Vosavakaibalebale 1 - Ai Vola Tabu (Vakadewa Makawa Vakavoutaki 2021)

A Kena Yaga na Vosa Vakaibalebale

¹ A vosa vakaibalebale i Solomoni na luve i Tevita, na tui Isireli:

² Me kilai kina na vuku kei nai vakavuvuli, me kune kina na vosa vakayalomatua;

³ me rawa kina nai vakavuvuli ni vuku, kei na yalododonu, kei na lewa, kei na cakacaka dodonu;

⁴ me soli kina na yalomatua vei ira na yalowai, na kila-ka kei na lomavuku vua na cauravou—

⁵ Me vakarorogo na lomavuku ka na tubu cake kina na nona vuku; ia na tamata daukila-ka ena rawata nai vakavuvuli vuku,

⁶ me kila na vosa vakaibalebale kei na kenai vakamacala, na nodra vosa na vuku kei na nodra vosa vakatautauvata.

⁷ Na rerevaki Jiova sa vu ni lomavuku: ia ko ira na lialia era sa cata na vuku kei nai vakavuvuli.

Ai Vakasala me Baleta na Vakailawalawa Cala

⁸ Na luvequ, mo vakarorogo ki nai vakavuvuli i tamamu, ka mo kakua ni biuta na vunau i tinamu;

⁹ ni na dua nai uku talei ki na ulumu, kei nai taube ki na domomu.

¹⁰ Na luvequ, kevaka sa temaki iko ko ira na tamata ca, mo bese ga.

¹¹ Kevaka era sa kaya, “Tou mai lako vata, me datou koto lawaki mada, me ia na veivakamatei; tou la'ki koto lo me vakamatei ira walega era sa sega ni cala;

¹² me tou tilomi ira bulabula me vaka nai bulubulu, ka taucoko, me vakataki ira era sa lako sobu ki na davuke.

¹³ Tou na kunea nai yau talei kecega; tou na vakasinaita na nodatou veivale e nai toki.

¹⁴ Me datou i votavota vata; me duavata ga na nodatou taga i lavo”—

¹⁵ na luvequ, mo kakua ni sala vata kei iratou, mo tarova na yavamu mai na nodratou i lakolako;

¹⁶ ni sa cici ki na ca na yavadratou, a ratou sa kusarawa me ra vakadavea na dra.

¹⁷ E dina sa sega ni yaga me biri na dai, e matana e dua na manumanu vuka;

¹⁸ ia eratou sa lawakitaki iratou vakai iratou ga—me ra vakadave-dra, eratou sa viri dai lo—me ra mate kina ko iratou.

¹⁹ Sa vakakina na nodra i valavala kecega era sa kocova nai yau; sai koya ka vakamatei ira na kenai taukei.

Na Kaci nei Vuku Yalomatua

²⁰ Sa dauvunau e tautuba ko vuku; sa tabalaka na domona e na saqata.

²¹ Sa kaci e na tikina e dausoqoni kina na tamata, e na saqata ni matamata-ni-koro; e na loma ni koro sa cavuta na nona vosa, ka kaya:

²² “Koi kemudou na yalowai, me vakaevei na kena dede na nomudou vinakata na yalowai? Ka ra marau ko ira na dauveivakalialiai, e na nodra veivakalialiai, ka cata na vuku ko ira na sesewa?

²³ Dou saumaki mai e na noqu vunau; raica, ka'u na sovaraka na Yaloqu vei kemudou; ka'u na vakatakila na noqu vosa vei kemudou.

²⁴ Ni ka'u a daukaci, ia dou a bese ga, au a dodoka yani na ligaqu, ka sega e dua sa goleva,

²⁵ ia dou a vakawaletaka kecega na noqu i vakavuvuli, ka sega ni vinakata na noqu vunau;

²⁶ koi au talega ka'u na dredrevaka na nomudou vakaloloma; ka'u na vakalialia ni sa yaco mai na nomudou rere,

²⁷ ni sa yaco mai na nomudou rere me vaka na cagilaba, kei na nomudou ca me vaka na covulaca; ni sa yacovi kemudou na rarawa kei na yaluma.

²⁸ Era na qai kaci mai vei au, ia ka'u na sega ni rogo yani; era na qarai au vagumatua, a ra na sega ni kunei au.

²⁹ Ni ra a cata na vuku ka sega ni digitaka me ra rerevaki Jiova,

³⁰ era a bese ga ki na noqu i vakavuvuli, ka ra beca na noqu vunau kecega,

³¹ o koya oqo era na kania kina na vua ni nodra i valavala, ka ra na vakamamautaki e na nodra lewa.

³² Ni nodra vuki tani na yalowai era na mate kina, kei na nodra sautu na lialia era na rusa kina.

³³ Ia ko koya sa vakarorogo vei au ena tiko vinaka, ka na vakacegu ka sega ni rerevaka e dua na ka ca.”