1 Joni 1 - Ai Vola Tabu (Vakadewa Makawa Vakavoutaki 2021)

Na Vosa ni Bula

¹ Ko koya sa tu mai nai vakatekivu, o koya keitou a rogoca, o koya keitou a raica e na mata i keitou, o koya keitou a vakaraica sara, ia ka tara na liga i keitou, e na vuku ni Vosa ni bula—

² ka sa vakaraitaki na vu-ni-bula, ka keitou a raica, ka dautukuna, ka vakatakila vei kemudou na vu-ni-bula tawa mudu, o koya ka tiko vata kei Tamana, ka sa qai vakaraitaki mai vei keda—

³ o koya keitou a raica ka rogoca, keitou sa tukuna vei kemudou, mo dou veiwekani kina kei keitou; ia keitou sa veiwekani kina kei na Tamada, kei na Luvena ko Jisu Karisito.

⁴ Ia keitou sa vola na veika oqo vei kemudou, me vakataucokotaki sara kina na nomudou reki.

Sa Rarama na Kalou

⁵ Ia oqo nai tukutuku keitou a rogoca mai vei koya, a sa tukuna vei kemudou, ni sa rarama na Kalou ka sa sega sara vei koya na butobuto.

⁶ Kevaka eda sa kaya ni da sa veitokani kaya, ka da sa ia nai valavala butobuto, eda sa lasu ga, ka sa sega ni kitaka na ka dodonu.

⁷ Ia kevaka eda sa lako voli e na rarama, me vaka sa tu e na rarama ko koya, eda sa qai veitokani vata, ka sa vakasavasavataki keda mai na ca kecega na dra i Jisu Karisito na Luvena.

⁸ Kevaka eda kaya ni sa sega na noda i valavala ca, eda sa vakaisini keda ga, ka sa sega ni tu vei keda na dina.

⁹ Kevaka eda sa vakatusa na noda i valavala ca, sa yalodina ka yalododonu ko koya me vosota na noda i valavala ca, ka vakasavasavataki keda mai na ka kecega sa sega ni dodonu.

¹⁰ Kevaka eda sa kaya eda a sega ni valavala ca, eda sa vakalasui koya, ka sa sega ni tu vei keda na nona vosa.