PROVERBS 5 - Navajo Bible

Ajił ts'ídá doo ál'į́į da

¹ Shiye' nílíinii, díí bee honisáanii áádóó bik'i'diitáanii bee naninishtinígíí hazhó'ó yísíníłts'ą́ą́'.

² Áko yá'át'éehii áádóó doo yá'át'éehii nił bééhózin doo índa ił ééhózin bee yáníłti' doo.

³ Háálá asdzání ałjiłnii yáłti'go éí tsés'ná bitł'izh bits'a' bits'ą́ą́dóó tsés'ná bitł'izh nahidilch'ą́łígíí nahalin; ak'ah yizhólígíí nahalingo yáłti' łeh.

⁴ Nidi áhooł'įįhdi éí t'áá íiyisí dích'íi'go béé'joo'nih; diltłish ałts'ą́ąjį' deenínígi át'éego deení.

⁵ Anoonéełjį' índa hool'áágóó ti'hoo'níihjį' dah bidiikéé'.

⁶ Iiná bá atiinii ts'ídá doo yaa nitsíkees da; bá honít'i'ii doo bił bééhózingóó ałtah ánáá'nííł.

⁷ Éí bąągo, shiyázhí danohłíinii, k'ad dashíínółts'ą́ą́', áádóó saad bee nihich'į' yáshti'ígíí doo bits'ádoohkah da.

⁸ Éí asdzání ákót'éii nízaadi bits'ąą nidaahkai, índa bich'é'étiin bit'áahjį' dohkááh lágo.

⁹ Éí doodaléi' bee anílínígíí náánáła' yee náá'ídlį́į doo áádóó ni'ííníłdįįd bijį́įjį' doo daats'íidii bá nanilnish doo,

¹⁰ áádóó dé'éyóní nilíinii niyódí ádił haididoolbį́į́ł, áádóó bik'é nishínílnishii dé'éyóní bighan góne' yanáa'áa doo;

¹¹ áadi índa doo yá'át'éehii nits'íís bidoolna'go nich'į' nahwii'náago bik'ee diní'níigo

¹² ádíníi doo, Dooládó' na'nitin jooshłxáa da nít'éé' índa shich'aho'dishkéhígíí t'óó yiishkóóh nít'éé',

¹³ áádóó nidashinitinígíí doo bik'eh honish'į́į da nít'éé', índa nidashinitinii doo yínísts'ą́ą' da nít'éé'!

¹⁴ Áłah nída'oodleełii binááł doo yá'ádaat'éehii k'asdą́ą́' t'áá ałtso baa niséyá.

¹⁵ T'áá ni nitóshjeeh bee tó síníł'ánídóó tó nidlą́; t'áá ni nito' háálį́į́dóó tó nidlą́.

¹⁶ Da' nito' hadaazlį́į́dóósh da'nítiingóó tó t'áá bíni'dii t'áá ádzaagóó taozlį́į dooleeł?

¹⁷ Éí bąą t'áá ni t'éí bee nóhólnííh, náánáła' éí doo bił ałts'ą́ą́' aníłk'iiz da doo.

¹⁸ Háni'dii nito' háálínígíí bik'ihojidlíi le', áádóó ániid nanináádą́ą́' ne'asdzą́ą́ silį́į'ii t'áá éí baa nił hózhǫ́ǫgo bił hiníná.

¹⁹ Háni'dii bįįhtsa'ii ayóó'óó'níinii nahalin doo, áádóó jádí nizhóníii nahalin doo, áádóó háni'dii bibe' t'áá áłahjį' bee hwiih nílį́į le', ayóó'ánó'nínígíí t'áá áłahíjį' bee ná'íldįįh.

²⁰ Áko shiye', ha'át'íísh biniyé asdzání ałjiłnii bee ná'áshdįįh doo nínízin, áádóó ayóní binísínínii'?

²¹ Háálá diné ájít'éegi t'áá áłahíjį' Bóhólníihii biníł'į́, áádóó tázhdíghááhgóó t'áá ałtsogóó hak'ítsééłkos.

²² Diné doo yá'áshóonii doo ákwii át'íinii t'áá bí atínábidoodlííł, índa tł'óół bee dah ho'diistł'ǫ́ nahalingo ádi ł ni'iilzíihii dah nábidiyootł'óół.

²³ T'áadoo nahodi'neestą́'í dazdootsaał, áádóó ayóó át'éego yíní ádin baa nijigháhígíí yóó'azhdoogááł.