Sofonías 1 - Be'nnka'be Xti'll Dios

Llan gaklla Xanllon

¹ Di'll nin bzene Diozen Sofoníazen, lla ka' bnebia Josíazen, xhi'nn Amón, bnebie'e gan nzi Judá. Sofonías guke xhi'nn Cusí, na be'nn ni guke xhi'nn Guedalías, be'nn ni guke xhi'nn Amarías na be'nn ni guke xhi'nn Ezequías.

² Kin ba bnee Xanllon: Wachochj walana dukenaken yoyte da sjade raw yell-li'on.

³ Wlleyia be'nn nach, na rente bayix ka', wlleyia ba ka' zajzu xhire, na rente ba ka' zajlla lo nis, guna ke wxinj be'nn wednay ka', na walana be'nn nach ka' raw yell-li'on. Kan ba bdixjwe Xanllon:

⁴ Konen taka ki wlleyia'a yell ke Judán, na rente yoyte be'nn ka' sjalla Jerusalén. Walana latj'ni yoyte dan nao ake' llwerao aken, loe lsaken nzi Baal, na rente yoyte bxus ke ake' kaꞌ.

⁵ Wlleyia'a be'nn ka' llep yichjo na lloeraw ake' berj ka' sjallia le yeban, na llayull'na llchekwte xhib ake' llwerao ake' nada', na lloeraw akte loe lsaken nzi Milcom.

⁶ Leskakse wlleyia'a be'nn ka' llsanlall nadan, be'nn ka' bi llayirj nada' na nike lled akze wnab akre nada' cha de dazed ke ake'.

⁷ Lliteze lese raw Xanllon, le lla ke Xanllon ba zen gawchochze. Le Xanllon ba benchawe'e to latj ga wsakzie'e, na ba bayune'e xhirall be'nn ka' ba benee yexhen.

⁸ Ke llan gak yel korchisen wsakzia be'nn braw ka', kan ba bnee Xanllon, na yoyte xhi'nn be'nn wnebian, na yoyte be'nn ka' naw llun da mar, na be'nn ka' bi nxenlall nada'.

⁹ Lezkakse ke lla'na wsakzia be'nn wan ka' xhit kullre reij yo' ka', na konen da ka' ba jalan aken, na ren da ka' ba jaxiye aken, ba bazlla ake' lo yo' ke xan aken.

¹⁰ Kin bnee Xanllon: Lla'na yenere gusia ake' na wnab ake' gukre, surawzen gan zu reij ke belya ka', na gusia be'nn ka' sajlla raw wllope reijen, na gak llakia kwis, to sill keten yinj le ya' ka'.

¹¹ Le koell yiach, re' lla're barr gan nzi Mortero, le yeololte be'nn ka' lla'w, na llot kweyi ake', na yeololte be'nn ka' llcha ake' mell, kweyi ake'.

¹² Ke lla'na nada' wia'a yichj raxhdao be'nn Jerusalén ka'. Wsakzia be'nn ka' zajzu nbaraz ke to zu ke uva da ba guk scha llicha'o, na toraz akteze lle kwin ake': Xanllon bitbi gune, ni dawen ni da mar.

¹³ Kelen'na, yoyte da sjade ke ake' kwan aken, na yo' ke ake' ka' wayinjen, gunchaw ake' yo' rill ake', axha bi su aken, wayaz ake' yay uvas, na bi yaj ake' zu ke uvan.

¹⁴ Gawchochze baze lla xhen ke Xanllon. Baze'e gawchoch, bazadoe'e rres. To llichnieraz gak lla ke Xanllon: Xte rente be'nn war ka' koell ake', na gusia ake'.

¹⁵ Gaken to lla da llruk, to lla da walleyraw, na da wzoayiach, to lla da watach walan, to lla kwe da xchul gasj wi kwis, to lla kwe bej gasj xchulwi,

¹⁶ gak to lla ket koell trompet ka', na gusia ake' konen yell ka' nechj ze war ka', na wdup tonn xhen ka' sjallia chkwia.

¹⁷ Ne Xanllon: Wzoa be'nn ki dazed, ta'a ake' kaꞌ be'nn lchul, le ben ake' daxhinj konen nada'. Na xchen aken llirjen ke yu bichte, na xper aken soyan, ka' zuya' xche bayixe.

¹⁸ Katen llin llan wluken Xanllon, ni ya cha'on nzi oro ni yan nzi plat ke ake' ka' bi gak wazran le ake', le kone yel llaklla ke Xanllon, wzeye'e doxhente latj yell-li'on. Yoyte be'nn ka' lla'a yell-li'on kweyi ake' to sete.