ལེགས་བཤད 1 - Tibetan Old Testament 2011

ལེགས་བཤད་ཀྱི་རིན་ཐང།

¹ དཱ་བིད་ཀྱི་སྲས་ཨིསི་རཱཨེལ་གྱི་རྒྱལ་པོ་སོ་ལོ་མོན་གྱི་ལེགས་བཤད་ནི།

² ཤེས་རབ་དང་བསླབ་བྱ་བཟང་པོ་ངོ་ཤེས་པ་དང་གཏམ་དཔེའི་དོན་ཟབ་མོ་རྟོགས་པར་ཕན་པའི་ལེགས་བཤད་འདིར་ཡོད་དོ།

³ དེ་ཚོས་ཁྱོད་ཤེ་རབས་དང་ལྡན་པར་གནས་རྒྱུ་དང་དྲང་པོ་དང་ལྡན་པར་ཕྱོགས་རིས་མེད་པ་དང་། ཇི་ལྟར་བྱ་དགོས་པ་བསློབ་པར་བྱེད།

⁴ དེ་ཚོས་ཉམས་མྱོང་མེད་པའི་མི་ལ་སྤྱང་པོ་བཟོ་ཐུབ་པ་དང་མི་ན་གཞོན་ཚོར་ཐབས་ཤེས་བྱ་རྒྱུ་སློབ་པར་བྱེད་དོ།

⁵ ལེགས་བཤད་འདི་ཚོས་ཤེས་རབ་ལྡན་པ་ཚོའི་ཤེས་བྱ་འཕེལ་བ་དང་ཡོན་ཏན་ཅན་ལ་ལམ་སྟོན་བྱེད་དོ།

⁶ དེ་བས་ན་དེ་ཚོས་ལེགས་བཤད་ཀྱི་གསང་བའི་དོན་རྣམས་དང་ཤེས་རབ་ཅན་ཚོས་བཤད་པའི་གབ་ཚིག་རྣམས་རྟོགས་པར་འགྱུར་རོ༎

ན་གཞོན་ཚོར་བསླབ་བྱ།

⁷ ཡོན་ཏན་ཐོབ་པར་བྱ་བ་ལ་ཐོག་མར་གཙོ་བོ་དཀོན་མཆོག་ལ་གུས་བརྩི་ཞུ་དགོས། འོན་ཀྱང་མི་གླེན་པ་ཚོས་ཤེས་རབ་ལ་གུས་ཞབས་མི་བྱེད་པ་དང་སྦྱངས་རྒྱུར་ངོས་ལེན་མི་བྱེད་དོ།

⁸ ངའི་བུ། ཁྱོད་ཀྱི་ཕ་དང་མས་གསུངས་པར་ཉོན་ཞིག།

⁹ མགོ་དཀྲི་མཛེས་པོ་ཡང་ན་སྐད་རྒྱན་གྱིས་ཁྱོད་ལ་ཡིད་དུ་འོང་བ་བཟོས་བ་ལྟར། དེ་ཚོའི་སློབ་སྟོན་གྱིས་ཁྱོད་ཀྱི་སྤྱོད་ལམ་ཡར་རྒྱས་འགྲོ་བར་འགྱུར

¹⁰ ངའི་བུ། སྡིག་ཅན་གྱིས་ཁྱོད་ལ་བསླུ་འཁྲིད་བྱ་སྐབས་དེ་ལ་མ་ཉན་ཞིག

¹¹ དཔེར་ན་དེ་ཚོས་སྨྲས་ཡོང། ཤོག་ལ་ང་ཚོ་སུ་ཞིག་ལ་གསོད་པར་འཚོལ་དུ་འགྲོའོ། ང་ཚོས་རྩེད་མོའི་ཆེད་དུ་མི་ནོངས་མེད་འགའ་ཞིག་ལ་འཐབ་རྒོལ་བྱེད་དོ།

¹² ང་ཚོས་དེ་ཚོ་རྙེད་སྐབས་གསོན་པོ་དང་བདེ་ཐང་ཡིན་ན་ཡང་། ང་ཚོའི་ལས་ཀ་ཚར་བའི་རྗེས་སུ་དེ་ཚོ་འཆི་ཚར་ཡོང་།

¹³ ང་ཚོས་མི་ཕྱུག་པོའི་རྒྱུ་ནོར་འདྲ་མིན་རྣམས་བརྙས་ནས། ང་ཚོའི་ཁང་པ་བཅོམ་ནོར་གྱི་བཀང་བར་བྱེད་དོ།

¹⁴ ང་ཚོ་མཉམ་དུ་ཤོག་དང་ང་ཚོས་རྐུས་པ་རྣམས་བགོ་བཤའ་རྒྱབ་པར་བྱའོ།

¹⁵ ངའི་བུ། མི་དེ་འདྲ་དང་མཉམ་དུ་མ་སོང་ཞིག། དེ་ཚོ་ལས་ཐག་རིང་དུ་སྡོད་ཅིག།

¹⁶ དེ་ཚོ་ལས་ངན་བྱ་རྒྱུར་སྒུག་མི་ཐུབ། དེ་ཆོས་སྲོག་གཅོད་བྱ་རྒྱུར་རྟག་ཏུ་གྲ་སྒྲིགས་ཡོད།

¹⁷ ཁྱོད་ཀྱིས་བཟུང་འདོད་པའི་བྱ་དེས་མཐོང་སར་དྲ་བ་རྒྱབ་པས་ཕན་ཐོག་མེད་དོ།

¹⁸ འོན་ཀྱང་མི་དེ་ལྟ་བུས་རང་གིས་རང་ལ་རྙི་རྒྱབ་པ་དང་རྙི་དེར་རང་ཉིད་འཆི་བར་བྱེད་དོ།

¹⁹ ཇག་བཅོམ་གྱིས་རྟག་ཏུ་ཇག་པའི་སྲོག་ལེན་པར་བྱེད་དོ། དྲག་ལས་ཀྱི་མི་ཚེ་བསྐྱེལ་མཁན་སུ་ཞིག་ལ་ཡང་དེ་ལྟར་ཡོང་བར་འགྱུར་རོ༎

ཤེས་རབ་ཀྱིས་འབོད་པ།

²⁰ རྒྱ་ལམ་དང་ཁྲོམ་གཞུང་ནང་ཤེས་རབ་ཀྱིས་འབོད་བཞིན་འདུག

²¹ གྲོང་ཁྱེར་གྱི་རྒྱལ་སྒོ་དང་མི་མང་འདུ་འཛོམས་བྱེད་སར་སྐད་ཤུགས་ཆེན་པོས་འབོད་བཞིན་ཡོད་པར་ཉོན་ཞིག

²² མི་གླེན་པ་ཚོ། ཁྱོད་ཚོ་དུས་ཚོད་ཇི་ཅམ་རིང་གླེན་པར་གནས་སྡོད་ཡོད་དམ། ཁྱོད་ཚོས་དུས་ཚོས་ཇི་ཙམ་རིང་ཤེས་བྱ་ལ་སྣང་ཆུང་བྱ་རྒྱུར་ལོངས་སྤྱོད་རྒྱུ་ཡིན་ནམ། ཁྱོད་ནམ་ཡང་སྦྱོངས་ཀྱི་མིན་ནམ།

²³ ངས་ཁྱོད་ལ་ཁ་བརྡུང་གཏོང་སྐབས་ཉོན་ཞིག། ངས་ཁྱོད་ལ་བསླབ་བྱ་བཟང་པོ་སྤྲད་རྒྱུ་དང་། ངའི་ཡོན་ཏན་ཁྱོད་ལ་བགོ་རྒྱུ་ཡིན་ནོ།

²⁴ ངས་ཁྱོད་ལ་སྐད་གཏོང་བ་དང་ཡོང་བར་མགྲོན་འབོད་བྱེད་བཞིན་ཡོད་དོ། འོན་ཀྱང་ཁྱོད་ཀྱིས་དེ་ལ་ཉན་གྱི་མེད། ཁྱོད་ཀྱིས་ང་ལ་དོ་སྣང་བྱས་མེད་དོ།

²⁵ ཁྱོད་ཀྱིས་ངའི་བསླབ་བྱ་རྣམས་ལ་བརྩི་མེད་བྱས་པ་དང་། ཁྱོད་ལ་ངས་བཅུན་པར་འདོད་པ་མེད་དོ།

²⁶ དེ་བས་ན་ཁྱོད་དཀའ་ངལ་ནང་ལྷུང་སྐབས་ངས་ཁྱོད་ལ་གད་པར་བྱེད་དོ། ཁྱོད་ལ་འཇིགས་སྐྲག་བྱུང་སྐབས་ངས་ཁྱོད་ལ་འཕྱ་བར་བྱེད་དོ།

²⁷ དེ་ཚོ་རླུང་འཚུབ་ལྟར་ཡོང་སྐབས་དེ་ཚོས་དཀའ་སྡུག་གི་རླུང་དྲག་པོ་འཁྱེར་ཡོང་ནས་ཁྱོད་ལ་ནད་ཟུག་དང་སྡུག་བསྔལ་བྱིན་ནོ།

²⁸ དེ་དུས་ཁྱོད་ཀྱིས་ཤེས་རབ་ལ་འབོད་སྐབས་ངས་ཁྱོད་ལ་ཡ་མི་བྱེད་དོ། ཁྱོད་ཀྱིས་ང་གང་དུ་འཚོལ་ན་ཡང་རྙེད་པར་མི་འགྱུར།

²⁹ ཁྱོད་ཀྱིས་ཡོན་ཏན་ལ་རྩ་བ་ནས་བེད་སྤྱོད་བྱས་མེད་པ་དང་། རྟག་ཏུ་གཙོ་བོ་དཀོན་མཆོག་གི་བཀའ་ལ་ཉན་མེད་དོ།

³⁰ ཁྱོད་ངའི་བསླབ་བྱར་འདོད་པ་རྩ་བ་ནས་མེད་པ་དང་། ངས་ཁྱོད་ལ་བཅུན་སྐབས་རྩ་བ་ནས་དོ་སྣང་བྱས་མེད་དོ།

³¹ དེ་བས་ན་ཁྱོད་ལ་ཁྱོད་ཀྱིས་བྱེད་སྟངས་ལ་འོས་པ་ཞིག་ཡོང་རྒྱུ་དང་། ཁྱོད་ཀྱི་བྱ་བས་ཁྱོད་རང་ཉིད་མནར་བར་འགྱུར།

³² ཉམས་མྱོང་མེད་པའི་མི་འཆི་བར་འགྱུར་རོ། གང་ལགས་ཟེར་ན། དེ་ཚོས་ཤེས་རབ་ལ་ཁས་ལེན་མ་བྱས་པ་དང་། མི་གླེན་པ་རྣམས་དོ་སྣང་མ་བྱེད་པའི་རྐྱེན་གྱིས་མེད་པར་བཟོས་སོ།

³³ འོན་ཀྱང་ང་ལ་ཉན་མཁན་ཚོ་ལ་སྲུང་སྐྱོབ་ཡོད་པ་དང་། ཁོ་བདེ་བར་གནས་པ་དང་འཇིགས་དགོས་དོན་མེད་དོ༎