OSE 4 - Tupuri Bible

Baa caa kiida ne jar ɓen wo ti

¹ Coʼ we sug wããre Manwuri, jar ni Israyel wo! Werga Manwur yaŋ de kiida ma caage ti jar sirn wo, Doo ga joŋre ma de deele bay wa so Seele wer jag liŋgi bay wa so Koge Baa bay ɓi sirn ni wa so lay.

² Gwaʼ diŋ haɗge ti geteʼ wo go de bagge bii kããra Diŋ ngaɗge kããra, freŋ wo de figliw À joŋ diŋ joŋre ma girgiri, À id diŋ kããra mbe doo sen cab cab deŋ koɗe.

³ Diŋ wersen so, sirn leʼ ge go nen lawge Jar maga wo ɓil sirn ni mo ɓuy taw ge wo go Day horog ma mbásga taw ge wo go wer ɓaara ni lay, Day weere dweere ma ciŋ taw ge wo go wer ɓaara ni Ko hayba diŋ cẽẽ ma nen maarog yeɗ ge wo nen go.

Jar siɗ jagn joŋ wo ni naŋ gà

⁴ Ama, reen bay diŋ see jar ma ɓuyn wa, Jar ɓuy bay wo ma ruugi wa, Werga kiidan diŋ ti holaŋ wùr de jar siɗ jagn wo no.

⁵ Ndo maʼ ge ɓaale diŋ de cege Je ndar nen wããren maʼ ge ɓaale wo go wer ɓo de suŋ ni lay Day ndi joŋ ge yaŋ ga man ɓo mo huu go

⁶ Jar ɓin huu wo go Diŋ wer maga á bay wo de koge wa, Diŋ wer maga ndo bay da koge wa mono, Ndi srog ge ndo go ti ngel siɗ jag ɓi no. Doo maga ndo yõõ ti go ti jag liŋgi Baa ɓon so mono, Ndi de see ɓi doosen no lay ndi yõõ ge Ti go ti jar ni ɓo wo.

⁷ De maga á dus wo wo ciŋ pel ni mono, Saara dus joŋ ɓlaggen wo ciŋ ni lay Ndi coo ge togoɗge ɓaaran yaŋ go de sõõre.

⁸ Á wo de goɓge de ɓlagge jar ɓin wo no Day srog wo wer ɓaara joŋ te ɓlagge ma ɓaaran wo lay.

⁹ Á joŋ ge see je siɗ jagn doo jar ma ɓuyn wo no lay Ndi yiŋn gi yaŋ wer seele ɓe no, Ndi poɗn ge yaŋ diŋ wer joŋre ɓe no.

¹⁰ Á re ge wo yaŋ day saara wuɗ gà Á joŋ ge wo figliw yaŋ, day tes wo gà Diŋ wer maga á men wo horge sug ti Manwur go,

¹¹ Laa wo go joŋ figliw ga tiʼ i, laa wo go wer yii. Doo kay nono, yii ma defayn fĩɗ ti ɓaara go

¹² Jar ɓin ndal wo de koore ɓaaran wo no, Day, wãã wããre ne hẽn diŋ graw ma doo ɓe no. Werga ɗiggi joŋge figliw wel jar go, Day á wo de joŋ figliw go hãã see Baa ɓaara no.

¹³ Á joŋ wo siɗ jag ti tipẽẽge húulì wo Á roɗ wo fẽẽre fõõre no aŋsaŋs ciŋ ti húulì ma lablab wo Wer koo Cene, wer koo pepliye wo de Terebẽte, Maga nencee ɓe de cõõre lay! Diŋ wersen ga mayre ɓayn joŋ ge wo go bordele Day naare weere ɓayn joŋ ge doo de figliw

¹⁴ Ndi joŋ ge bay diŋ bon mayre ɓayn wo wa Diŋ wer maga á wo bordel gà Ko hayba see naare weere ɓay ma de wooren wo Diŋ wer maga á joŋ wo figliw gà Werga á wo de see ɓaara wo go de celge de bordel wo Day joŋ wo siɗgi jag de naare bordel wo Jar maga bay wo laa wer mopo wa has Wo go de woge taw see ɓaara.

¹⁵ O Israyele, hayga ndo ɓoʼ see ɓo we go ti bordel no, Daga Juda mo kol see ɓe go de ɓlagge wa Wo we Gilgal wa, Joŋ we nen woge Bet-Afen De haʼge jag ga : Manwur yaŋ mbe tenen caw wa!

¹⁶ Werga Israyel raw mbeʼ mbeʼ Doo mandày ma mbeʼ mbeʼ debaŋ, Ga day yãã jug soole ɓe gà mono. Patala Manwur joŋ yaŋ nen koɗge ɓe Doo maga à koɗ wesam ɓi ful nono

¹⁷ Efrayim tay see ɓe de sõõre wo : Men ne!

¹⁸ Á men joge yii go no kay tuu mono, Yaʼ wo nà diŋ jag Bordeln tuu Waŋre ɓaaran wo go de bagge de sõõre

¹⁹ Leege kuu ra graŋ ɓe Day sõõre joŋ ge ra yaŋ de siɗgi jag ɓaaran wo no.