JOB 1 - Tupuri Bible

Re maga caa Job taŋgu mono

¹ Jobo hay we ɓil sir Uts, ɗúu ɓe hay ga Jobe. Bloo sen hay keɗed lay, hay de deele lay. Á hay joŋ hẽẽne doo Baa, hay bay da re ɓlagge see ɓe wa lay.

² Á hay biŋ twerpiiri renam, mayre swaʼ lay.

³ Ɓil kaw horog ɓen mono, sããre hay wo ni ndar renam, yoŋyoŋ hay wo ndar swaʼa, bloore deere jag jag kiskis dwee, maare gerhẽẽre kiskis dwee, jar joŋre ma liŋ ni ɓen hay wo ngaɓa debaŋ lay. Bloo sen hay diŋ je kluu maga à hoo sug ti ɓe de daŋ jar ma nen wur botoŋn wo ɓuy.

⁴ Weere ɓen hay wo woge ni kããra, toŋ ni je la, toŋ ni je la ma joŋ few, day saara hay ɗe ma tnaare ɓaara ma swaʼn wo le ma age rege, joge de ɓaara lay.

⁵ De maga naw fewn maŋ jag kiigi we go ti ɓaara ɓuy no, Job raw ɓoʼ jobo wer weere ɓen wo day fãã ra go. Á hay go urgi ciŋ de jag toŋ tum ma sii siigi jag maga à roɗ mo ɓen go ɓuy ti weere ɓen wo boŋ boŋ ɓuy, werga Job hay ɗiggi gana : Tiga weere ɓin joŋ wo ɓlagge, day ɗar wo Baa le jiili ɓaara layblaʼ no. Job hay joŋge tum tum doosen nono.

⁶ Day ti wurpo, weere mani Baan raw wo age lagge pel Manwuri, Manhúulí kal age yoo ɓaara ni lay.

⁷ Manwur day riŋ Manhúulí gana : Ndo a le genla? Manhúulí raw ferge ne Manwur gana : Ndi hay mbi go kiigi raŋge ti tamsir caw caw.

⁸ Manwur kal riŋ Manhúulí ga : Nen ɓo baa wejõõ ɓi Job gà yawla? Jobo bay doo se nono ti tamsir wa, á diŋ jobo ma keɗed lay de deele lay. Á joŋ hẽẽne doo Baa, bay da re ɓlagge see ɓe wa lay.

⁹ Manhúulí kal ferge ne Manwur gana : Job joŋ hẽẽne doo Baa nà de koɗ so yaw!

¹⁰ Ɓa ndo bay go de maʼ laɓ ne hara ti de tiŋ ɓe de fẽẽre mani ɓen wo ɓuy wa ge? Ndo kaŋ bosaʼ go ne joŋre ma doo ɓen wo ɓuy ti, day horog de fũy ɓen yãã wo sirn wo go lid tiʼ pa.

¹¹ Ama, coŋ doo ɓo, day baa doo see fẽẽre mani ɓen wo ɓuy ɗa, ndi go de koge cwãy ga á ɗar ge ndo go poɗage.

¹² Manwur day riŋ Manhúulí ga : Ko so, ndi hã faage fẽẽre mani Jobn wo go mo ɓi coo doo ɓuy, ane, baa doo ne hẽn see wa. Mo so no Manhúulí raw naa see ɓe go pel Manwuri.

¹³ Ti wurpo jar ni Job hay wo rege, hay wo jo yii liŋ ni hẽn ɓaara ma kluu no.

¹⁴ Jobo raw age see Job de soole riŋgi ɓe gana : Bloore deeren hay wo jeege day maare gerhẽẽren hay wo re hõõ ti jeŋ ɓaara ni lay.

¹⁵ Jar Sabeyẽẽ ɓug wo ne hara ti, hoo wo ra day id wo jar koɗ ragen wo go de moslam. Ndi yãã le go diŋ ndi boŋ ma age sii re sen ne ndo.

¹⁶ Je sen de wãã wããre ɗa, kola je ma tigriŋ a we pa day gana : Wùu mani Baan cwaa le ciŋ day roɗ sããren wo go de weere jõõren wo, taa sããge ɓaara go. Ndi yãã le go diŋ ndi boŋ ma age sii re sen ne ndo.

¹⁷ Je sen de wãã wããre ɗa kola je tigriŋ a we pa day gana : Jar Kalde a wo le de car ɓil taʼ taʼ swaʼa, ɓug wo ne manyoŋyoŋn wo ti, hoo wo ra, day id wo weere jõõren wo go de moslam. Ndi yãã le go diŋ ndi boŋ ma age sii re sen ne ndo.

¹⁸ Je sen de wãã wããre ɗa, kola je ma tigriŋ a we pa day gana : Weere ɓon wo de mayre ɓon hay wo rege, hay wo jo yii liŋ ni hẽn ɓaara ma kluu no,

¹⁹ kola leege ma kluu a le nen ti ɓaŋ ngel ma ti puuli no, raw hrag tiŋ go ɓuy, day tiŋn leʼ go ne weere ma jõõren wo ti, saara huɗ go ɓuy. Ndi yoʼ le go diŋ ndi boŋ ma age sii re sen ne ndo.

²⁰ De sen ni, Job raw urgi go ciŋ, ngrag õõbe ɓe ma kluun go, raw cẽẽ ti ɓe go. Blam ɓe se raw leʼ monɗra gesiŋ

²¹ day gana : Ndi kal le go ɓil man ɓi glog koɗe day ndi ferge nà glog koɗ pa. Manwur hay hã ra me, day se fer hoo rage, daga ɗúu Manwur mo hay de bosaʼ ti.

²² Ti sen ɓuy Job joŋ ɓlagge gà lay, ɗar Baa ti mopo ni meʼ gà has lay.