Miˇkaˬ 1:6 - Akha

⁶ Yeˬluˇsaˬlehˬ meuˬ baˬ da neh maˬ ngeuˇ-a loˇ. Kʼoeˇ miˇ neh, Sahˬpaˬ Miˬyehˇ ehˇ-eu, “Saˬmaˬliˆ meuˬ-euˬ deh ga-ahˇ nymˇ nymˇ cehˇ baꞈ bymˇ taˬ-euˬ loꞈ-ehˇ ngaˇ laˆ pyeuꞈ-awˇ, aˬ gaꞈ aˇ bawˬ ka-eu jawˇ duˬ bi pyeuꞈ-iˇ ma. Meuˬ gawˬ-euˬ kʼaˬ lo tsaˬ byaˆ deuˬ gʼaˬ lawˬ-ahˇ ngaˇ shehˆ dzeh-awˇ, meuˬ-euˬ dawˬ pehˬ neˇ myawˆ ni bi jaˆ ma.

Miˇkaˬ 1:6 Σταυροειδείς Αναφορές

2 Saˬmeuˬlaˆ 17:13

Meuˬ tiˬ meuˬ na laꞈ kʼoeˇ aˬ yawꞈ cehˆ zaꞈ naˇ, aˬ dui-euˬ tsawˇ haˬ dawˬ tawˆ luꞈ aˇ caˆ yuˇ uiˬ laꞈ-awˇ, meuˬ meuˬ lah-ehˇ gʼaˬ lawˬ-ahˇ gʼeu poˆ ahˇ yaꞈ-awˇ, gawˬ duˇ uˬ du kʼaˬ lo tsaˬ byaˆ tiˬ siˬ-iˬ maˬ bi ga yaꞈ ni, yaˆ pyawˇ yaˆ-eu loꞈ-ehˇ juˇ tsui ni jahˇ nehˬ tehꞈ-a.”

2 Sahˬpaˬ 18:10

Kʼoeˇ loꞈ-ehˇ loꞈ jawˬ taˬ-euˬ smˇ kʼoꞈ byah laˇ ngeh, Saˬmaˬliˆ meuˬ sahˬ paˬ Shaˬmaˬneˬzaˬ-euˬ laꞈ-ahˇ ahˇ leˇ-euˬ meh. Saˬmaˬliˆ meuˬ aˬ cawˬ neh bi deuˆ gʼaˬ-euˬ aˇ kʼoꞈ kʼoeˇ kʼoꞈ-aˬ, Heˬsaˬgiˇ Yuˇdaˆ sahˬ paˬ geuꞈ luꞈ-eu koꞈ kʼoꞈ tiˬ kʼoꞈ pyeuꞈ-awˇ, Awˇsheˬ gʼaˬ Iˇsaˬleˬlaˆ sahˬ paˬ geuꞈ luꞈ-eu gʼoeˬ kʼoꞈ aˬ yawꞈ kʼoꞈ meh.

2 Sahˬpaˬ 18:9

Heˬsaˬgiˇ sahˬ paˬ geuꞈ-euˬ oeˬ kʼoꞈ tiˬ kʼoꞈ pyeuꞈ-eu, sahˬ paˬ Awˇsheˬ Iˇsaˬleˬlaˆ miˇ kʼahˬ-ahˇ uˆ lahˇ-euˬ shiꞈ kʼoꞈ tiˬ kʼoꞈ kʼoꞈ-ahˇ, Aˬshuˇliˆ sahˬ paˬ Shaˬmaˬneˬzaˬ gʼaˬ Iˇsaˬleˬlaˆ miˇ kʼahˬ-ahˇ guiˇ deuˆ le-awˇ, Saˬmaˬliˆ meuˬ-ahˇ loꞈ jawˬ taˬ-euˬ meh.

2 Sahˬpaˬ 19:25

“Heu loꞈ-ehˇ bi pyeuꞈ laˇ-eu gʼaˇ duˬ, aˇ hu ba neh ngaˇ gaˇ kawˆ kawˆ taˬ-euˬ nawˇ maˬ gaˬ haw-aˬ loˇ. Nymˬ-mˇ ngaˇ kʼoeˇ loꞈ-ehˇ mˇ byah luꞈ-eu ma. Ziꞈ dui dui-eu meuˬ deuˬ meuˬ tsoeˬ tsoeˬ-iˇ gaˇ keuˆ ni laˆ cawˆ nehˬ nya-eu baoˬ, nawˬ-ahˇ ngaˇ biꞈ taˬ-euˬ ma.

Iˇsaˬyaˇ 17:1

Sahˬpaˬ Miˬyehˇ ehˇ-eu, “Daˬmaˬsehˇ meuˬ-aˬ, meuˬ maˬ paˇ pyeuꞈ-ehˇ, yaw cawˆ jeˬ baꞈ bymˇ taˬ-euˬ gaˇ duˇ tehꞈ-a.

Iˇsaˬyaˇ 25:12

Mawˇbaˆ tsawˇ jeuˬ-euˬ goˇ dui dui-eu meuˬ meuˬ lahˇ-ahˇ aˬ yawꞈ bi coˬ-iˇ-awˇ, laˆ meuˇ laˆ loeˇ nehˬ tehꞈ-a.

Iˇsaˬyaˇ 25:2

Meuˬ deuˬ-ahˇ nawˇ laˆ luˬ laˆ seˇ-awˇ, ziꞈ dah ni gʼeh-eu meuˬ deuˬ bi byaˆ-iˇ-euˬ meh. Nga maꞈ-ahˇ muiˇ-eu sahˬ paˬ deuˬ-euˬ nymˇ deuˬ, piˬ-iˇ byoˆ-iˇ jiˇ-euˬ meh.

Yeˬlaˬmiˇ 31:5

Saˬmaˬliˆ gawˬ jawˬ deuˬ kʼoeˇ taˆ, nawˇ aˬ gaꞈ yaˇ kmˇ paˇ mˇ-awˇ, aˬ gaꞈ baw duˆ kʼaˇ ka-eu deuˬ, aˬ gaꞈ aˇ siˬ za dui dui le tehꞈ-a.

Yeˬlaˬmiˇ 51:25

Baˬbuˇloˬ -oˇ, nawˇ-aˬ, miˇ tsaˬ dawˬ tawˆ luꞈ-ahˇ laˆ cawˆ-euˬ gawˬ jawˬ-ahˇ duˇ-eu meh. Ehˇ kʼawꞈ, Sahˬpaˬ Miˬyehˇ pyeuꞈ-eu ngaˇ nawˬ-ahˇ muiˇ-eu ma. Ngaˇ nawˬ-ahˇ tsuˆ-awˇ, miˇ tsa tuˆ ni yaˆ di nehˬ-awˇ, kʼaˬ lehˇ tehꞈ-ehˇ bi jaˆ yaꞈ ma.

Yeˬlaˬmiˇ 51:37

Miˇ kʼahˬ kʼoeˇ kʼahˬ-aˬ, yaw cawˆ jeˬ-euˬ duˬ gahˬ pyeuꞈ-iˇ-awˇ, bawˇ tsahˬ jeˬ zaˬ deuˬ-euˬ jawˇ duˬ pyeuꞈ-iˇ tehꞈ-a. Kʼoeˇ-aˬ, guˆ laˇ paˬ-ehˇ gʼeh-eu jawˇ duˬ pyeuꞈ-iˇ-awˇ, tsawˇ haˬ tiˬ gʼaˬ-iˬ maˬ jawˇ-eu uˬ taꞈ, kʼaˇ le mawˇ-euˬ tsawˇ haˬ deuˬ tsawˬ guˆ dui dui iˇ tehꞈ-a.

Yeˬlaˬmiˇ 9:11

Sahˬpaˬ Miˬyehˇ heu loꞈ-ehˇ ehˇ-eu meh. “Yeˬluˇsaˬlehˬ meuˬ-ahˇ meuˬ coeˬ jehˆ bymˇ bi pyeuꞈ-iˇ-awˇ, bawˇ tsahˬ aˬ kuiˬ jawˇ duˬ bi pyeuꞈ-iˇ ma. Yuˇdaˆ miˇ kʼahˬ-euˬ meuˬ deuˬ, bawˇ tsahˬ bawˇ dahˇ bi pyeuꞈ-iˇ ma.”

Ngoeˇ dawˬ 4:1

Yaw shehꞈ guiˇ nyiˬ ni bya-euˬ shuiˇ, yaw shehꞈ byoˆ-iˇ jiˇ shaw-euˬ meh. Muiˬ-eu shawˇ-eu kʼaˬ lo tsaˬ byaˆ, gaˇ ma doe ni ga luꞈ-eu meh.

Yeˬsaˬgeˬlaˇ 13:14

Aˬ yawꞈ maꞈ neh lu boeˬ lehꞈ pyuˇ taˬ-euˬ meuˬ lahˇ kʼoeˇ, bi coˬ pyaˆ bi coꞈ shaˆ jiˇ-awˇ, dawˬ pehˬ buˇ law ni bi mawˇ laˇ ma. Meuˬ lahˇ kʼoeˇ coˬ le-awˇ, naw maꞈ-ahˇ deh sehꞈ jiˇ tehꞈ-a. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ naw maꞈ ya siˬ duˬ tehꞈ-a.

Hawˇseˬ 13:16

Ngaˬ-ahˇ puiˬ-euˬ jeˬ baˬ da neh, Saˬmaˬliˆ meuˬ-ahˇ ya kʼehˬ meh. Meuˬ laꞈ kʼoeˇ jawˇ-eu tsawˇ haˬ deuˬ, guiˇ deuˆ luꞈ ngeh bi deuˆ sehꞈ-awˇ, zaˬ nahˬ yaw nyiˇ deuˬ-ahˇ keuˆ ni, miˇ tsa dawˬ duˆ ka sehꞈ nehˬ-awˇ, aˬ nyiˇ pi-eu aˬ ma deuˬ-ahˇ, uˬ maˆ ceuꞈ paˆ nehˬ yaꞈ tehꞈ-a.”

Aˬmoˆ 5:11

Iˇ shaˬ zaˬ deuˬ-ahˇ naw maꞈ zuiˆ gʼaˬ-awˇ, aˬ yawꞈ maꞈ-euˬ cehˇ naw maꞈ nawˬ dzaˬ kʼaˆ dzaˬ-eu meh. Kʼoeˇ miˇ neh, naw maꞈ neh tsoˆ-euˬ muiˬ dui dui-eu kʼaˬ lo nymˇ-ahˇ naw maꞈ maˬ paˇ ya jawˇ-ehˇ, naw maꞈ neh ka taˬ-euˬ haw muiˬ dui dui-eu aˬ gaꞈ yaˇ kmˇ-ahˇ neh doˆ le-euˬ aˬ gaꞈ dzaˇ uiˇ naw maꞈ maˬ paˇ ya dawˇ meh.

Aˬmoˆ 6:8

Dawˬ tawˆ kʼoeˇ taˆ uˆ lahˇ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ maˇ jawˆ ni ehˇ taˬ-euˬ meh. “Iˇsaˬleˬlaˆ tsawˇ haˬ nui ma huiˬ gaˇ mahˇ gaˇ ngaˇ maˬ haw nahˇ nya. Aˬ yawꞈ maꞈ dehꞈ byawˬ-eu gʼaˇ duˬ laˆ saˆ muiˬ taˬ-euˬ nymˇ nymˇ ma deuˬ-ahˇ ngaˇ maˬ haw nahˇ nya. Aˬ yawꞈ maꞈ-euˬ meuˬ meuˬ ma hawˇ-eu kʼoeˇ gaˇ kʼaˇ jaˆ-eu yawˬ jeˬ na luꞈ, muiˇ-eu deuˬ-euˬ aˬ laꞈ laꞈ kʼoeˇ ngaˇ a nehˬ ma.”

Miˇkaˬ 3:12

Naw maꞈ baˬ da neh Yeˬluˇsaˬlehˬ meuˬ-ahˇ deh yaˇ tsehˬ-eu loꞈ-ehˇ bi tsehˬ-awˇ, kʼaˬ lo tsaˬ byaˆ yaw cawˆ deuˬ baꞈ bymˇ taˬ-euˬ loꞈ-ehˇ jaˆ tehꞈ-a. Uˬ duˬ tahˬ nymˇ nymˇ ma jaˆ-eu gawˬ duˇ kʼoeˇ duˇ kʼawꞈ, yaˇ saˬ kʼehˬ ma loꞈ-ehˇ pyeuꞈ-iˇ tehꞈ-a.

Haˬbaˬkuˆ 3:13

Nawˬ-euˬ tsawˇ haˬ kʼoeˇ deuˬ hawˇ-eu, nawˬ neh tseˇ doˆ-euˬ sahˬpaˬ-ahˇ, ka kʼoꞈ-eu lehˇ nawˇ iˇ-euˬ meh. Haiˬ-eu sahˬ paˬ-ahˇ kʼoˆ coˬ-awˇ, gʼaˬ zaˬ gʼaˬ kʼehˇ dawˬ tawˆ luꞈ-ahˇ, nawˇ laˆ piˬ laˆ byoˆ nehˬ-euˬ meh.

Maꞈtehˬ 24:2

Aˬ yawꞈ maꞈ-ahˇ Yeˬsuˇ ehˇ nehˬ-eu, “Nymˇ heu deuˬ-ahˇ naw maꞈ mawˇ luꞈ meh. Ngaˇ naw maꞈ-ahˇ maˇ jawˆ ni ehˇ nehˬ nyaˇ. Nymˇ kʼaˇ gawˬ taˬ-euˬ kʼaˬ lo heu deuˬ tiˬ siˬ kʼoeˇ taˆ tiˬ siˬ maˬ jaˆ ziꞈ nya ni byaˆ-iˇ jiˇ gaˇ keuˆ tehꞈ-a.”