AMOS 1 - Tupuri Bible

¹ Mokay diŋ wããre Amos maga diŋ je gẽẽ horog yoo jar gẽɗ horog ma ɓi leege Tekowa wo mono. Baa naa nen wããre sen go ne hẽn ti Israyel ti wur maga Osiyas diŋ waŋ Juda, Jerobowam je ni Jowasn diŋ waŋ Israyel mo lay no, sen kiŋgi ɓog taŋgu daɗge sir no.

² Amos ga : Manwur le de bũygi Siyoŋ, Le Jerusalem, à laa gẽẽge ɓe wo go. Ngel koɗ horog mani jar horogn wo go nen lawge, Day tipẽẽge ti húulì ma Karmel go de heege.

Manwur de joŋ dekwãy ne Israyel de jar leege ɓe wo : Ne jar Siri wora

³ Manwur wãã doo kay nono : Ga diŋ wer ɓlagge maga Damas joŋ ra swaʼa, Koh bà naa ɗa yaw, ndi fer ge le ti wããre ɓi maga ndi saʼn go mo gà. Diŋ wer maga á kog wo boore ma de cõõ, De põõre de ɓod saŋ lay ne jar Galaad wo ti mono.

⁴ Ndi ɓoʼ ge wùu yaŋ le ne tiŋ mani Hasayeln ti, Day á roɗ ge tiŋ waŋre mani Ben-Hadadn wo yaŋ go

⁵ Ndi yor ge gar boore maga wo de bag wer jag tiŋ ma Damas wo yaŋ go. Ndi taw ge jar ma ɓi leege Bikat-Afen wo yaŋ go, De je maga de hayle ti paale waŋ ma Bet-Eden mono. Day à hoo ge jar Siri wo yaŋ wo go Kiri, Wããn diŋ Manwuri.

Ne jar Filistẽẽ wo

⁶ Manwur wãã doo kay nono : Ga diŋ wer ɓlagge maga Gasa joŋ ra swaʼa, Koh bà naa ɗa yaw, ndi fer ge le ti wããre ɓi maga ndi wããn go mo gà. Diŋ wer maga á hoo wo jar po wo go tiʼ ɓuy, Ma hã rage go ne Edom mono,

⁷ Ndi ɓoʼ ge wùu yaŋ le ne kor ma Gasan ti, Day á roɗ ge tiŋ waŋre maga wo ni yaŋ go.

⁸ Ndi horge ge jar ma ɓi sir Asdod wo yaŋ go ɓuy, Day, ndi baa ge je maga de hayle ti paale waŋ ma Askalonn yaŋ go. Ndi ngiɗ gi nen yaŋ de Ekone, Day jar Filistẽẽ maga gwaʼ wo mono huɗ gi wo yaŋ go, Wããn diŋ Waŋkluu, Manwuri.

Ne jar Fenisi wo

⁹ Manwur wãã doo kay nono : Ga diŋ wer ɓlagge maga Tir joŋ ra swaʼa mono, Koh bà naa ɗa yaw, ndi fer ge le ti wããre maga ndi saʼn go mo gà. Diŋ wer maga á hoo wo jar po wo go tiʼ ɓuy, Hã wo ra go ne Edom mono. Á laa wo dayge ɗiggi ti tayge jag maga hay de tay rage Doo hẽẽrebe nono mo gà.

Ne jar Edom wo

¹⁰ Ndi ɓoʼ ge wùu yaŋ go ne kor ma Tirn ti, Day á roɗ ge tiŋ waŋre maga wo ni yaŋ go.

¹¹ Manwur wãã doo kay nono : Ga diŋ wer ɓlagge maga Edom joŋ ra swaʼa, Koh bà naa ɗa yaw, ndi fer ge le ti wããre maga ndi saʼn go mo gà Diŋ wer maga á baa blam hẽn ɓen de moslam Laa dayge ko decoo ɓe gà Diŋ wer maga á mbe tum de car jag jiili go ne hẽn ti de waŋ ma ʼwarge, Day mbe tum de baa põõ ɓen caw mono.

¹² Ndi ɓoʼge wùu yaŋ le ne Teman ti, Day á roɗ ge tiŋ waŋre ma Botran wo yaŋ go.

Ne jar Amoŋ wo

¹³ Manwur wãã doo kay nono : Ga diŋ wer ɓlagge maga jar Amoŋ joŋ wo ra swaʼa, Koh bà naa ɗa yaw, ndi fer ge le ti wããre maga ndi saʼn go mo gà Diŋ wer maga á ngar wo ɓil naare ma de ɓiili ma Galaadn wo go, Nen maga sir saaran mo gẽẽ kluu mono.

¹⁴ Ndi ɓoʼ ge wùu yaŋ ne kor ma Rabban ti, Day á roɗ ge tiŋ waŋren wo yaŋ go. Ti holaŋ ngarge jag durgi wo, Ti wur durgi no, Ti holaŋ leege ma giggigi, Ti wur maga degurleege de fidgi mono.

¹⁵ Day waŋ ɓaaran raw yaŋ ti daŋgay Á de see ɓe, de waŋre ɓen wo wer ɓe ni, Wããn diŋ Manwuri.