MARK 1 - Kemethajüh (N) (Re-editing) Bible (BSI)

Johan Baptizwa Kesansijüh

¹ Hawa ha Anyiza Tsawa Jisu Khrista cüki Ajühkemehaiwa.

² Ha atusenjüh-kechüwa Isa lesüshen wi zhüketheng tsüti: “Anyiza khi, ‘Hi ntuwi na inyilowa kesun chiden, nu nghena alen kidenya thsüden.’

³ Anyi kesü na aghansha wi jishaben, ‘Apvüwa lenwa tsü ghena kidenyalo; ma lenwa tsü satemeshon yalo.’ ”

⁴ Tsüti Johan na aghansha wina gho nyu baptaiz sa nu nyu sansi. Ma anyithu wi kiza, “Nthu kesami wina leben khapegheya nu baptaiz sayalo, isathu Anyiza na nthu kesami teshi pi cüben.”

⁵ Judea yyi nu Jerusalem nyunutiwa wi anyi kejon na wala Johan jüh zaya. Mathu kesamithu khishi, nu ma Jordan Ghaku wi mathu pi baptaiz sa cü.

⁶ Johan na sunsiesa ssen pi kesa thsü mphi, asahyu geshikeqhan pvü, nu ma tsse na ashiqathu nu anikholi.

⁷ Ma anyithu wi khi, “Anyi iseng wi gho ketenwa tsüna imiwi di ki. Hi kukedu ma ccüguwenli lela nlisha qo.

⁸ Hi atssü wi nthu pi baptaiz saben, isala ma Kemetha Ghamu wi nthu baptaiz sa cüben.”

Jisu Baptaiz Kesa nu Kemechu

⁹ Tsü tsüwi Jisu na Galilee yyi wi Nazareth wina ghola Jordan wi Johan kwen wi baptaiz saya.

¹⁰ Jisu na atssü wina shhugho meyi, tang wi shachi nu Aghamu na nkhetsü ti ma miwi dugho keten ma muya.

¹¹ Tang wi ahhai kesü na gho: “No hi kaghaliwa iTsa. No hi kenen ntsawa,” isakhi.

¹² Tsümeyi Aghamu na ma sa pi ayyikeshü wi bvü thsüa,

¹³ ci wi ma ghanan jügha ben, nu Satan na ma mechu. aghangsathu la ma gweghe ben, nu tangnyilo na gho ma kiqa cü.

Jisu na Angakecüthu Meshu Mejü Cikeya

¹⁴ Johan ghan pi atssüzüjjen wi kechi seng wi Jisu na Galilee wi wa nu Anyiza wina kegho Jühtheü Kemehaiwa pi nyu sansi.

¹⁵ Ma khi, “Sati kesa matsüwa tsüna ghodha, nu Anyiza Kadiyyi na tetsakidha! Nthu kesami wina leben khapegheya nu Jühtheü Kemehaiwa nondiyalo!”

¹⁶ Jisu na Galilee Ghajü ghüsa ton wa keten anga kaghan nyi meshu keni Simon nu ma cünyuwa Andria manyi na kaghanthsü pi atssü wi anga cü keben mu.

¹⁷ Jisu na manyi wi kiza, “Iseng nie ghalo, hi nshinyi sansi pi anyi kaghan nyi sa thsü ten na.”

¹⁸ Tsümeyi manyi na kaghanthsü tsü teshi nu ma nie wa.

¹⁹ Ma tsü miwi keu wha nan Zebedee tsa James nu ma cünyuwa Johan manyi na ahun wi manyi kaghanthsü khhwen keben muya.

²⁰ Jisu na manyi muya meyi manyi la ciya; manyi na manyi ba Zebedee teshi pi ahun wi mellisen ketenthu gweghe ben thsü nu manyi Jisu nie wa.

Anyi kesü Nkemehai Ghamu ssiketen

²¹ Jisu nu ma sansikeyathu na Kapernaum nyuti wi wa nu Sabbath tsathang wi Jisu na Sinagog wi dula nyu zhüsansi shhu.

²² Ma Ayenkesansithu ti nyela kekhang sen nu nyu zhüsansi kesalina anyithu na ma kesansijüh kina pi amansa.

²³ Ciwi anyi kesü nkemehai ghamu ssi keten na Sinagog wi dula magha nu,

²⁴ “Nazareth nyiwa Jisu, no ikhang pi mangwa sa mvu ben nu? No ikhang yasa cüle ghoben kwe? Hi no thowa khe chüben — no Anyiza nyilo kemethawa!”

²⁵ Jisu na ma satekü nu khi, “Ccen benlo, nu anyiwa wina shhugholo.”

²⁶ Nkemehai ghamu na anyi tsüwa zankeju ntsa sa, misi ntsa magha sen nu ma wina shhugho.

²⁷ Anyithu tsüdi amansa nu khokho wi khi, “Hawa ha mangwa sabendha nu? Kesansijüh ketheü le! Ma ahza pi nkemehai ghamuthu cü nu mathu ma jühkina keten kekhang keben hana!”

²⁸ Tsalina Galilee yyi tsüdi wi la Jisu cüki khi wa.

Jisu na Anyi Kejon sa pi Mehaikecü

²⁹ Jisu nu ma sansikeyathu, James nu Johan manyi, mathu gweghe Sinagog teshi nu meshonqhe Simon nu Andria manyi jjen wi wa.

³⁰ Simon nyiewa na muwhe nu awe wi keben ghena mathu na ma cüki khi pi Jisu kiza.

³¹ Ma wala nzawa kwen zanki pi shagha thsüa. Isa nan kemuwhe tsüna ma teshia nu shagha kugü pi mathu cü.

³² Aghani kedu seng wi anyithu na kesakinaathu nu nkemehai ghamu ssi ketenthu tsüdi ssinu Jisu wi gho.

³³ Nu anyuti tsüwa wi anyi tsüdila ghola ajjen tsüwa tuwi saghuya.

³⁴ Ma kesakinaa lenkepapa kesathu sa pi mehai cü nu atsaghangthu kejon la jügüshia. Ma atsaghangthu ya ajüh nkhi thsü, kepaghenanye mathu na ma thowa khe chüben.

Jisu na Galilee wi Nyu Kesansi

³⁵ Dhitsüwa wi ghanen mitu atsajang keben na Jisu na shagha nu akhemi wi shhua. Ma anyuti wina kecaghang pen kesü wi wa kekhie sa.

³⁶ Isala Simon nu ma pvüshangthu na Jisu bha wa,

³⁷ nu mathu na ma mukeya wi khi, “Anyi tsüdila no bha tenle.”

³⁸ Isala Jisu na luneng, “Ikhang anyuti ha kevü wi nwathu yishüben. Hi mathu la nsansithu yishü, kepaghenanye hi ha ghena gho le!”

³⁹ Tsalina ma Galilee yyi tsüdi wi wa nu Sinagogthu wi nyu khisansi nu atsaghangthu jügüshi.

Jisu na Anyi Kesü sa pi Mehaikecü

⁴⁰ Agükedsakenaa nyi kesü na Jisu wi gho ma wi keshikene. Ma kukedu Jisu wi khi, “No kenen lethu, no hi sa pi mehai cülo.”

⁴¹ Jisu na ma nantizenya nu ma kwen chang pi anyi tsüwa pa nu khi, “Hi kenen le, mehaiyalo.”

⁴² Tsümeyi kesakinaa tsüna anyi tsüwa teshi nu ma mehaiya.

⁴³ Isanu Jisu na ajüh kekhang khi pi ma kiza nu ma kesun pi bvü thsüa,

⁴⁴ nu ma wi, “Kinalo, no ha pi thola nkiza lalo. Isala wala ngwo pi keqhaikediwa ccüca nu nyu yala no mehaiyadha le kesa chüya thsüle kesalina Mosa na kekhi ti ahhansha sa chilo,” isakhi.

⁴⁵ Isala anyi tsüwa na wala Jisu cüki khi pi apen tsüdila kepong sa kesalina Jisu na nyu kemu anyuti kesü wi la du meyala. Isala ma kecaghang pen wi ben wa nu anyithu na apen tsüdi wina ma wi gho.