Biblia Todo Logo
Διαδικτυακή Βίβλος

- Διαφημίσεις -




1 Saˬmeuˬlaˆ 7:3 - Akha

3 Iˇsaˬleˬlaˆ tsawˇ haˬ deuˬ-ahˇ Saˬmeuˬlaˆ laˇ ehˇ nehˬ-eu, “Naw maꞈ-euˬ nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ jawˇ gaˇ gʼoꞈ laˇ ma lehˇ ngeuˇ naˇ, aˬ cawˬ tsawˇ jeuˬ-euˬ miˬ yehˇ dawˬ tawˆ luꞈ hawˇ-eu Aˬshaˇtaˬyoˇ miˬ yehˇ ma-euˬ tahˬ pahˬ aˬ ma mawˇ kawˇ-ahˇ naw maꞈ ya byehˇ dzeh yaꞈ meh. Naw maꞈ-euˬ nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ-ahˇ aˬ diˇ aˬ maˇ a nehˬ-awˇ, aˬ yawꞈ-ahˇ tehꞈ-ehˇ uˬ duˬ tahˬ-awˬ. Piˇliˇtiˆ tsawˇ haˬ-euˬ aˬ laꞈ laꞈ kʼoeˇ, naw maꞈ-ahˇ aˬ yawꞈ ka kʼoꞈ nehˬ laꞈ tehꞈ-a.”

Δείτε το κεφάλαιο αντίγραφο




1 Saˬmeuˬlaˆ 7:3
40 Σταυροειδείς Αναφορές  

Kʼoeˇ ngeh, aˬ yawꞈ-euˬ miˬ sawˇ zaˬ deuˬ hawˇ-eu, aˬ yawꞈ-euˬ tsawˇ haˬ dawˬ tawˆ luꞈ-ahˇ, Yaˬkoˆ heu loꞈ-ehˇ ehˇ nehˬ-euˬ meh. “Naw maꞈ nehˬ-ehˇ jaˆ-eu aˬ cawˬ tsawˇ jeuˬ-euˬ Miˬyehˇ pyeuꞈ-eu tahˬ pahˬ aˬ ma mawˇ kawˇ dawˬ tawˆ luꞈ, biˬ dzeh jiˇ yaꞈ-awˬ. Yawˬ ha-euˬ gʼawˇ mawˇ shawˇ-awˇ, mehˬ tsoeˬ yaw shawˇ dm-awˬ.


Sawˇlaˬmoˬ ngaˬ-ahˇ byehˇ dzeh-awˇ, aˬ cawˬ tsawˇ jeuˬ-euˬ miˬ yehˇ pyeuꞈ-eu Siˇdoˬ tsawˇ jeuˬ-euˬ Aˬsaˇtaˬteˬ miˬ yehˇ ma-ahˇ maˬ ehˇ, Mawˇbaˆ tsawˇ jeuˬ-euˬ Sheˬmoˇshaˆ miˬ yehˇ-ahˇ maˬ ehˇ, Aˬmoˬ tsawˇ jeuˬ-euˬ Moˇlehˆ miˬ yehˇ-ahˇ maˬ ehˇ, aˬ yawꞈ uˬ duˬ tahˬ-euˬ miˇ neh, ngaˇ heu loꞈ-ehˇ jahˇ-eu gʼaˇ duˬ lehˬ hmˬ taˬ-euˬ ma. Sawˇlaˬmoˬ-aˬ, ngaˬ-euˬ ehˇ dawˬ-ahˇ maˬ naˇ haˬ geuꞈ ni yaw lehˬ jeˬ mˇ-awˇ aˬ yawꞈ-euˬ aˬ da Daˬbiˇ loꞈ-ehˇ ngaˬ-euˬ zahˇ dawˬ kʼoꞈ dawˬ-ahˇ maˬ caw teh-ehˇ, ngaˬ neh mehˬ nehˬ tsoˆ nehˬ-euˬ dawˬ-ahˇ kʼawꞈ maˬ naˇ haˬ geuꞈ-aˬ.


Miˇ kʼahˬ kʼoeˇ kʼahˬ laꞈ kʼoeˇ, aˬ yawꞈ maꞈ aˬ diˇ aˬ maˇ iˬ baˇ noeˬ poˆ-awˇ, nga maꞈ-euˬ aˬ poeˬ aˬ bawˇ deuˬ-ahˇ nawˬ neh biꞈ taˬ-euˬ miˇ kʼahˬ heu kʼahˬ-ahˇ, nawˬ neh tseˇ doˆ taˬ-euˬ meuˬ heu meuˬ hawˇ-eu, nawˬ-euˬ gʼaˇ duˬ ngaˬ neh tsoˆ taˬ-euˬ Uˬ duˬ tahˬ nymˇ nymˇ ma heu nymˇ jaˆ-eu paw aˬ yawꞈ maꞈ ciˬ pyawˇ-awˇ nawˬ-ahˇ guiˬ lahˬ shaˇ ngeh,


Miˬyehˇ nui deuˬ-ahˇ uˬ duˬ taˬ tahˬ. Naw maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu ngaˬ-euˬ ehˇ dawˬ naw maꞈ ya naˇ haˬ meh. Muiˇ-eu deuˬ-euˬ aˬ laꞈ laꞈ kʼoeˇ, naw maꞈ-ahˇ ngaˇ ka kʼoꞈ nehˬ ma.”


Iˇsaˬleˬlaˆ tsawˇ haˬ deuˬ iˬ baˇ mˇ ni sheuˬ gʼeh-euˬ gʼaˬ pyeuꞈ-eu, Neˬbaˇ-euˬ aˬ li sahˬ paˬ Yeˬyawˇbamˬ neh tsoˆ-euˬ, Beˬdeˬlaˇ meuˬ-ahˇ jaˆ-eu uˬ duˬ tahˬ-eu jawˇ duˬ kʼawꞈ, Yawˇshiˆ laˆ cawˆ-euˬ meh. Lawˇ duˬ-ahˇ aˬ yawꞈ ngawˬ coˬ-awˇ, kʼaˬ lo deuˬ deh paˆ-awˇ, tahˬ meuˇ tahˬ loeˇ-euˬ meh. Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ-ahˇ aˬ yawꞈ miˬ dzaˬ keuˬ dzeh-euˬ meh.


Naw maꞈ-euˬ nui ma saꞈ laˇ dawˬ tawˆ luꞈ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ gaˇ mˇ-awˬ. Sahˬpaˬ Miˬyehˇ-euˬ Dawˬ ma saˇ jaˇ Bahˬ keuˆ hawˇ-eu, aˬ yawꞈ-ahˇ uˬ duˬ tahˬ gaˇ geuꞈ-eu muiˬ-eu shawˇ-eu mˇ myawˬ keu ka dawˬ tawˆ luꞈ bi jaˆ-eu gʼaˇ duˬ, Uˬ duˬ tahˬ nymˇ nymˇ ma tsoˆ-eu dawꞈ leˇ-awˬ.”


Kʼoeˇ naˇ, Sawˇlaˬmoˬ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Ngaˬ li-oˇ, nawˬ da-euˬ Miˬyehˇ-ahˇ nawˇ siˬ nya-awˇ, nawˬ-euˬ nui ma gʼawˇ mawˇ dawˬ tawˆ luꞈ aˬ yawꞈ-euˬ nui kʼahˇ mˇ-awˬ lehˇ, ngaˇ nawˬ-ahˇ dawˬ biꞈ-eu ma. Aˬ dui-euˬ nui noeˬ nui duˇ dawˬ tawˆ luꞈ aˬ yawꞈ siˬ nya meh. Aˬ yawꞈ jawˇ gaˇ nawˇ jiˆ uˇ leˇ naˇ, aˬ yawꞈ nawˬ-ahˇ ha geuꞈ tehꞈ-a. Ehˇ kʼawꞈ, nawˇ aˬ yawꞈ-ahˇ byehˇ dzeh naˇ, aˬ yawꞈ nawˬ-ahˇ tiˬ ziˇ byehˇ dzeh nehˬ laꞈ tehꞈ-a.


Ehˇ kʼawꞈ, nawˬ-euˬ laꞈ kʼoeˇ yaw muiˬ jeˬ ahˇ-a siˬ. Aˬ jeˬ miˇ neh ehˇ naˇ, miˇ kʼahˬ zaˬ deuˬ uˬ duˬ tahˬ luꞈ-eu Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ dawˬ tawˆ luꞈ-ahˇ nawˇ laˆ cawˆ jiˇ-awˇ, Sahˬpaˬ Miˬyehˇ-euˬ nui noeˬ-ahˇ nawˇ caw teh-euˬ meh.”


Ehˇ kʼawꞈ lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ-ahˇ aˬ yawꞈ maˬ laˆ cawˆ-ehˇ, miˇ kʼahˬ zaˬ deuˬ aˬ yawꞈ maꞈ-euˬ aˬ poeˬ aˬ bawˇ deuˬ-euˬ miˬ yehˇ jawˇ gaˇ, nui ma gʼawˇ mawˇ dawˬ tawˆ luꞈ noeˬ paˇ-awˇ maˬ gʼoꞈ poˆ laˇ-a.


“Nga maꞈ-euˬ aˬ poeˬ aˬ bawˇ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, maˬ shawˇ-eu tsawˇ haˬ pyeuꞈ kʼawꞈ nui ma keuˆ dui dui-awˇ nawˬ-ahˇ uˬ duˬ tahˬ luꞈ-eu tsawˇ haˬ heu deuˬ-ahˇ, nawˇ gʼawˬ shaˬ gaˬ-eu laꞈ kʼoeˇ iˬ baˇ pyehˬ nehˬ-awˬ.”


Nui noeˬ tsawˇ haˬ-ahˇ oꞈ kʼawꞈ, dawˬ tmˇ Sahˬpaˬ Miˬyehˇ-ahˇ oꞈ-mˇ jeˇ.


Haiˬ-euˬ tsawˇ haˬ deuˬ dehꞈ jeˬ dehꞈ kawˆ bi paˇ-awˇ, nui noeˬ bi paˇ laˇ-awˬ. Aˬ yawꞈ maꞈ-ahˇ Sahˬpaˬ Miˬyehˇ jawˇ paw bi gʼoꞈ laˇ-awˇ, gʼawˬ shaˬ bi haw gaˬ-awˬ. Aˬ yawꞈ maꞈ Miˬyehˇ jawˇ paw gʼoꞈ laˇ ngeh, iˬ baˇ dawˬ tawˆ luꞈ-ahˇ pyehˬ nehˬ tehꞈ-a.


Ngaˇ Sahˬpaˬ Miˬyehˇ pyeuꞈ-eu gaˇ kawˆ siˬ mawꞈ-eu nui ma aˬ yawꞈ maꞈ-ahˇ ngaˇ biꞈ nehˬ ma. Aˬ yawꞈ maꞈ-ahˇ ngaˬ-euˬ tsawˇ haˬ bi pyeuꞈ laˇ-awˇ, ngaˇ aˬ yawꞈ maꞈ-euˬ Miˬyehˇ pyeuꞈ ma. Aˬ jeˬ miˇ neh ehˇ naˇ, aˬ yawꞈ maꞈ-euˬ nui ma gʼawˇ mawˇ dawˬ tawˆ luꞈ, ngaˇ jawˇ gaˇ gʼoꞈ kʼoꞈ laˇ tehꞈ-a.


Ngaˬ neh lehˬ hmˬ taˬ-euˬ luˬ-iˇ seˇ-iˇ-eu jeˬ dawˬ tawˆ luꞈ gaˇ kawˆ Yuˇdaˆ tsawˇ haˬ deuˬ ya gaˬ ngeh, aˬ yawꞈ maꞈ yaw haiˬ jeˬ maˬ mˇ ni byehˇ -eu baw le. Kʼoeˇ loꞈ-ehˇ byehˇ naˇ, aˬ yawꞈ maꞈ-euˬ yaw lehˬ hawˇ-eu iˬ baˇ-ahˇ ngaˇ pyehˬ nehˬ ma.”


Sahˬpaˬ Miˬyehˇ heu loꞈ-ehˇ ehˇ-eu meh. “Iˇsaˬleˬlaˆ tsawˇ haˬ deuˬ-oˇ, gʼoꞈ laˇ mawꞈ naˇ ngaˇ jawˇ gaˇ gʼoꞈ laˇ-awˬ. Ngaˇ maˬ haw nahˇ-eu tahˬ pahˬ aˬ ma mawˇ kawˇ kʼoeˇ deuˬ-ahˇ, naw maꞈ byehˇ-awˇ ngaˬ-ahˇ saˇ jaˇ ziꞈ naˇ,


“Nymˬ-mˇ poˆ jawˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˬ-eu dawˬ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Nui daˆ daˆ laˇ paˬ-ehˇ gʼeh-eu naw maꞈ-euˬ tahˬ pahˬ aˬ ma mawˇ kawˇ deuˬ-ahˇ byehˇ dzeh-awˇ, ngaˇ jawˇ gaˇ gʼoꞈ laˇ-awˬ lehˇ ehˇ nehˬ-awˬ.


Naw maꞈ kʼaˇ mˇ kʼaˇ shaˇ luꞈ-eu yaw haiˬ jeˬ byehˇ dzeh jiˇ-awˇ, nui ma yaw shuiꞈ paˇ-awˬ. Naw maꞈ Iˇsaˬleˬlaˆ tsawˇ haˬ deuˬ aˬ jeˬ miˇ neh shiˇ mawꞈ-eu nya.


Iˇsaˬleˬlaˆ tsawˇ haˬ deuˬ-oˇ, nawˬ-euˬ Sahˬpaˬ Miˬyehˇ pyeuꞈ-eu, Miˬyehˇ jawˇ paw gʼoꞈ kʼoꞈ laˇ-awˬ. Naw maꞈ-euˬ iˬ baˇ baˬ da neh, naw maꞈ pehˆ toˆ tahˬ sehꞈ-euˬ meh.


‘Tsawˇ haˬ heu deuˬ-euˬ mehˬ boeˬ neh, ngaˬ-ahˇ taˬ huiˬ taˬ mahˇ-eu kʼawꞈ, aˬ yawꞈ maꞈ-euˬ nui ma laꞈ kʼoeˇ, ngaˬ-ahˇ gaˇ mahˇ kaˬ dui dui meh.


Kʼoeˇ ngeh jawˇ, Yeˬsuˇ ehˇ-eu, “Saˬdaˬ-oˇ, doˆ-iˇ-awˬ. ‘Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ tehꞈ-ehˇ nawˇ uˬ duˬ ya tahˬ-awˇ, aˬ yawꞈ-euˬ nui kʼahˇ tehꞈ-ehˇ ya mˇ meh’ lehˇ, Jaˇ liꞈ laꞈ kʼoeˇ boꞈ taˬ-euˬ meh.”


“Tsawˇ haˬ tiˬ gʼaˬ-iˬ sahˬ paˬ nyiˬ gʼaˬ-euˬ zaˬ kʼaˆ maˬ geuꞈ nya-a. Tiˬ gʼaˬ-ahˇ bye naˇ, tiˬ gʼaˬ-ahˇ gaˬ tehꞈ-a. Tiˬ gʼaˬ-ahˇ yaw zeu baw naˇ, tiˬ gʼaˬ-ahˇ yaw zeu maˬ baw-aˇ. Naw maꞈ-aˬ, Miˬyehˇ-euˬ zaˬ kʼaˆ hawˇ-eu pyuˇ shuiˇ myawˬ gahˬ-euˬ zaˬ kʼaˆ, nyiˬ jeˬ luꞈ tiˬ kawˆ loꞈ-ehˇ maˬ geuꞈ nya-a.


Yeˬsuˇ aˬ yawꞈ-ahˇ ehˇ kʼoꞈ nehˬ-eu, “‘Nawˬ-euˬ Miˬyehˇ pyeuꞈ-eu SahˬpaˬMiˬyehˇ-ahˇ tehꞈ-ehˇ nawˇ uˬ duˬ ya tahˬ-awˇ, aˬ yawꞈ-euˬ nui kʼahˇ tehꞈ-ehˇ ya mˇ meh’ lehˇ, Jaˇliꞈ laꞈ kʼoeˇ ehˇ taˬ-euˬ meh.”


Miˬyehˇ-aˬ, Yaw sahˇ meh. Aˬ yawꞈ-euˬ Yaw sahˇ-euˬ baoˬ baˬ da neh tehꞈ-ehˇ, aˬ yawꞈ-ahˇ siˬ duˬ-awˇ uˬ duˬ tahˬ nya-eu meh.”


Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ naˇ haˬ geuꞈ-awˇ, aˬ yawꞈ-ahˇ tehꞈ-ehˇ uˬ duˬ tahˬ-awˬ. Aˬ yawꞈ-ahˇ saˇ jaˇ ziꞈ-awˇ, aˬ yawꞈ-euˬ tsawˇ myahˇ laꞈ kʼoeˇ tehꞈ-ehˇ saˇ jaˇ dzaˬ-awˬ.


Sahˬpaˬ Miˬyehˇ-euˬ mehˬ nah caw teh-awˇ, aˬ yawꞈ-ahˇ guˆ-awˬ. Aˬ yawꞈ-euˬ ehˇ dawˬ naˇ haˬ-awˇ, aˬ yawꞈ-euˬ zahˇ dawˬ kʼoꞈ dawˬ laꞈ kʼoeˇ ziꞈ-awˬ.


Kʼoeˇ gaˇ, Sahˬpaˬ Miˬyehˇ-ahˇ naw maꞈ poˆ-awˇ, naw maꞈ-euˬ nui ma saꞈ laˇ dawˬ tawˆ luꞈ aˬ yawꞈ-ahˇ poˆ naˇ, ya mawˇ tehꞈ-a.


Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guˆ-awˇ, aˬ yawꞈ-ahˇ tehꞈ-ehˇ uˬ duˬ tahˬ-eu laꞈ kʼoeˇ, aˬ yawꞈ-euˬ tsawˇ myahˇ uˬ moˆ tehꞈ-ehˇ naw maꞈ saˇ jaˇ dzaˬ-awˬ.


Miˇ kʼahˬ kʼoeˇ kʼahˬ laꞈ kʼoeˇ, Giˇlaˆ miˇ kʼahˬ tiˬ paˆ paˆ maˬ ehˇ, Aˬshaˇtaˬyoˇ meuˬ hawˇ-eu Eˬdiˇliˇ meuˬ maˬ ehˇ, Awˇgaˆ-euˬ miˇ kʼahˬ pyeuꞈ-eu Baˬshaˬ miˇ kʼahˬ laꞈ kʼoeˇ jaˆ-eu meuˬ meuˬ ma deuˬ maˬ ehˇ, ahˇ leˇ taˬ-euˬ meh. Miˇ kʼahˬ heu deuˬ dawˬ tawˆ luꞈ, Maˬnaˇseˬ-euˬ aˬ li Maˬkiˬlaˇ-euˬ zaˬ deuˬ uˆ deuˬ tiˬ paˆ-ahˇ biꞈ nehˬ-euˬ meh.


Kʼoeˇ naˇ, Yawˇshuˆ paˇ ehˇ-eu, “Teu miˇ neh nymˬ-mˇ Sahˬpaˬ Miˬyehˇ-ahˇ taˬ huiˬ taˬ mahˇ-awˇ, yaw tsaˬ yaw dawˇ hawˇ-eu saˇ jaˇ ziꞈ-euˬ laꞈ kʼoeˇ aˬ yawꞈ-ahˇ uˬ duˬ tahˬ-awˬ. Maˬsoˬpoˬtaˬmiˇ miˇ kʼahˬ hawˇ-eu Iˇjiˇtuˆ miˇ kʼahˬ laꞈ kʼoeˇ naw maꞈ-euˬ aˬ poeˬ aˬ bawˇ deuˬ uˬ duˬ tahˬ-euˬ miˬ yehˇ kʼoeˇ deuˬ-ahˇ byehˇ dzeh-awˇ, Sahˬpaˬ Miˬyehˇ-ahˇ tehꞈ-ehˇ uˬ duˬ tahˬ-awˬ.


Yawˇshuˆ ehˇ-eu, “Toˆ-ehˇ maˇ-iˬ, naw maꞈ nehˬ-ehˇ jaˆ luꞈ-eu boeˇ miˬ shiˬ kʼaˬ-euˬ miˬ yehˇ deuˬ-ahˇ byehˇ dzeh-awˇ, Iˇsaˬleˬlaˆ tsawˇ haˬ deuˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ saˇ jaˇ ziꞈ ma lehˇ kamˬ-awˬ.”


Kʼoeˇ naˇ, boeˇ miˬ siˬ kʼaˬ deuˬ-euˬ miˬ yehˇ deuˬ-ahˇ aˬ yawꞈ maꞈ byehˇ dzeh-awˇ, Sahˬpaˬ Miˬyehˇ-ahˇ uˬ duˬ tahˬ ngeh, Iˇsaˬleˬlaˆ tsawˇ haˬ deuˬ-ahˇ Sahˬpaˬ Miˬyehˇ gʼawˬ shaˬ haw gaˬ-euˬ meh.


Iˇsaˬleˬlaˆ tsawˇ haˬ deuˬ-aˬ, Baˬlaˇ miˬ yehˇ hawˇ-eu Aˬshaˇtaˬyoˇ miˬ yehˇ deuˬ-ahˇ maˬ ehˇ, Siˇdoˬ miˬ yehˇ deuˬ-ahˇ maˬ ehˇ, Mawˇbaˆ miˬ yehˇ deuˬ-ahˇ maˬ ehˇ, Aˬmoˬ miˬ yehˇ deuˬ-ahˇ maˬ ehˇ, Piˇliˇtiˆ miˬ yehˇ deuˬ-ahˇ maˬ ehˇ, uˬ duˬ tahˬ-eu laꞈ kʼoeˇ, Sahˬpaˬ Miˬyehˇ mehˬ shi iˬ baˇ mˇ-euˬ meh. Sahˬpaˬ Miˬyehˇ-ahˇ aˬ yawꞈ maꞈ uˬ duˬ maˬ tahˬ ni byehˇ dzeh-euˬ meh.


Kʼoeˇ naˇ, Iˇsaˬleˬlaˆ tsawˇ haˬ deuˬ Sahˬpaˬ Miˬyehˇ mehˬ shi iˬ baˇ mˇ-awˇ, Baˬlaˇ miˬyehˇ kʼoeˇ deuˬ-ahˇ uˬ duˬ tahˬ-euˬ meh.


Sahˬpaˬ Miˬyehˇ-ahˇ aˬ yawꞈ maꞈ uˬ duˬ maˬ tahˬ ni byehˇ dzeh-awˇ, Baˬlaˇ miˬyehˇ deuˬ hawˇ-eu, Aˬshaˇtaˬyoˇ miˬyehˇ deuˬ-ahˇ uˬ duˬ tahˬ-euˬ meh.


Aˬ yawꞈ-euˬ guiˇ deuˆ-eu keu ka-ahˇ Aˬshaˇtaˬyoˇ miˬ yehˇ ma-euˬ uˬ duˬ tahˬ nymˇ-ahˇ bi jaˆ-awˇ, aˬ yawꞈ-euˬ gʼawˇ mawˇ-ahˇ, Behˬshaˬ meuˬ-euˬ meuˬ lahˇ kʼoeˇ taˆ taꞈ myahˬ-awˇ bi jaˆ-euˬ meh.


Ακολουθησε μας:

Διαφημίσεις


Διαφημίσεις