WÃÃRE MA DE CÕÕRE MAGA LUG YER NE MONO 3 - Tupuri Bible

Siigi wããre mani Jaŋ ma joŋ batem jar no

¹ Nen kiŋgi ma de hwal ti dwee maga Tiber Sesar diŋ waŋ ma kluu ɓuy no, Poŋse Pilad diŋ waŋ ma Jude, Herod diŋ waŋ Galile, hẽn ɓe Filip diŋ waŋ sir Iture wo de Trakonid, Lisaniyas diŋ waŋ Abilen.

² Ane wo de Kayf wo diŋ waŋre ma siɗ jag, Baa raw hã wããre ɓen ne Jaŋ je ni Sakarin jag ti puuli.

³ Jaŋ raw tĩĩ wer raŋ progre ma ti jeŋ Jurdẽẽ wo ɓuy. Á hay go sii wããre ti batem ɓodge jag no, maga jar mo daʼ wo fuggi ɓil ti ɓlagge ɓaaran wo.

⁴ Doo wããre maga Esay yer go ɓi kefder ɓen nono ga : Je tabay yaŋ le ʼwaa ɓay ɓil puuli ga : Kneʼ blam faage Waŋkluun go, Raɗ faage ma kleeren wo go ne hẽn de deele ɗeger ɗegere.

⁵ Reb porn wo go ɓuy, mbug húulìn ma de gẽẽre de ma lab lab wo go gesiŋ ɓuy, Ɗob faage ma de dĩɗgin wo go ɓuy de deele ɗeger ɗegere, Kneʼ faage ma de ɓlaggen wo go ɓuy de el de ele.

⁶ Blam sen ni jar ɓuy ko yaŋ ga Baa yãã naa go no kay. Re sen raw leʼ ge go ti jag ɓe so.

⁷ Jar debaŋ raw wo age se Jaŋ ga á mo joŋ batem saara go. Jaŋ raw riŋ rage ga : Nday weere cwen wo no, wose riŋ we ga nday daŋ bon maga Baa joŋ we ge de ɓe yaŋ go la?

⁸ Joŋ we joŋre maga jar mo ko see ɓe ga nday coo ɗiggi ɓay ma de ɓlaggen we de deele tigriŋ, wãɗ we de ɓil ɓay diŋ ga Abraham diŋ pan ɓay nà ẽẽ la wa, ndi riŋ nday ga Baa de kããge ma kol weere ne Abraham de húulì ma lag wo no.

⁹ Á yaŋ go de kneʼ klaɓn patala ma car kooren wo go ti kããge ɓaara taʼ taʼa. Wersen koore maga bay wo leʼ ge de el wa, á car rage go, á lag rage go ti wùu.

¹⁰ Jar ngaɓa raw wo riŋ gi ɓe ga : Day wùr mo joŋ joŋ ge la?

¹¹ Á raw fer wããre ne hara ga : Je maga yaŋ de õõbe doo ɓog, mo hã go boŋ ne je maga ɓe bay wa mono. Je maga yaŋ de fen rege doo mo ɓes wo de je maga ɓe bay wa mo lay.

¹² Jar tar se raw wo age see ɓe ga á mo joŋ batem saara lay. Saara raw ɗe Jaŋ ga : Waŋ, wùr mo joŋ diŋ may lay la?

¹³ Á raw riŋ rage ga : Yãɗ we de daŋ maga á go de ngaɓ ge mo wa.

¹⁴ Soode po raw wo wii gi ɓe lay ga : Wùr mo joŋ may lay la? Á raw riŋ rage ga : Yãã we solay ma jobo de waŋ noga de caa ge wããre ne hẽn se wa hase, yãɗ we diŋ solay maga à poɗ we de ɓe ti joŋre ɓayn wo mo tawa.

¹⁵ Jar maga hay wo de lagge ti wur sen gor a ge Mesi, raw wo ɗig gi de ɓil ɓaara ti Jaŋ ga á nà diŋ Mesi so layblaʼ la.

¹⁶ Jaŋ raw fer wããre ne hara ɓuy ga : Kidolgi ndi joŋ batem ɓay diŋ de bii, ama je ma de egre de daŋ mege yaŋ le a ge, ndi bay go nen maga ndi bud saale taarag ɓen go draʼ wa, je sen joŋ ge batem ɓay yaŋ diŋ de Nenterse ma bay ɗag de wùu.

¹⁷ Hãn faʼ ge ɓen yaŋ doo ɓe, á faʼ coore ɓen yaŋ go, laan go ɓi boole, ama ma hoolen á roɗ ge sen go nen wùu maga huu gà.

¹⁸ Jaŋ de siɗ Wããre ma de Cõõren go ne jar mo deŋ, á bag yaŋ ne jar ni wer sar sar debaŋ.

¹⁹ Blam sen Jaŋ raw ruu Herod waŋ ti maga á baa Herodiyad wãy hẽn ɓe Filip go wer ɓe, ruun ti ɓlagge maapo wo debaŋ pa.

²⁰ De sen ɓuy Herod raw joŋ ɓlagge ma de hãã tigriŋ pa, raw ɓoʼ Jaŋ ti daŋgay.

Jaŋ joŋ batem Yeso go de bii

²¹ De maga jar ɓuy hay wo go joŋ batem mono, á raw joŋ batem Yeso go lay. De maga Yeso hay tosge, jag ngel ma ciŋ raw go bulgi,

²² Nenterse ma bay ɗag raw sir gi le ne hẽn ti doo kurgudu nono. Gẽẽge po raw wãã re le ciŋ ga : Ndo diŋ wel dage ɓi no, ndo nen ɓi de el debaŋ.

Moore Yeso Kris wo

²³ Kiŋgi Yeso wo day ge doo swaʼa, á raw tĩĩ wer joŋre ɓe no, jar hay ɗig gi ti ɓe ga á diŋ wel ma Josef, Josef wel ma Heli,

²⁴ Heli wel ma Matat, Matat wel ma Lefi, Lefi wel ma Melki, Melki wel ma Janay, Janay wel ma Josef,

²⁵ Josef wel ma Matatiyas, Matatiyas wel ma Amos, Amos wel ma Nahum, Nahum wel ma Esli, Esli wel ma Naggay,

²⁶ Naggay wel ma Mat, Mat wel ma Matatiyas, Matatiyas wel ma Semayn, Semayn wel ma Joseg, Joseg wel ma Joda,

²⁷ Joda wel ma Jowanan, Jowanan wel ma Resa, Resa wel ma Sorobabel, Sorobabel wel ma Salatiyel, Salatiyel wel ma Neeri,

²⁸ Neeri wel ma Melki, Melki wel ma Adi, Adi wel ma Kosam, Kosam wel ma Elmadam, Elmadam wel ma Er,

²⁹ Er wel ma Yeso, Yeso wel ma Eliyeser, Eliyeser wel ma Jorim, Jorim wel ma Matat, Matat wel ma Lefi,

³⁰ Lefi wel ma Simeyoŋ, Simeyoŋ wel ma Juda, Juda wel ma Josef, Josef wel ma Jonam, Jonam wel ma Eliyakim,

³¹ Eliyakim wel ma Meleya, Meleya wel ma Mena, Mena wel ma Matata, Matata wel ma Natan, Natan wel ma Dafid,

³² Dafid wel ma Isayi, Isayi wel ma Obed, Obed wel ma Bos, Bos wel ma Sala, Sala wel ma Naasoŋ,

³³ Naasoŋ wel ma Aminadab, Aminadab wel ma Admiŋ, Admiŋ wel ma Arni, Arni wel ma Esrom, Esrom wel ma Faares, Faares wel ma Juda,

³⁴ Juda wel ma Jakob, Jakob wel ma Isag, Isag wel ma Abraham, Abraham wel ma Tara, Tara wel ma Nakor,

³⁵ Nakor wel ma Serug, Serug wel ma Ragaw, Ragaw wel ma Faleg, Faleg wel ma Eber, Eber wel ma Sala,

³⁶ Sala wel ma Kaynam, Kaynam wel ma Arfagsad, Arfagsad wel ma Sem, Sem wel ma Nowe, Nowe wel ma Lameg,

³⁷ Lameg wel ma Metusala, Metusala wel ma Enog, Enog wel ma Jared, Jared wel ma Malelel, Malelel wel ma Kaynan,

³⁸ Kaynan wel ma Enos, Enos wel ma Sed, Sed wel ma Adam, Adam wel ma Baa.