Apocalipsis 21:22 - Ñʼoom xco na tqueⁿ tyʼo̱o̱tsʼom cantxja ʼnaaʼ Jesucristo

²² Ndoꞌ tjaaꞌnaⁿ watsꞌom ntyꞌiaya tsjoomꞌñeeⁿ, ee nquii Ta Tyꞌo̱o̱tsꞌom na tseixmaⁿñꞌeeⁿ chaꞌtso nnom najnda̱, ñequio nquii Catsmaⁿ, joona cwiluiindyena watsꞌom cwentaaꞌ tsjoomꞌñeeⁿ.

Apocalipsis 21:22 Σταυροειδείς Αναφορές

Mateo 24:2

Sa̱a̱ jom tꞌo̱o̱ⁿ nda̱a̱yâ, tsoom: —¿Aa cwintyꞌiaꞌyoꞌ na jeeⁿ ya chaꞌtso nmeiⁿꞌ? Candyeꞌyoꞌ nntsjo̱o̱ na mayuuꞌcheⁿ tixocaꞌndiinaꞌ cwii tsjo̱ꞌ nacjooꞌ xꞌiaaꞌnaꞌ. Nntyuiiꞌñꞌeⁿ lꞌaameiⁿꞌ.

Juan 10:30

Ja ñequio Tsotya̱ ñeꞌcwii cwiluiindyo̱ ñꞌeⁿñê.

Juan 13:32

Ndoꞌ xeⁿ nntseitꞌmaaⁿꞌñenaꞌ jom cantyja na manntjo̱ⁿ, quia joꞌ mati cantyja ꞌnaaⁿꞌ joꞌ nntseitꞌmaaⁿꞌñê ja na cwiluiindyo̱ tsꞌaⁿ na jnaⁿ cañoomꞌluee, ndoꞌ tyuaaꞌ nntsꞌaaⁿ na ljoꞌ.

Juan 4:21

Matso Jesús nnom yuscuꞌñeeⁿ: —ꞌU yuscu, catseiyuꞌ ñꞌoom na matsjo̱o̱ njomꞌ na manncueꞌntyjo̱ xjeⁿ na nlaꞌtꞌmaaⁿꞌndye nnꞌaⁿ Tsotya̱ya meiⁿquiayuucheⁿ, nchii cweꞌ sjo̱waa oo Jerusalén.

Juan 4:23

Sa̱a̱ manncueꞌntyjo̱ xjeⁿ, ndoꞌ jeꞌ mamaweꞌntyjo̱ na joo nnꞌaⁿ na mayuuꞌcheⁿ na cwilaꞌtꞌmaaⁿꞌndye Tsotya̱ya, macaⁿnaꞌ na calaꞌtmaaⁿꞌndyena jom cantyja ꞌnaaⁿꞌ Espíritu na cwiluiiñê ndoꞌ ñequio na mayoona. Ee lꞌue tsꞌom Tsotya̱ya na luaaꞌ calaꞌtꞌmaaⁿꞌndye nnꞌaⁿ jom.

Colosenses 1:19

Tyꞌo̱o̱tsꞌom lꞌueya tsꞌoom na catseixmaⁿ Cristo chaꞌtsoti na matseixmaaⁿ.

Colosenses 2:9

Ee chaꞌtso na cwiluiiñe Tyꞌo̱o̱tsꞌom canda̱a̱ꞌñꞌeⁿ tseixmaⁿ Cristo na tuiiñê na tsꞌaⁿ jom.

Apocalipsis 1:8

“Ja cwiluiindyo̱ Alfa ñequio Omega. Ja maxjeⁿ mꞌaaⁿya najndyee ndoꞌ na macanda̱.” Luaaꞌ matso nqueⁿ na matsa̱ꞌntjoom chaꞌtso. Nqueⁿ na mꞌaaⁿ ndoꞌ mꞌaaⁿ ndoꞌ maxjeⁿ ñetꞌoom ndoꞌ nncueꞌntyjo̱ na nncwjeeꞌcañoom. Nqueⁿ na cwiluiiñê na chaꞌtso najndeii matseixmaaⁿ.

Apocalipsis 11:17

Tyoluena: Cwiñeꞌquiaayâ na quianlꞌuaꞌ ꞌu Ta Tyꞌo̱o̱tsꞌom na matseiꞌxmaⁿꞌñꞌeⁿꞌ chaꞌtso nnom najnda̱. ꞌU mꞌaaⁿ ndoꞌ mꞌaaⁿndyuꞌ, nacjeeꞌ na jnaⁿjndyeenaꞌ mamꞌaaⁿndyuꞌ ndoꞌ ticantycwii cantyja ꞌnaⁿꞌ. Mamaꞌmo̱o̱ⁿꞌ chiuu waa najnduꞌ na matseiꞌxmaⁿꞌ, ndoꞌ jeꞌ jnda̱ tꞌmo̱ⁿnaꞌ na matsa̱ꞌntjomꞌ.

Apocalipsis 14:4

Joo naⁿmꞌaⁿ tyooꞌndyena Tyꞌo̱o̱tsꞌom. Macanda̱ jom cwilaꞌtꞌmaaⁿꞌndyena. Cwiꞌoontyjo̱na naxeⁿꞌ Catsmaⁿ meiⁿyuucheⁿ na wjaⁿ. Tiomlꞌua Tyꞌo̱o̱tsꞌom jnaaⁿna na tjeiiꞌñê joona quiiꞌntaaⁿ nnꞌaⁿ cha macanda̱ nlaꞌxmaⁿna cwentaaⁿꞌaⁿ ndoꞌ cwentaaꞌ juu na matseicajndyunaꞌ Catsmaⁿ.

Apocalipsis 15:3

Cwitana luantsa cantyja na tjeiꞌnꞌmaaⁿñe Tyꞌo̱o̱tsꞌom joona ñequio lꞌo̱ Moisés, tsaⁿ na ñejndiꞌntjom nnoom, ndoꞌ mati tana luantsa na cwilaꞌtꞌmaaⁿꞌndyena Catsmaⁿ na tjeiꞌnꞌmaaⁿñê joona. Matsonaꞌ: ꞌU Ta Tyꞌo̱o̱tsꞌom matseiꞌxmaⁿꞌñꞌeⁿꞌ chaꞌtso nnom najnda̱. Jeeⁿ tꞌmaⁿ tsꞌiaaⁿ macheꞌ, tjacantyja na ya joonaꞌ. ꞌU cwiluiindyuꞌ na matsa̱ꞌntjomꞌ chaꞌwaa tsjoomnancue. Chaꞌtso cantyja ꞌnaⁿꞌ matseiꞌxmaⁿꞌ na matyꞌiomyanaꞌ ñequio na mayuuꞌ.

Apocalipsis 16:14

Joo espírituꞌñeeⁿ cwiluiindyena naⁿjndii. Jndye nnom ꞌnaaⁿ cwilꞌana na xocanda̱a̱ nntsꞌaa na cweꞌ tsꞌaⁿ. Cwiꞌoontyjaaꞌna nnꞌaⁿ na cwitsa̱ꞌntjom chaꞌwaati tsjoomnancue, na nlaꞌtjomna naⁿꞌñeeⁿ na nlꞌana tiaꞌ nacjooꞌ Tyꞌo̱o̱tsꞌom, nqueⁿ na matseixmaⁿñꞌeeⁿ chaꞌtso nnom najnda̱, jnda̱ tqueⁿ xuee na nncuaa tiaꞌ.

Apocalipsis 16:7

Ndoꞌ jndiiya na matseineiⁿ ángel na machꞌee cwenta chom na ntyjo nomtsꞌom, matso: —Mayuuꞌ na ljoꞌ, ꞌU Ta Tyꞌo̱o̱tsꞌom na matseiꞌxmaⁿꞌñꞌeⁿꞌ chaꞌtso nnom najnda̱, macheꞌ cantyja na matyꞌiomyanaꞌ ndoꞌ majoꞌndyoꞌ na macuꞌxeⁿꞌ nnꞌaⁿ.

Apocalipsis 19:15

Quiiꞌ ꞌñom ndiiꞌ cwii xjo na jeeⁿ ta̱a̱. Juunaꞌ maꞌmo̱ⁿnaꞌ na nncuꞌxeeⁿ nnꞌaⁿ njoomnancue. Ndoꞌ juu na nntsa̱ꞌntjoom tꞌmaⁿ nlcoꞌwiꞌnaꞌ joona. Chaꞌxjeⁿ cwinchjee nnꞌaⁿ ta̱uva na nluiiꞌ ndaaꞌnaꞌ, maluaaꞌ matseijomnaꞌ na nntsꞌaaⁿ joo nnꞌaⁿ na tiñeꞌquiandye cantyja ꞌnaaⁿꞌaⁿ. Ee nquii Tyꞌo̱o̱tsꞌom na matseixmaⁿñꞌeeⁿ chaꞌtso nnom najnda̱, cantyjati na matseiwꞌeeⁿ, maluaaꞌ nntsꞌaaⁿ na nlcoꞌwiꞌnaꞌ naⁿꞌñeeⁿ.

Apocalipsis 4:8

Ndoꞌ chaꞌtsondye joo naⁿꞌñeeⁿ na taꞌndoꞌ, niom yom yom lquiina. Chaꞌwaandyena ñꞌeⁿ lquiina chuuꞌ nꞌom nda̱a̱na. Naxuee natsjom ticꞌoomeintyjeeꞌna na cwiluena: Nquii Ta Tyꞌo̱o̱tsꞌom matseixmaⁿñꞌeeⁿ chaꞌtso nnom najnda̱. Ljuꞌ. Ljuꞌ. Ljuꞌ cwiluiiñê. Nqueⁿ mꞌaaⁿ nacjeeꞌ na jnaⁿjndyeenaꞌ. Maxjeⁿ mꞌaaⁿ ndoꞌ mꞌaaⁿ ndoꞌ nncueꞌntyjo̱ na nncwjeeꞌcañoom.

Apocalipsis 5:6

Quia joꞌ ntyꞌiaya cwii tsꞌaⁿ chaꞌcwijom catsmaⁿ na jnda̱ jlaꞌcueeꞌ nnꞌaⁿ. Meintyjeeⁿꞌeⁿ nacañoomꞌ tio quiiꞌntaaⁿ ñequiee naⁿtaꞌndoꞌ ñequio nnꞌaⁿ na cwiluiitquiendye. Jom niom ntquieeꞌ ndeiꞌjñeeⁿꞌeⁿ ndoꞌ niom ntquieeꞌ nꞌomnnoom. Joo nꞌomnnoom cwiluiindyenaꞌ ntquieeꞌ Espíritu na cwiluiiñe Tyꞌo̱o̱tsꞌom na jñoom chaꞌwaa tsjoomnancue.

Apocalipsis 7:15

Mancꞌe joꞌ mꞌaⁿna jo nnom tio yuu na wacatyeeⁿ Tyꞌo̱o̱tsꞌom. Naxuee natsjom cwindyeꞌntjomna watsꞌom cañoomꞌluee. Ndoꞌ nqueⁿ machꞌeeⁿ cwenta joona.

Apocalipsis 7:17

Ee nquii Catsmaⁿ na meintyjeeꞌ ndyeyu jo nnom tio, jom nnteixꞌeeⁿ joona. Chaꞌna tsꞌaⁿ na maleichuu canmaⁿ, nncjaachom joona yuu waa xo̱ꞌtyeⁿ na xocantquieeꞌ ndaatioo na mañequiaanaꞌ na ticantycwii na wandoꞌ tsꞌaⁿ. Ndoꞌ nquii Tyꞌo̱o̱tsꞌom nncueeꞌñê ndaanda̱a̱na.