2 Joni 1 - Ai Vola Tabu (Vakadewa Makawa Vakavoutaki 2021)

¹ Mai vua na qase ni lotu ki vua na marama sa digitaki tu, kei ira na luvena, ko ira ka'u sa lomana vakaidina, ka sega ni koi au duaduaga, o ira kece talega era sa kila na dina,

² e na vuku ni dina, o koya ka tiko e na lomada, ena tu ga vei keda ka sega ni mudu:

³ Me nomudou na loloma, na yalololoma, kei na vakacegu mai vua na Kalou ko Tamada, kei na Turaga ko Jisu Karisito na Luve i Tamada, e na dina kei na loloma.

Na Dina kei na Loloma

⁴ Au a reki vakalevu ni'u a kunei ira na luvemu eso era sa dau muria nai vakavuvuli ni dina, me vaka eda sa vakaroti mai vua na Tamada.

⁵ Ia ka'u sa qai vakamasuti iko, na marama, ia ka sega ni vaka ni'u sa vola vei iko na vunau vou, oqori ga sa tu vei keda mai nai vakatekivu, me da veilomani.

⁶ Ia oqo na loloma, me da muria na nona vunau. Na vunau oqo, me vaka na ka dou a rogoca mai nai vakatekivu—mo dou muria tiko.

Nai Vakavuvuli Lasu

⁷ Ni ra sa lewe vuqa na dauveivakacalai sa lako voli e vuravura, ko ira era sa sega ni vakatusa ni sa liatamata mai ko Jisu Karisito. O koya oqo na dauveivakacalai kei na meca i Karisito.

⁸ Dou vakaraici kemudou, me kakua ni yali vei kemudou na ka keitou a kitaka, mo dou rawata kecega na kenai sau.

⁹ O koya yadua sa talaidredre, ka sa sega ni tudei e nai vakavuvuli kei Karisito, sa sega ni tu vei koya na Kalou. O koya sa tudei e nai vakavuvuli kei Karisito, sa tiko vua na Tamada kei na Luvena talega.

¹⁰ Kevaka e dua sa lako kivei kemudou, a sa sega ni kauta nai vakavuvuli oqo, kakua ni kauti koya ki vale, se vosavakalougatataka;

¹¹ ia ko koya sa vosavakalougatataka sa tautauvata kaya e na nona i valavala ca.

Kena i Tinitini

¹² Sa levu na ka ka'u sa via vola vei kemudou, ia ka'u sa sega kina ni vinakata me'u vola e na pepa kei na wai ni volavola. Ia ka'u sa nakita me'u lako vei kemudou, ka veivosaki e na matanavotu, me taucoko kina na noda reki.

¹³ Sa loloma yani vei iko ko ira na luvena na wekamu yalewa sa digitaki tu. Emeni.