cꞌuaa ꞌñom matseineiiⁿ, tsoom: —Calcwiꞌyoꞌ Tyꞌo̱o̱tsꞌom ñequio na nquiaꞌyoꞌ jom ee na jnda̱ tueꞌntyjo̱ xjeⁿ na nncuꞌxeeⁿ nnꞌaⁿ. Calaꞌtꞌmaaⁿꞌndyoꞌ nqueⁿ na sꞌaaⁿ cañoomꞌluee ñequio tsjoomnancue, ñequio ndaaluee, ndoꞌ ñequio chaꞌtso nqueⁿljoꞌ yuu na cwinaaⁿꞌ ndaa.

Apocalipsis 19:1

Jnda̱ teinom na nmeiiⁿꞌ, jndiiya na teicꞌuaa jndyee cwii tmaaⁿꞌ nnꞌaⁿ na jndyendye na mꞌaⁿ cañoomꞌluee. Cwiluena: Aleluya. Nquii Tyꞌo̱o̱tsꞌom cwentaaya tseixmaaⁿ na cwiluiꞌnꞌmaaⁿndyo̱. Matyꞌiomnaꞌ na calawa̱a̱ndya̱a̱ya jom, ee nqueⁿ tseixmaaⁿ najneiⁿ.

Apocalipsis 5:12

Cꞌuaa cwiluena: Juu Catsmaⁿ na jlaꞌcueeꞌ nnꞌaⁿ, tꞌmaⁿ cwiluiiñê cantyja najneiⁿ, ndoꞌ tseixmaaⁿ na tyañê. Macanda̱ jom cwiluiiñê na jndo̱ꞌ tsꞌoom ndoꞌ chaꞌtso nnda̱a̱ nntsꞌaaⁿ. Jeeⁿ matyꞌiomnaꞌ na calꞌuuya ñꞌoom ya cantyja ꞌnaaⁿꞌaⁿ, ndoꞌ calawa̱a̱ndya̱a̱ya jom ndoꞌ calaꞌtꞌmaaⁿꞌndyo̱ jom.

Apocalipsis 5:2

Ndoꞌ ntyꞌiaya cwii ángel na jeeⁿ jndeii ndoꞌ jeeⁿ cꞌuaa ꞌndyoo na matseineiⁿ. Mawaxꞌee: —¿ꞌÑeeⁿ juu tseixmaⁿ na nntseicanaaⁿñe yuu na ta̱ꞌtyeⁿ tsomwaa ndoꞌ na nntseicano̱ⁿꞌ juunaꞌ?

Apocalipsis 5:9

Ndoꞌ cwitana cwii luantsa xco. Cwiluena: ꞌU tseixmaⁿꞌ na nncoꞌñomꞌ tsomwaaꞌ ndoꞌ nntseicanaaⁿndyuꞌ yuu na tjata̱ꞌtyeⁿ juunaꞌ. Ee jlaꞌcueeꞌ nnꞌaⁿ ꞌu ndoꞌ ñequio niomꞌ tiomlꞌuaꞌ jnaaⁿ nnꞌaⁿ cha nlaꞌxmaⁿna cwentaaꞌ Tyꞌo̱o̱tsꞌom. Joona cwiluiindyena nnꞌaⁿ na ticwii cwii ntmaaⁿꞌ, ñequio nnꞌaⁿ na ticwii cwii nnom ñꞌoom na cwilaꞌneiⁿ, ñequio nnꞌaⁿ na ticwii cwii nnom na tjachuiiꞌndye, ñequio nnꞌaⁿ cwii cwii ndyuaa.