OBAJA 1 - SURAT TUHAN Dahun Kayan 1990

¹ Ket aleng tula kitan Obaja. Anih nah dahun Tuhan Allah marung Edom. Itam uh jam dengah aleng nei men Tuhan, ji la'ung sihu Na' hu'uh Na' tei té' hang daha' bengsa'-bengsa', aleng kuma', “Peju nah, tei nah itam ngayau Edom nan.”

Tuhan seng mukum Edom

² Ken Tuhan men daha' daléh Edom, “Lan, Akui seng na ikam da'uk-iduk té' hang bengsa'-bengsa', ikam seng en daha' uau tua.

³ Bau kenep kam dih uh peluvat ikam, u ikam aleng murip alem luvang bato', ha' alem ngavan kam aleng bau atih. Ikam pelemana' alem kenep kam, ‘Hi kah aleng seng deng mayak kamé' ha' tana tih?’

⁴ Lan, pulu hangun pah ikam tei madang bau awi nyiho', nuno'-nuno' pah halah kam en kam na té' hang kelawing, men inan pah Akui seng megak ika'.” Nunan nah dahun Tuhan.

⁵ “Awi daha' aleng nakau nei ha' ikam, awi daha' meté' nei nyilé' daven kam tegu malem kah, adang daha' seng ala ket aleng kenep daha' tua keta'? Nuno' pah daha' aleng mua bua agun lahuh, lan pah daha' mua na', adang té' loh kah karau-karau daha' melek lahuh keta'?

⁶ Bi alem lim daléh kam pahu Esau anih pah seng en daha' pebéh lim-lim, daven-daven kam aleng en kam huk atih pah seng en pebéh pah lanih-lanih na'a.

⁷ Daha' aleng bakéh kam pah seng pelivoh ikam ateng-ateng ha' hang tana, ikam pah en daha' peluvat tua na'a, ikam kalah tua kenan daha' aleng bakéh-bakéh kam atih. Daha' aleng peji pahlung dahim men'a daha' atih nah aleng metei hatoh té' ika'. Nusi' nah kenep kam nyemugen nelana' na'.

⁸ “Tegu anan, seng nun ja'bei Akui em lemvah daha' aleng nyemugen aleng men Edom atih iah, dahin daha' aleng tugé'-tugé', aleng men ngalang Esau atih lahuh?” ken Tuhan.

⁹ “Nurei kah daha' aleng lakin-lakin ka' atih lahuh, u Teman, daha' seng ngelengwen tua takut, ateng ha'ut-ha'ut la'ung aleng ha' ngalang Esau pah seng pah ma'ang matei.

Tavit Edom ga' ukum

¹⁰ “Avin kenan selalang kam té' daha' harin-harin kam aleng pahu Yakub atih parit seng nei mepuk té' ikam, ikam pah seng levah ateng-ateng baya.

¹¹ Tegu dau anan, nekring men su tua nah ikam, alem kelunan ha' béh pektang daven Yerusalem. Daha' aleng nei men daléh ji atih pah tei halem men ketamen daléh daha', dahin na udi té' daléh Yerusalem lahuh, beka' ika' pah aleng awi daha' atih lahuh.

¹² Nusi' tekep kam kebia harin kam tih tegu dau daha' ga' katé' nutih. Nusi' tekep kam sayu kenep té' daha' pahu Yehuda, tegu dau daha' tei tasa' nutih. Nusi tekep kam kebia iha' tegu dau daha' tei alem tusah nutih lahuh.

¹³ Nusi' tekep kam tei halem daléh daha' aleng panyin-panyin Kui tegu dau daha' ga' tusah lan nutih. Nusi tekep kam na paja' daha' tegu katé' nei mepuk daha', tegu daha' tusah nutih. Nusi' tekep kam tei nyilé' daven daha', tegu dau daha' tei katé' nutih lahuh.

¹⁴ Nusi' tekep kam mavang ha' hangat alan, meté' pekpah daha' harin kam aleng uh takau atih. Nusi' tekep kam sa'-sa' metei la'an daha' men ayau daha', tegu dau katé' daha' nutih.

Tuhan seng mukum daha' bengsa' ha' béh

¹⁵ “Avin uh jeleng nah dau Tuhan, dau Kui atih, seng nei mepuk té' ketu-ketu bengsa'. Nuno' pah ikam na daha', ju nurei kah daha' na ikam lahuh na'a, hadui usu kam kah aleng seng nei uli mepuk kahung kam la'an.

¹⁶ Lan, nuno' pah ikam uh du'i té' ujung ngalang Kui aleng ma'ang atih, ju nurei kah ketu-ketu bengsa' seng em ketapah du'i, daha' seng meté' du'i lelan ateng-ateng ha' pah, daha' pah seng tei levah, jadi' awi kelunan aleng em payan té' uh men'a.

Daha' Israel seng maneng

¹⁷ “Bi ha' ngalang Sion té' nah kelunan aleng seng takau, ngalang anan pah seng jadi' ngavan aleng ma'ang, daha' pahu Yakub pah seng nyengayan tana daléh na' la'an.

¹⁸ Daha' pahu Yakub seng awi apui, dahin daha' pahu Yusuf seng awi kelat apui lahuh, bi daha' aleng pahu Esau seng awi tungun jelei dih, daha' seng en daha' pahun dahin kani ateng ha' pah ma'ang hila, men pahu Esau atih nusi' peletu té' ji la'ung aleng seng murip.” Nunan nah dahun Tuhan uh kuma'.

¹⁹ “Kelunan aleng ha' Tana Negeb nah seng nyengayan ngalang Esau, dahin daha' aleng murip ha' tana datah seng nyengayan tana daha' Filistin lahuh. Daléh daha' Efraim dahin daléh daha' Samaria pah seng en daha' sengayan lahuh. Daha' pahu Benyamin pah seng nyengayan daléh Gilead.

²⁰ Kelunan Israel aleng uh en daha' geri salut atih seng nyengayan tana Kanaan tei ateng ha' Zarfat. Kelunan-kelunan Yerusalem aleng tei salut aleng té' ha' Sefarad atih pah seng nyengayan uma-uma aleng ha' Tana Negeb atih.

²¹ Daha' aleng pekurip daha' atih seng tei ma'un ujung ngalang Sion, seng petneng ngalang-ngalang Esau anan dih, Tuhan pah aleng seng hipun keligem-keligem atih.”