JOSUWE 1 - Tupuri Bible

Josuwe kol ti ngel Moyis pel jar Israyel wo

¹ Blam húulí Moyis wejõõ Manwur mono, Manwur kal wii Josuwe je ni Nun je kay Moyisn ga :

² Moyis wejõõ ɓin go de húulí, patala ur go ciŋ, cegaɗ we Jurdẽẽ mo tiʼ i go, nday de jar Israyel wo ɓuy ma laage ɓil sir maga ndi hãn go ne jar Israyel wo mono.

³ Ngel maga ɓaale ɓo kaŋ ge go ni mo ɓuy no, ndi hãn go we doo ga ndi hay wããn ne Moyis nono.

⁴ Haagu sir ɓayn maŋ ge jag le ti puulin hãã le go ti húulì Libaŋ hãã go ti Efrad maarog ma de pããge no, de sir mani jar Hitidn wo hãã leʼ go jag maarog ma kluu ma nen wur bolaw no.

⁵ Jobo oo ge pel ɓo ti wur maga ndo yaŋ tenen ɗa gà hase. Ndi yaŋ de ɓo doo maga ndi hay joŋ de Moyis no pa no. Ndi men ge ndo go gà lay, ndi tob ge ndo go gà lay.

⁶ Teŋ nen ɓo day ni ndo coɓ see ɓo, werga jar Israyel wo ge wo daʼ sir maga ndi hay haʼ go ne pããre ɓaara wo ga ndi hãn ne hara nà nen doo ɓo.

⁷ Ane teŋ nen ɓo day oo ngiŋ. Hoo sug ti jag liŋgi maga Moyis wejõõ ɓin hay yern mono, see ti ɓe. Cel go ti doo war wa lay, go ti doo gur wa lay nen maga ndo mo sii ti ti ngel maga ndo wo ge ni mo ɓuy no.

⁸ Kefder se ma de jag liŋgi ɓiln joŋ ge go see ɓo hãã gà. Ndo ɗig gi wer ɓe yaŋ de suŋ lay, de ceg lay. Ndo hoo ge sug yaŋ ti ɓe, ndo see ge yaŋ ti fen maga de yerge ɓil ɓe ni mo ɓuy no. Ni mokay so no, ndo ɓoʼ ge jag joŋre ɓon wo yaŋ go de ele, ndo sii gi ti yaŋ lay.

⁹ Ndi yaŋ de wii ndo ga teŋ nen ɓo day coɓ see ɓo. Daɗ wa, joŋ hẽẽne wa lay. Werga, Manwuri, Baa ɓon yaŋ de ɓo ti ngel maga ndo wo ge ni mo ɓuy no.

Jar Israyel grag wo go ma cegaɗ Jurdẽẽ

¹⁰ Josuwe kal wii jar kluuri soode ma yoo jar Israyeln wo ga :

¹¹ Raŋ we yoo ngaɓan go ɓuy, riŋ we ra ga : Bag we jag fẽẽre ɓayn wo go, gahãyla ti naw swaʼ mono, nday cegaɗ ge Jurdẽẽ go ma woge yãã sir maga Manwuri, Baa ɓayn hãn go we mono.

¹² Josuwe day wii jar ma ti ɓĩĩni mani Ruben wo, ma ti ɓĩĩni mani Gad wo de jar ma ti nus ɓĩĩni mani Manase wo gana :

¹³ Fer we ɗig ti ti fen maga Moyis wejõõ Manwurn hay wii we ti ɓe mono. A hay wii ga Manwur hã sir go we maga nday mo daʼ iggi.

¹⁴ Naare ɓay wo, weere ɓay wo de horog ɓay mo gwaʼ wo ɓil sir maga Moyis hãn we faale Jurdẽẽ ma nen wur botoŋ lam no. Ama nday jar durgin nday cegaɗ ge yaŋ go pel hẽẽre ɓayn wo ma kay rage.

¹⁵ Hãã wo go ti wur maga Manwur hã ngel iggi go ne hara doo nday no ɗa lay. De maga Manwuri, Baa ɓayn hã sir ma ɓaaran we go ne hara lay no, nday fer ge yaŋ le lagge ti tway ɓay maga diŋ sir ɓay maga Moyis wejõõ Manwur hay hãn we go faale Jurdẽẽ nen wur botoŋ lam no.

¹⁶ Saara kal ferge ne Josuwe gana : Wùr joŋ ge mbe fẽẽre maga ndo wii wùr ti ɓaara yaŋ ɓuy. Wùr wo ge yaŋ mbe ti ngel maga ndo riŋ ga wùr mo wo ni mo ɓuy no.

¹⁷ Wùr hoo ge sug yaŋ ti ɓo ti fẽẽren wo ɓuy doo ga wùr hay hoo sug ti Moyis no lay no. Ane daga Manwuri, Baa ɓon mo joŋ de ɓo doo ga se hay joŋ de Moyis no lay no.

¹⁸ Je maga cegaɗ ge jag ɓo we go, day hoo ge sug we ti wããre ɓo gà noga ti fen po maga ndo hã jag liŋgi ne wùr ti ɓe mo gà no, à ii gi je sen go. Ane teŋ nen ɓo, day oo ngiŋ.