PROVERBS 3 - Navajo Bible

Ak'eh hól'į́ bee ayahoniidlįįh

¹ Shiye', bee hosíł'áanii baa yóónééh lágo, nidi shibik'eh ó'oo'níiłii éí nijéí bee bik'eh honíł'į́į le'.

² Háálá lą'í niidoołkááł áádóó as'ahgóó hinínáa doo índa nich'į' hózhǫ́ǫ doo.

³ Aa a'ááh hwiindzin índa t'áá aaníinii yóó'andó'ááł lágo; ázéénílt'ih, áádóó nijéí bííníłtą'.

⁴ Áko Diyin God binááł áádóó diné dabinááł nich'oha'née doo áádóó yá'át'éehgo ak'idi'yiitįįh doo.

⁵ Nijéí t'áá át'é bee Bóhólníihii baa dzíínílí; t'áá ni nił bééhózinii éí t'áadoo ba'íínílíhí.

⁶ Hidínááhgóó t'áá ałtsojį' t'áá bí t'éí baa ákonínízingo yá'át'éehgo dahonít'i' góó niyoołáał doo.

⁷ Shí lá honisą́, t'áadoo níníziní, nidi Bóhólníihii díínísin áádóó doo yá'ádaat'éehii bits'ąą ádaa áhólyą́.

⁸ Éí bee nits'íís nádziih doo áádóó nits'in hadaałt'ée doo.

⁹ Nit'íinii bee Bóhólníihii nił nilį́įgo baa hidí'aah; nínáníłt'į́hígíí t'áá át'é áłtsé neest'áanii Bóhólníihii baa hidí'aah.

¹⁰ Áko nikin bii' nooh nída'achíihii góne' ch'iyáán hééł ánéinil'įhígíí t'ah yówehgo hadeezbin doo, áádóó ch'il na'atł'o'ii náníłjishígi wáin ániidíii ba'aan nída'adleeh doo.

¹¹ Shiye' nílíinii, Bóhólníihii t'áá hashkée yína'niłtinii t'áadoo doo níníziní índa k'éhézdon ninániidlóosgo t'áadoo yiiłkóhí.

¹² T'áá azhé'é biye' yaa bił hózhóonii nínéiniłtsxisígi át'éego Bóhólníihii éí ba'áłchíní ayóó'áyó'níinii néiniłtsxisgo hasht'e'nináyiidlóós.

¹³ Diné bee hódzáanii yik'íníyáii áádóó diné ak'idi'yiitįįh shóyoost'e'ii bił hózhǫ́.

¹⁴ Háálá béésh łigaii bee naalyéhé shóot'eehii bilááh át'éego hódzą́ shóozt'e'jí aláahgo ílį́, áádóó óola díkwíidida nídoolyį́į'ii bilááh át'éego a'nídéél.

¹⁵ Nitł'iz ałtaas'éí bilááh át'éego hódzą́ ayóo ílį́, áádóó ha'át'íhída bídin nílíinii t'áá ałtso t'áá nida'íí'oh.

¹⁶ Nízaadgóó iiná nish'náájí yee dah yoolééł, yódí índa ił ílį́ nishtł'ahjí yee dah yoolééł.

¹⁷ Hódzą́ yaa naagháhígíí bee dahózhóní índa dabinítiingóó t'áá ałtso bee hasht'edahodít'é.

¹⁸ Hódzą́ dayiiłtsoodii éí iiná tsin sikaadii yá nilį́; t'áá bizááká dabótą'ii bił dahózhǫ́.

¹⁹ Bóhólníihii éí hódzą́ yee nahasdzáán niiní'ą́; ak'i'diitįįhii yee yót'ááh hiníláii bidahoníłdzilgo áyiilaa.

²⁰ Bił bééhózinígíí bee tooh danílį́įgo áyiilaa, índa k'os bits'ą́ą́dę́ę́' dahtoo' hólǫ́ǫgo áyiilaa.

²¹ Shiye' nílíinii, éí yóó'adóó'ááł lágo; t'áá ákogi át'éego hódzą́ índa yá'át'éehii áádóó doo yá'át'éehii nił bééhózingo bee ádaa áhólyą́,

²² áko nii' sizíinii yee hináa doo áádóó yoo' nizhóníii ázéézhdééljéé' nahonílin doo.

²³ Áko índa hasihgo atiingóó yínáałgo doo díníítł'ah da.

²⁴ Nítéehgo doo náníldzid da doo; t'áá aaníí, nítéehgo ayóó át'éego łikango íłhosh doo.

²⁵ T'áadoo kót'é ílíní yéé' haleehgo áádóó diné doo yá'ádaashóonii ádabidi'dooldįįł baa halzhishgo t'áadoo náníldzidí.

²⁶ Háálá Bóhólníihii baa dzíínílíi doo, áko nikee' doo niitł'ááhgóó áyósin doo.

²⁷ Yá'át'éehii diné bee baa jiidííbaałígíí bee nóhólníihgo t'áadoo bich'į' baa níchį'í.

²⁸ Bił kééhót'íinii bá t'áadoo le'é nee hólǫ́ǫgo t'áadoo kóbidiníní, Nílááh yínááł; yiską́ągo náádíídááł, áko índa naa deeshłééł.

²⁹ Bił kééhót'íinii níighahgóó kééhat'į́įgo hasih hodiil'aahígíí t'áadoo bik'ijį' nílį́įgo nahó'áhí.

³⁰ Diné doo haa daniilaagóó t'áadoo biniinaanígóó t'áadoo bináádiiltłi'í.

³¹ Diné doo yits'íidii t'áadoo yiníłch'į́dí, áádóó át'éii bi'óólééh lágo.

³² Háálá diné nidahagizii éí Bóhólníihii doo bíłdin da, nidi Bóhólníihii éí kót'é ha'níinii diné t'áá ákogi ádaat'éii bił béédahózingo áyósin.

³³ Diné doo yá'ádajíshónígíí dahaghan hóyée'go Bóhólníihii yá hadoodzih, nidi t'áá ákogi ádaat'éii kéédahat'ínígi yik'izhdoodliił.

³⁴ Ąąh nidayiiłhaałii t'áá aaníí yąąh nayiiłhaał, nidi diné a'ohgo ádaat'éii yaa jooba'.

³⁵ Diné dahóyáanii ił ídlíinii daabí doo, nidi doo ádahojilyánígíí éí t'óó haa yádahodoosįįł.