RUD 1 - Tupuri Bible

Gaali maga daʼ jar ni Elimeleg wo mono

¹ Ti wur maga jar car kiidan hay wo wãã wããre sir Israyel mono, koŋne raw leʼge go ɓi sir Israyele. Wer seno, bloo po ma Betlehem ti ɓaŋ Juda, kal wo pudgi de jar ni ɓe, wãy ɓe, de weere ɓe ma ɓogn wo no. Á pud wo mokay la wo wo lagge ti prog po ni jar Mohab wo.

² À ɗe bloo sen ga Elimeleg, ɗúu wãy ɓen ga Nawmi. À ɗe weere ɓe ma ɓogn wo ga Mahlon wo de Kilyon. Á wo ti moobe ma Efrata ma Betlehem ti ɓaŋ Juda no. De maga saara wo ni jar Mohab wo ni mono,

³ Elimeleg raw huugi go. Nawmi raw gwaʼge go de weere ɓe ma ɓog wo no.

⁴ Weeren la raw wo da mayre mani jar Mohab wo wo ni. Ma po boŋ à ɗe sen ga Orpa, à ɗe ma lan ga Rudi.

⁵ Kiŋgi wo maŋge blam sen hwal boŋ mono, Mahlon huu wo go de Kilyon ɓog ɓuy lay. Nawmi raw gwaʼge go boŋ, warn gà lay, weeren wo gà lay.

Rud wo kaŋ kaa ɓe Nawmi Betlehem

⁶ Le ɓi sir ni jar Mohab wo ni mono, Nawmi raw laage ga Manwur fer we ko de el jar ɓen wo no, werga á fer wo we daɗ rege. Doo sen no mono, á raw baa jag fẽẽre ɓe ma ferge ɓi sir Juda de kaare ɓen wo no.

⁷ Á kal wo mbaara rawge ɓuy, ama wo dayge ti faage mono,

⁸ Nawmi wii kaare ɓen wo ga : Fer we mbay ni ɓay patala so, wosela yoo ɓay mo see mbe ni man ɓe so. Daga Manwur mo joŋ ɓil de el see ɓay doo maga nday hay joŋ see jar húulín wo no lay no, mo joŋn see ɓi lay.

⁹ Daga á mo hã war ne wosela yoo ɓay ma hayge liŋ ni ɓe de fruygi. Blam ɓe á raw klew kaare ɓen wo, ma joŋ gwaʼ so ne hara. Á raw wo duʼ roo ne hẽn ti geɗ geɗe,

¹⁰ day wiin wo ga : Bay wa wùr wo kaŋ moge ɓi sir ɓo.

¹¹ Nawmi fer dog rage tigriŋ pa ga : Fer we mbay ni ɓay mayre ɓi wo. Nday maŋ blam ɓi ma sen diŋ wer may pa? Ndi mbi nà de weere ɓil ma kolge werpiiri ɓay ɗa pa?

¹² Fer we mayre ɓi wo. See we. Ko we ɗa, ndi go mo deŋ patala de rawge de tããbe debaŋ, bay ma da war ma tigriŋ wa so. De sen ɓuy, ndi mo wãã baa ga ndi de kaŋ ɗiggi ɓi taʼ ga ndi daʼ war yaŋ suŋ la, day ni ndi daʼ weere yaŋ, nday gor yaŋ ga weere sen la mo gẽẽ wo go ɗa?

¹³ Nday wãã ge yaŋ ga nday da werpiiri ma tigriŋ gà? Bay wa mayre ɓi wo werga Manwur joŋ diŋ ndi, hoɓre joŋ me go see ɓay kluu debaŋ.

¹⁴ Kaare ɓen fer wo duʼ roo ne hẽn ti geɗ geɗ tigriŋ pa. Orpa kal klew kaa ɓe raw joŋ gwaʼ so ne hẽne. Ama Rud gwaʼ mbe de tõõ kaa ɓe kaʼa.

¹⁵ Nawmi raw wii Rud ga : Koɗa, mangẽẽne ɓo raw we ni jar ni ɓaara wo, see baa mani ɓaaran wo no, joŋ doosen no lay.

¹⁶ Rud raw fer wããre ne kaa ɓe gana : srog wer ɓi srogge ma woge hayge ni ɓi wa. Ngel maga ndo wo ni mono, ndi wo ni lay, ngel maga ndo wo hayge ni mono, ndi wo hayge ni lay. Jar ni ɓon joŋ ge wo yaŋ diŋ jar ni ɓi lay, Baa mani ɓon joŋ ge yaŋ diŋ Baa mani ɓin lay.

¹⁷ Ngel maga ndo huu ni mono, ndi huu gi nà ni lay day à tee ge me wo nà ni lay. Daga Manwur mo joŋ mbe bon ɓi go krus doo ga se da nono, hayga caa ɓil naa we go de kẽẽ diŋ húulí gà no.

¹⁸ De maga Nawmi wo koge ga Rud go de kaŋ ɗiggi diŋ ma rawge wer se mono, á kal mbe menge ɓe rawge so.

¹⁹ Á kal wo rawge de kããra ɓuy, hãã wo wo Betlehem. De maga á wo wo laage ɓi leege Betlehem so mono, ɓi leegen ɓuy wo go de lawge de klew doo ti wer ɓaara. Day naare wãɗ so gana : Á nà diŋ Nawmi mbe?

²⁰ Nawmi kal wii rage ga : Ɗe we ndi ga Nawmi wa so jar ɓi, ɗe we ndi ga Mara, werga Baa ma de Egre ɓuyn ɓoʼ me nen gaali debaŋ.

²¹ Ndi hay raw wo see ɓay la de hul doo, day Manwur fer me le doo koɗe. Diŋ wersen ga ɗe we ndi ga Nawmi wa so, werga Manwur ma de Egre Ɓuyn ngiɗ nen de ɓi, hãã kol joŋ bon ɓi.

²² Nawmi fer wo le de kaa ɓe Rud may jar Mohabn nà diŋ doo kay no so no, de maga á hay wo le ɓi sir Mohab mono. Á nduu wo Betlehem diŋ de wur maga à de tĩĩ wer we coore ble liŋ mono.