Neumi 1 - Ai Vola Tabu (Vakadewa Makawa Vakavoutaki 2021)

¹ Na vosa ni parofisai bibi ka baleti Ninive. Oqo nai vola ni raivotu i Neumi na kai Elikosi.

Sa Ka Levu na Cudru ni Kalou

² Sa Kalou vuvu ko Jiova ka sa dau veisausaumi, sa ia na veisausaumi ko Jiova, ka sa ka levu na nona cudru; ena ia na veisausaumi ko Jiova vei ira sa cati koya, io, sa binia ko koya na cudru me tau vei ira na nona meca.

³ Sa dauberabera ni cudru ko Jiova ka sa levu na nona kaukauwa, ia ena sega sara ni vakadonui ira na tamata ca. Sa dua na sala i Jiova e na covulaca kei na cava, ia sa kena kuvu-ni-soso ni yavana na o.

⁴ Sa vunauca na wasawasa ka sa di mai, ia na uciwai kecega sa vakamacari talega; sa vuca mai ko Pasani kei Kameli, kei na senikau mai Lepanoni sa malai.

⁵ Na veiulunivanua sa sautaninini e na vukuna, na veiulu-ni-koro talega sa waicala; sa tavuki talega na vanua e matana, io ko vuravura kei ira kecega era tiko kina.

⁶ Ko cei me tiko rawa e na mata ni nona cudru? Ia ko cei me vosota rawa ni sa waqawaqa na nona cudru? A nona cudru sa sovaraki yani me vaka na bukawaqa, ia na uluvatu sa talaraka sobu ko koya.

⁷ Sa yalovinaka ko Jiova, sai vakaruru kaukauwa e na siga ni rarawa; sa kilai ira era vakararavi vua.

⁸ Ia e na dobui levu ena vakaotia sara yani na kenai tikotiko, ia ena muri ira na nona meca na butobuto.

⁹ A vere cava dou sa bukia kei Jiova? Ena vakayacora sara ko koya na kenai vakataotioti; ena sega ni tubu vakarua na ka rarawa.

¹⁰ Ia ke ra coko veidre me vaka na soni, ka mateni sara e na waini, era na vakamai ga me vaka na vu-ni-sila e mamaca sara.

¹¹ Sa lako mai vei iko ko koya sa nanuma tiko na ca vei Jiova, e dua sa vakavuvulitaka na ca.

¹² Sa vosa vakaoqo ko Jiova, Ke ra kaukauwa sara, ka lewe vuqa, era na tamusuki sobu ga, ka na lako tani yani ko koya. E dina ni ka'u a vakararawataki iko, ia ka'u na sega ni vakararawataki iko tale.

¹³ Ni'u na qai musuka tani vei iko na nona i vua, ka vakacavukataka na kemui vesu.

¹⁴ Sa vakarota vakaoqo e na vukumu ko Jiova: Me kakua sara ni tubu tale e dua na nomu kawa; ka'u na muduka tani mai na nomu burekalou na matakau ceuceu kei na matakau e vakawaicalataki. Ka'u na cakava na nomu i bulubulu, ni ko sa velavela.

¹⁵ Raica e na ulunivanua na yava i koya sa kauta mai nai tukutuku vinaka, sa vakarogoya voli na sautu! Ko iko Juta, mo ia na nomu solevu tabu, ka vakayacora na nomu bubului; ni na sega tale ni lako voli yani vei iko na tamata ca; sa muduki laivi sara ko koya.