1 थिस्सलुनीकियों 1 - लाहौली बाइबिल

नमस्ते

¹ दि डाक पोलुसे सिलवानुस ए तीमुथियुसो तरफे। ञेंहच़ी दि डाक थिस्लुनीकियो शहरो कलीसियाबि च़ेहसी लेहकी तोतोंई, अंऊ हेंदु बाह परमेश्वर ए प्रभु यीशु मसीहरिंङ तोह। ञेंहच़ी प्रार्थना लहज़ातंई कि परमेश्वर केतिंङ मोह्ड़े दाह ए शांति रमतो।

थिस्सलुनीकि तु विशवास

² ञेंहच़ी हेंदु प्रार्थना रिंङ केतिंङ हिद लहज़ातंई दंङ हमेशा केहतु भत्ते तु थल्जी परमेश्वरो धन्यवाद लहज़ातंई,

³ अपेहल ञेंहच़ी हेंदु बाह परमेश्वरो हखा प्रार्थना लहज़ातंई अंऊ कम केहच़ी विशवासो दोरच़ी लहज़ातंई, दंङ विशवासी तु मदत लहज़िमी थल्जी महस मेहनत लहज़ातंई, दंङ प्रभु यीशु मसीहू वापिस अपिमी उम्मीद रिंङ केहच़ी धीरज़ ला लगातार हिद लोहवातंई।

⁴ हे गिऊ प्यारे साथी विशवासी रे, परमेश्वरो प्यारे मीहरे ञेंहच़ी ञेंच़ातंई कि परमेश्वरे केरे एनोह मीह शुहबिमी थल्जी अंङषी शुई।

⁵ छना कुचे हेंदु यीशु मसीहू पाहठी रूठे खबर केहतु कछंङ माह सिर्फ कुट्री रंङ साते ए पर पवित्र आत्मो सामर्थे ए भत्ते याहबा रंङ अंजा कि दि रूठे खबर हेले शुह, केहच़ी ञेंच़ातंई कि अपेहल ञेंरे केतंङ साते तोईनी दंङ ञेंहच़ी केहतु भलाई ऊ थल्जी छना ठ्रोह जीवन श्रींङज़ातंई।

⁶ केहच़ी ञेंहतु ए प्रभु उदाहरण हिद लहरिन, अंऊ पवित्र आत्माओ दोरच़ी केतिंङ रांहषी तोहई, केहच़ी खुशी रंङ साते दू ग्रहण लहज़ातंई, दि तरीका रंङ केरे ला हेंदु ए प्रभु यीशु मसीहू शिष्य बणेंके इलांई।

⁷ अतु नतीज़ा दि शुई कि मकिदुनिया ए अखाया ओ प्रदेशो भत्ते विशवासी तु थल्जी केरे नमूना बणेंके इलांई।

⁸ छना कुचे केहतु दोरच़ी माह सिर्फ मकिदुनिया ए अखयारिंङ प्रभु वचन सुनाई केहरी पर केहतु विशवास अंऊ परमेश्वरो टोईच़ी तोह भत्ते ठाहरीरिंङ दोऊ गप्पा फेलेगी इलजी तोद कि ञेंतिंङ कुट्रीमी ज़रूरत माह।

⁹ छना कुचे दोच़ी ऊईतिंङ कंड्रातोर कि अपेहल ञेंरे केहतु कछंङ अंदेंई, दंङ केहच़ी छना ठ्रोह ञेंहतु स्वागत लहज़ातंई। दंङ केरे छना मुर्ति पूजा ओ दोरच़ी शत्‌ह शुहचे परमेश्वरो हखा किरच़ातंई, ताकि श्रींङे ए सच्चे परमेश्वरो सेवा लोंहई,

¹⁰ दंङ दोच़ी कुट्रातोर कि केरे छना परमेश्वरो योह स्वर्गो दोरच़ी वापिस अपिमी उम्मीद लहज़ातंई, अतिंङ परमेश्वरे सिऊ दोतु बिचंङ श्रींङमी लहरी, मतलब यीशु बि, अंऊ हेंदिंङ परमेश्वरो दुह न्यायो दोरच़ी बचाएच़ा अंऊ अपिमी तोह।