JONAS 1 - Tupuri Bible

Manwur ɓoʼ Jonase, se ga se daŋ

¹ Manwur kal wãã wããre ne Jonas je ni Amitayn ga :

² Ur go ciŋ, see, ni ndo wo ɓi leege ma Ninife, ɓi leege ma kluu no, ni ndo ʼwaa war ne ne ti werga ɓlagge ɓen ɗii le go ciŋ see ɓi la hãã.

³ Day Jonas raw urgi ma daŋge ɓi leege ma Tarsis wo go hãã see Manwuri. Se raw woge ɓi leege ma Jafa, se kal daʼ daage ma kluu maga hay woge ɓi leege ma Tarsis ni. Se raw poɗge ɓe day raw ɗiigi de jar ma ɓil ɓen wo ma woge ɓi leege ma Tarsis wo go hãã see Manwuri.

Manwur kaŋ leege ne Jonas wo ti

⁴ Ane Manwur raw joŋge ga leege ma de egre mo fid ciŋ ti maarog ni, day leege ma kluun raw fidgi ciŋ ti maarogn ni. Daagen hay kos go mbaŋ ma leʼ bii.

⁵ Hẽẽne raw caa jar ma tuŋ daagen wo no, wosela ɓuy yoo ɓaara raw tos baa ɓe no, day saara raw laa fẽẽre ma ɓi daagen wo go nen maarog maga daagen mo kol go gofoŋ. Jonas raw ɗiigi wo ɓi daagen gesiŋ, kal suugi day taa naa plaŋ daŋ.

⁶ Waŋ jar tuŋ daagen raw yaʼge le see ɓe, day wiin gana : Ndo leʼ naa ma ɓon le la? Ur go ciŋ tos Baa ɓo no. Tiga Baa ma sen ɗig ti yaŋ ti naa maga naa mo bas go wa layblaʼ no.

⁷ Day saara raw wii kããra gana : Á we le, naa naa we wãywáale ma ko je maga a de gayre sen ne naa ti mono. Saara raw naa wãywáale day wãywáalen kal leʼge ne Jonas ti.

⁸ Saara raw wiigi ɓe gana : Naa wer je maga a de gayre ma sen ne naa ti ne wùr ɗala. Joŋre ɓo diŋ mayla, day ndo a le genla? Sir ɓo gen la, day ndo ti wer jar may la?

⁹ Se raw ferge ne hara ga : Ndi diŋ je Hebre day ndi joŋ hẽẽne doo Manwuri, Baa ma ciŋ maga joŋ maarog wo de tamsir mono.

¹⁰ Hẽẽne raw caa jar sen wo debaŋ day saara raw wiigi ɓe gana : Ndo hay joŋ sen diŋ mayla? Werga jar sen hay wo go de koge ga á hay ɗee mo nà ɗeege ma daŋge wo go hãã see Manwuri, wer maga a hay naa wer ɓe ne hara doosen nono.

¹¹ Saara raw wiigi ɓe gana : Wùr mo joŋ joŋge maga maarogn ham jag see wùr la? Werga maarogn hay yaʼ wer ur kaŋngaw ciŋ ni debaŋ debaŋ.

¹² Se raw ferge ne hara gana : Maŋ we ndi, ɓoʼ we ndi go nen maaroge, ni maarogn ham jag yaŋ see ɓay, werga ndi de koge ga hay jãã leege ma kluun le ne nday ti nà diŋ ndi.

¹³ Jar sen hay gay wo go doo tuŋ daagen maga saara mo day go ciŋ, ama se laa joŋge doo ɓaara gà wer maga maarogn hay yaʼ wer fidgi ciŋ see ɓaara tum.

¹⁴ Doosen saara raw tos Manwur ga : Manwuri, wùr tos mo, kaŋ húulí bloo ma deŋ ne wùr ti wa, kaŋ re cíi je maga bay de re ti wan ne wùr ti wa. Werga, ndo ɓon mono Manwuri, ndo joŋ diŋ fen maga ɓil ɓo da.

¹⁵ Blam ɓe saara raw maŋ Jonase, raw wo ɓoʼge ɓe go nen maarog day maarogn raw fer jag gesiŋ.

¹⁶ Jar sen raw wo ferge go de hẽẽne doo Manwur debaŋ. Saara kal wo joŋ siɗgi jag wo ne Manwur ma goŋge ɓe, raw wo haʼ jag ne hẽne.