1 Gawˇliˬtu 8:3 - Akha

³ Ehˇ kʼawꞈ, Miˬyehˇ-ahˇ gaˬ-eu tsawˇ haˬ-ahˇ Miˬyehˇ siˬ nya-eu meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

³ Aerkhawf, tsawrhaq tiq ghaq, Miqyaer-anr gaq nar-aq, Miqyaer, aqyawf-anr siqnya mae.

1 Gawˇliˬtu 8:3 Σταυροειδείς Αναφορές

1 Sahˬpaˬ 3:3

Sawˇlaˬmoˬ-aˬ, Sahˬpaˬ Miˬyehˇ-ahˇ gaˬ-eu laꞈ kʼoeˇ, aˬ yawꞈ aˬ da Daˬbiˇ neh mehˬ nehˬ tsoˆ nehˬ yaꞈ-euˬ loꞈ-ehˇ dehꞈ-euˬ meh. Ehˇ kʼawꞈ, aˬ yawꞈ-euˬ gʼawˇ mawˇ kʼawꞈ, jeˬ zaˬ gʼawˬ mya mawˇ sehꞈ-awˇ, jawˇ duˬ gʼawˬ mya tsahˇ laꞈ kʼoeˇ lawˇ-eu shehˇ-eu jeˬ mˇ-euˬ meh.

Jaceuq 1:6

Yaw tsaˬyaw dawˇ deuˬ-euˬgaˇma, SahˬpaˬMiˬyehˇ haw piˇtehꞈ-a. Maˬdawˇ-eu deuˬ-euˬ gaˇma-aˬ, luˬ-iˇ seˇ-iˇ gaˇ keuˆ tehꞈ-a.

Jaceuq 17:3

Ngaˬ-euˬnui ma nawˇlawˬhaw sheˇ. Uˬciꞈngaˇjawˇgaˇoe haw sheˇ. ngaˬ-ahˇnawˇpyehˆtseˇduˬhaw sheˇ. Yaw haiˬjeˬ mˇmawꞈ-eu nui ma, maˬahˇ-eu nawˇ siˬduˬtehꞈ-a. Dawˬdoeˇngehˬ-eu tmˇ-eu gʼaˇduˬ, ngaˬ-euˬ kʼaˬmeh-ahˇngaˇmaˬzmˬ.

Doˆ-iˇ 33:12

Sahˬpaˬ Miˬyehˇ-ahˇ Moˇseˬ ehˇ nehˬ-eu, “Tsawˇ haˬ heu deuˬ-ahˇ miˇ kʼahˬ kʼoeˇ kʼahˬ-ahˇ sheuˬ gʼeh-awˬ lehˇ, nawˇ ngaˬ-ahˇ kʼehˇ-eu meh. Ehˇ kʼawꞈ, ngaˬ nehˬ-ehˇ aˬ suˇ gʼaˬ bi le-eu gaˇ kawˆ nawˇ maˬ ehˇ-a. Nawˇ ngaˬ-ahˇ yaw muiˬ paˬ-ehˇ siˬ nya-awˇ, nui ma tsaˬ-eu ma lehˇ ehˇ taˬ-euˬ meh.

Doˆ-iˇ 33:17

Moˇseˬ-ahˇ Sahˬpaˬ Miˬyehˇ ehˇ nehˬ-eu, “Nawˇ ngaˬ-ahˇ kʼaˇ shaˇ-eu loꞈ-ehˇ ngaˇ mˇ ma. Aˬ jeˬ miˇ neh ehˇ naˇ, nawˬ-ahˇ ngaˇ yaw muiˬ paˬ-ehˇ siˬ nya-awˇ, nui ma tsaˬ-eu ma.”

Yeˬlaˬmiˇ 1:5

“Nawˬ ma-euˬ uˬ maˆ laꞈ kʼoeˇ nawˇ maˬ tsehˆ leˇ mi naˆ-ehˇ nawˬ-ahˇ ngaˇ siˬ nya-awˇ, nawˇ maˬ dehꞈ doˆ le mi naˆ-ehˇ, miˇ kʼahˬ tsawˇ jeuˬ dawˬ tawˆ luꞈ-ahˇ, ngaˬ-euˬ gʼaˇ duˬ bi ngehˬ dah-eu gʼaˇ duˬ, nawˬ-ahˇ ngaˇ tseˇ doˆ taˬ-euˬ ma.”

Aˬmoˆ 3:2

“Miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ laꞈ kʼoeˇ, naw maꞈ-ahˇ tehꞈ-ehˇ ngaˇ myaˆ pyawˬ pyuˇ-awˇ ngehˬ gʼeh nehˬ-euˬ ma. Kʼoeˇ miˇ neh naw maꞈ iˬ baˇ mˇ ngeh ngaˬ-euˬ nui ma-ahˇ zaw dui dui laˇ-awˇ, kʼoeˇ loꞈ-ehˇ iˬ baˇ mˇ-euˬ aˇ poeˬ naw maꞈ-ahˇ ngaˇ ya kʼehˬ nehˬ meh.”

Naˬhmˬ 1:7

Sahˬpaˬ Miˬyehˇ muiˬ dui dui meh. shaˬ zahˬ naꞈ-eu aˇ yamˬ laꞈ kʼoeˇ, yawꞈ-euˬ tsawˇ haˬ-ahˇ haw piˇ-awˇ, yawꞈ-ahˇ tahˬ shaˇ leˇ-eu deuˬ-ahˇ, bo saˆ ngehˬ gʼeh dah teˬ-eu meh.

Maꞈtehˬ 7:23

Kʼoeˇ ngeh, ‘Naw maꞈ-ahˇ ngaˇ maˬ siˬ. Miˬyehˇ nui ma maˬ tsaˬ-eu jeˬ mˇ-euˬ tsawˇ haˬ deuˬ-oˇ, ngaˇ maˬ mawˇ gaˇ iˇ byoˆ-awˬ’ lehˇ, aˬ yawꞈ maꞈ-ahˇ ngaˇ ehˇ nehˬ ma.

Yoˇhaˬ 10:14

Ngaˇ-aˬ, muiˬ-eu yawˇ bo-eu yaw sahˇ ma. Aˬda ngaˬ-ahˇ siˬ nya-awˇ, ngaˇ kʼawꞈ Aˬda-ahˇ siˬ nya gaˇ duˇ ni, ngaˬ-euˬ yawˇ deuˬ-ahˇ ngaˇ siˬ nya-awˇ, ngaˬ-euˬ yawˇ deuˬ kʼawꞈ ngaˬ-ahˇ siˬ nya-eu meh. Aˬ yawꞈ maꞈ gʼaˇ duˬ ngaˇ shiˇ dah peuˬ-eu ma.

Yoˇhaˬ 21:17

Yeˬsuˇ aˬ yawꞈ-ahˇ smˬ poˆ tiˬ poˆ paˇ naˇ haˬ-eu, “Yoˇhaˬ-euˬ aˬ li Siˇmoˬ-oˇ, nawˇ ngaˬ-ahˇ gaˬ ma loˇ.” “Nawˇ ngaˬ-ahˇ gaˬ ma loˇ” lehˇ Yeˬsuˇ aˬ yawꞈ-ahˇ smˬ poˆ naˇ haˬ keuˆ laꞈ-euˬ miˇ neh, Beˬtuˆluˆ nui ma maˬ saˇ-ehˇ, heu loꞈ-ehˇ ehˇ kʼoꞈ nehˬ-euˬ meh. “Sahˬpaˬ-oˇ, nawˇ yawˬ jeˬ na luꞈ siˬ nya meh. Ngaˇ nawˬ-ahˇ aˇ naˆ ni gaˬ-eu nawˇ siˬ nya meh.” Yeˬsuˇ aˬ yawꞈ-ahˇ ehˇ nehˬ-eu, “Ngaˬ-euˬ yawˇ deuˬ-ahˇ bo saˆ-awˬ.

Lormav 11:2

Aˇ dahˬ beh ngeh neh aˬ yawꞈ neh tseˇ doˆ taˬ-euˬ tsawˇ jeuˬ-ahˇ aˬ yawꞈ maˬ byehˇ dzeh-a. Eˇliˇyaˆ neh Iˇsaˬleˬlaˇ tsawˇ haˬ deuˬ-euˬ yaw lehˬ Miˬyehˇ-ahˇ ehˇ nehˬ-euˬ gaˇ kawˆ Jaˇliꞈ laꞈ kʼoeˇ heu loꞈ-ehˇ boꞈ taˬ-euˬ naw maꞈ siˬ nya meh.

1 Gawˇliˬtu 13:12

Nymˬ-mˇ aˬ dui ya mawˇ luꞈ-eu heu-aˬ, pyawˬ haw-ahˇ haw-eu loꞈ-ehˇ duˇ-awˇ, maˬ mawˇ shawˇ laˇ-a. Aˇ yamˬ kʼoeˇ keuˆ le ngeh, myaˆ pyawˬ ciˬ daˬ-awˇ ya mawˇ duˬ tehꞈ-a. Nymˬ-mˇ ngaˇ siˬ nya-eu heu-aˬ, maˬ byah maˬ loꞈ-a siˬ. Ehˇ kʼawꞈ, aˇ yamˬ kʼoeˇ keuˆ le ngeh, byah laˇ loꞈ laˇ tehꞈ-a. Miˬyehˇ ngaˬ-ahˇ tiˬ byah tiˬ loꞈ siˬ nya-eu loꞈ-ehˇ byah laˇ loꞈ laˇ tehꞈ-a.

1 Gawˇliˬtu 2:9

Ehˇ kʼawꞈ, Jaˇliꞈ laꞈ kʼoeˇ heu loꞈ-ehˇ ehˇ taˬ-euˬ jaˆ-eu meh. “Myaˆ nuiˆ maˬ mawˇ haw-ehˇ, naˬ bawˇ maˬ gaˬ haw-euˬ, maˬ noeˬ doˆ coeˇ-eu jeˬ, Miˬyehˇ-ahˇ gaˬ-euˬ deuˬ gʼaˇ duˬ, Miˬyehˇ lehˬ hmˬ laˆ saˆ-euˬ meh.”

Gaˬlaˬtiˆ 4:9

Nymˬ-mˇ poˆ jawˇ-aˬ, naw maꞈ Miˬyehˇ-ahˇ siˬ nya laˇ-euˬ meh. Maˬ ngeuˇ naˇ, Miˬyehˇ naw maꞈ-ahˇ siˬ nya-euˬ meh lehˇ kʼawꞈ ehˇ-awˬ. Gʼaˬ baˬ dui dui-awˇ tiˬ jeˬ-iˬ maˬ jahˇ nya-eu yaw sahˇ kʼoeˇ deuˬ jawˇ paw naw maꞈ aˬ joˆ-ehˇ paˇ gʼoꞈ pyawˇ-iˇ mawꞈ-eu nya. Aˬ jeˬ miˇ neh aˬ yawꞈ maꞈ-euˬ zaˬ kʼaˆ paˇ geuꞈ poˆ mawꞈ-eu nya.

2 Tiˆmoˇseˬ 2:19

Ehˇ kʼawꞈ, Miˬyehˇ neh dawˬ pehˬ ziꞈ dah ni gawˬ taˬ-euˬ jeˬ-ahˇ aˬ yawꞈ maꞈ maˬ laˆ luˆ nya-a. Dawˬ pehˬ kʼoeˇ-euˬ kʼoeˇ taˆ, “Yawˬ ha-euˬ tsawˇ haˬ deuˬ-ahˇ Sahˬpaˬ Miˬyehˇ siˬ nya meh” lehˇ boꞈ taˬ-awˇ, “Sahˬpaˬ Miˬyehˇ-euˬ tsawˇ haˬ ma lehˇ kʼaˇ ehˇ-eu deuˬ maˬ tsaˬ maˬ dawˇ-eu jeˬ maˬ mˇ ni ya byehˇ dzeh meh” lehˇ boꞈ taˬ-euˬ meh.

Yaˬkoˆ 1:12

Lawˬ haw-eu jeˬ-ahˇ ya daˬ ngeh saˇ jaˇ ziꞈ-eu tsawˇ haˬ guiˬ lahˬ huiˬ-eu meh. Aˬ jeˬ miˇ neh ehˇ naˇ, lawˬ haw-eu jeˬ-ahˇ aˬ yawꞈ daˬ dzeuˇ oˇ dzeuˇ gʼaˬ ngeh jawˇ, Miˬyehˇ-ahˇ gaˬ-eu tsawˇ haˬ deuˬ gʼaˇ duˬ Miˬyehˇ neh lehˬ hmˬ taˬ-euˬ dehꞈ-eu jeˬ-euˬ shuiˇ uˬ kʼoˆ laꞈ sawˬ za tehꞈ-a.

Yaˬkoˆ 2:5

Ngaˇ gaˬ-euˬ aˬ yuiꞈ aˬ nyiˇ Ka li zaˬ deuˬ-oˇ, ngaˇ ehˇ gaˇ naˇ haˬ sheˇ. Jah-eu jeˬ laꞈ kʼoeˇ smˇ muiˬ muiˬ-eu tsawˇ haˬ pyeuꞈ laˇ-awˇ, Miˬyehˇ-ahˇ gaˬ-eu tsawˇ haˬ deuˬ-ahˇ biꞈ-eu gʼaˇ duˬ aˬ yawꞈ neh saˇ jaˇ dzaˬ taˬ-euˬ miˇ kʼahˬ-ahˇ bi uˇ leˇ-eu lehˇ, miˇ tsaˬ heu kʼoeˇ taˆ dehꞈ luꞈ-eu shaˬ-eu zahˬ-eu tsawˇ haˬ deuˬ-ahˇ Miˬyehˇ neh tseˇ doˆ taˬ-euˬ meh.

1 Beˬtuˆluˆ 1:8

Aˬ yawꞈ-ahˇ naw maꞈ maˬ mawˇ haw-euˬ kʼawꞈ, naw maꞈ aˬ yawꞈ-ahˇ gaˬ-awˇ, nymˬ-mˇ aˬ yawꞈ-ahˇ naw maꞈ maˬ ya mawˇ kʼawꞈ, naw maꞈ aˬ yawꞈ-ahˇ jah-eu meh. Kʼoeˇ miˇ neh, maˬ ehˇ jiˇ coeˇ gaˇ keuˆ ni laˬ kʼaˬ cehˇ-awˬ.

1 Yoˇhaˬ 4:19

Miˬyehˇ aˬ dui-ahˇ jeˬ hu gaˬ-euˬ miˇ neh, aˬ dui aˬ yawꞈ-ahˇ gaˬ-awˇ, tiˬ gʼaˬ tiˇ gʼaˬ gaˬ-eu ma.

1 Yoˇhaˬ 4:7

Ngaˇ gaˬ dui dui-eu cawˬ deuˬ-oˇ, aˬ dui tiˬ gʼaˬ tiˇ gʼaˬ gaˬ kaˇ-euˇ. Aˬ jeˬ miˇ neh ehˇ naˇ, gʼoeˇ-eu gaˬ-eu jeˬ-aˬ, Miˬyehˇ jawˇ gaˇ neh doˆ le-euˬ meh. Gʼoeˇ-eu gaˬ-eu jeˬ kʼaˇ ahˇ-eu tsawˇ haˬ-aˬ, Miˬyehˇ-euˬ zaˬ pyeuꞈ-awˇ, Miˬyehˇ-ahˇ siˬ nya-eu meh.

Panmaeq 2:13

Nawˇ aˬ gaˇ jawˇ-eu ngaˇ siˬ nya ma. Nehꞈ Saˬdaˬ-euˬ dzoeˬ dzaˬ nuiˇ mahˬ jaˆ gaˇ nawˇ jawˇ-eu meh. Nawˇ ngaˬ-ahˇ saˇ jaˇ ziꞈ-eu meh. Saˇ jaˇ ziꞈ-eu ngaˬ-euˬ gaˇ kawˆ saˇ kiˇ kamˬ-eu gʼaˬ pyeuꞈ-eu Aˬdiˇpaˆ-ahˇ nehꞈ Saˬdaˬ jawˇ gaˇ sehꞈ ngeh kʼawꞈ, ngaˬ-ahˇ jah-eu jeˬ-ahˇ nawˇ maˬ byehˇ dzeh-aˬ.

Panmaeq 2:19

Nawˇ mˇ luꞈ-eu jeˬ ngaˇ siˬ nya ma. Nawˬ-euˬ gʼoeˇ-eu gaˬ-eu jeˬ, nawˬ-euˬ saˇ jaˇ ziꞈ-eu jeˬ, nawˬ neh Miˬyehˇ-euˬ gaˇ mˇ-euˬ jeˬ hawˇ-eu, nawˬ neh oˇ dzeuˇ-euˬ jeˬ-ahˇ ngaˇ siˬ nya ma. Yaw beh naˆ maˬ tseˇ nymˬ-mˇ nawˇ mˇ luꞈ shaˇ luꞈ-eu gaˇ kawˆ ngaˇ siˬ nya ma.

Panmaeq 2:9

Nawˇ aˇ naˆ ni shaˬ zahˬ mˇ luꞈ-eu gaˇ kawˆ hawˇ-eu, aˇ naˆ ni iˇ shaˬ shaˬ-eu gaˇ kawˆ ngaˇ siˬ nya ma. Ehˇ kʼawꞈ, maˇ maˇ ni ehˇ leꞈ naˇ, nawˇ smˇ muiˬ muiˬ-eu meh. Yuˇdaˆ tsawˇ haˬ maˬ ngeuˇ gaˇ yawˬ haˇ yawˬ ha ngeuˇ ma lehˇ ehˇ-eu tsawˇ haˬ kʼoeˇ deuˬ neh nawˬ-ahˇ aˇ naˆ ni ja bu ja doeˇ-euˬ gaˇ kawˆ ngaˇ siˬ nya ma. Aˬ yawꞈ maꞈ-aˬ, nehꞈ Saˬdaˬ-ahˇ taꞈ-eu aˇ muˇ tiˬ muˇ meh.