Yakobo 1 - Kilagano kya hino 1937

¹ Yakobo, mbanda wa Mulungu ni wa Bambo Yesu Kristo, kwa mitangilo kumi ni yiwili ya Wakuyambanika, kulamukila.

² Muwalange kuhekelela kukulungu, walongo wangu, apa mugwe pa mageseko ga misafi‐misafi:

³ pakumanya kukita kulingika kwa kiyitakiso kinu kuhengela kwisinga.

⁴ Leka kwisinga kifwilanasike nausi muye wakumalakilana ni wa mfilimila, nukulemuka kandu.

⁵ Koma wona ayi yoha wa mwenga alemuka pa luhala, aluwe kwa Mulungu, uyu awapela woha pangali kuwanota, nukulakalila lepa; ni yakipelewe kwake.

⁶ Koma aluwe pa kiyitakiso, asiganagana pa kandu: pakuya uyu aganagana ahwanangana na mayiga ga pa nyanja gakutoleka nu mbepo ni kuyewela‐yewela.

⁷ Pakuya mundu yula asihola kukita yayupe kandu kwa Bambo;

⁸ ngosi wa mioyo yiwili, wakutoleka‐toleka pa ndila syake syoha.

⁹ Leka ndongo wakuseleseka ilumbe pa utamo wake wakukweseka:

¹⁰ nu nkafi, pa kuseleseka kwake: ndawa ngati liluwa lya manyasi yalutalile.

¹¹ Pakuya lijuwa likwelela ni mbepo yakupyupa, ni liyumisa manyasi; ni liluwa lyake lipuluta, ni kuniamba kwa kyene kyake kutagika: wiwilawila mundu nkafi yayunde pa magendeko gake.

¹² Wakusengwa yula nakuhegalela pa kugeseka: pakuya apa akalingiki nnofu, yayupe kikupiku kya kulama, kila Bambo akalagiti kwa wala wakungana.

¹³ Mundu pakugeseka asijowa kukita Nigeseka nu Mulungu: ndawa Mulungu nakugeseka ni fiwifu, nuyombe mwene angesa lepa mundu:

¹⁴ koma mundu ayi yoha ageseka pala afutiki na manyonyelo gake mwene, ni akongeka.

¹⁵ Panyuma pake linyonyelo lila, apa likaliyimi luleme, lihogola sambi: ni sambi, apa yikuliti, yihogola kifwa.

¹⁶ Musisowaseka, walongo wangu wakuganika.

¹⁷ Kya waka kiyi kyoha kinofu ni kiyetulo kya kumalakilana kiyi kyoha kihumila kunani, kuselela kuhuma pa Dadi wa malulangalila, pa yula pawaka kulekana‐lekana, haka kifwili kya kuwikika kwa kung’anamuka.

¹⁸ Pa kilondo kyake mwene akatihogwili pa lilowe lya chakaka, tiye kiloseko kya kapangiko kake.

¹⁹ Mumanya iki, walongo wangu wakuganika. Mundu ayi yoha aye wakuyumbatika kuyufwana, wakusyela kulongela, wakusyela kudada:

²⁰ pakuya kudada kwake mundu kuhengela lepa ugolofu wake Mulungu.

²¹ Mumu pakufula wafu woha, ni kuyolokela kuwipa, mwiyupile pa uwololo lilowe lyakupandika mumu, lila lihotola kugayokola mawumi ginu.

²² Leka muye wakulikita lilowe, nukuya wakuyufwana waka, kwikonga mwawene.

²³ Pakuya mundu wona ayii wakuyufwana lilowe, leka nukulikita lepa, ahwanangana nu wakuwona kyene kyake kila akahogoliki nakyo pa lilolelo:

²⁴ Pakuya ilola mwene, ni aluta, ni hino apa ayiwa wa ntundu wuli ayili.

²⁵ Koma uyu alingulila pa torah yakumalakilana, ya ukamba, ni ahwela mumu, nukuya wakuyufwana wakuyiwa, koma wakukita wakuhenga, mundu uyu yaaye wakusengwa pa kukita kwake.

²⁶ Mundu wona ahola kukita ayii wakugwilakimbo wicho, leka alemiti kisiwilikisa lulimi lwake, ni ikongesa pa mwoyo wake, dini ya mundu uyu yiyii ya waka.

²⁷ Dini yiwalafu ni yangali wafu palongolo pa Mulungu witu nu Dadi yiyii iyi, kulolalela wakiwa ni wafwili pa kuhumbusika kwawe, ni kwigoha pangali mabala pa ndima uwu.