Jope 6 - Vakavakadewa Makawa

Sa tukuna ko Jope ni sa sega ni tagi wale, 1-7. Sa via mate me vakacegu mada, 8-13. Sa vunauci iratou na wekana e na vuku ni ra sa sega ni loloma, 14-30.

¹ Sa vosa ko Jope, ka kaya,

² Me vakarautaki dina mada na kena bibi ni noqu rarawa, Ia me vakatauvatani e nai vakarau ni bibi kei na ka ca sa yacovi au!

³ Ni sa qai bibi vakalevu ka mamada na nuku ni wasawasa: O koya oqo ka'u sa rui vosa vakariri kina.

⁴ Ni sa lau ki lomaqu na gasau i Koya sa Kaukauwa; Sa gunuva na yaloqu na kena gaga: Sa tuvai valu kivei au na ka rerevaki mai vua na Kalou.

⁵ Sa tagi beka na asa kila ni sa tu na kena co? Se via tagi na pulumokau ni sa kana tiko?

⁶ Sa kani rawa beka na ka velavela ni sa sega ni vakamasima? Se kamikamica na weli ni yaloka?

⁷ A ka sa bese ni tara na yaloqu, Sa qai yaco me vaka na kakana velavela vei au.

⁸ Me vakayacori mada na noqu kerekere; Ka solia mada na Kalou na ka ka'u sa gadreva!

⁹ Ia ke sa vinaka mada vua na Kalou me vakarusai au; Me sereka na ligana, me muduki au tani!

¹⁰ Au na qai vakacegu rawa; Io, au na qai vakaukauwataki au e na rarawa: me kakua ni vosota ko koya; Ni'u a sega ni vunia na vosa i Koya sa Yalosavasava.

¹¹ A cava na noqu kaukauwa, me'u wawa tiko? Se cava na noqu i otioti, me'u via vakabalavutaka kina na noqu bula?

¹² A noqu kaukauwa na kaukauwa beka ni vatu? Se sa parasa beka na lewequ?

¹³ Sa sega beka ni sa yali vei au na veivuke, Ka sa se tani vei au na vuku dina?

¹⁴ Ko koya sa kana rarawa e dodonu me lomani koya na wekana; Io vei koya de sa biuta na rerevaki Koya sa Kaukauwa.

¹⁵ Eratou sai valavala vakailasu na wekaqu me vaka na soniwai, Eratou sa vaka na soniwai e dautakali yani;

¹⁶ Sa vuvu e na vuku ni wai sa cevata tu, Sa vuni talega kina na uca-vulavula:

¹⁷ Oqori sa yali ni sa katakata mai: Ni sa cilavi siga, sa takali sara mai na kena yasana.

¹⁸ Sa lesu tani na sala ni kenai davedave; Sa yaco ga me segai, me yali sara:

¹⁹ Era sa vakasaqara ko ira nai vavakoso lewe ni sala mai Tima; Era sa waraka ko ira na lewe ni sala mai Sipa:

²⁰ Era sa madua ni ra a vakararavi kina; Era sa lako mai kina, a ra sa taqaya.

²¹ Ni dou sa qai vaka na ka wale; Dou sa raica ni'u sa biu sobu, ia dou sa rere.

²² Au sa kaya beka, Dou kauta mai vei au na ka? Se, Dou solia vei au nai loloma mai na nomudou i yau?

²³ Se, Dou vakabulai au mai na liga ni meca? Se, Dou voli au mai na liga ni kaukauwa?

²⁴ Dou vakavulici au, ka'u na tiko lo; Ia dou vakatakila vei au na ka ka'u sa cala kina.

²⁵ A ka kaukauwa vakaidina na vosa dodonu! Ia ka cava beka na betena na nomudou vunauci au?

²⁶ Dou sa nanuma beka mo dou vunauca na vosa, Ni sa vaka na cagi na vosa sa cavuta ko koya sa luvu na lomana?

²⁷ Io, dou sa luvuci koya na luveniyali, Ka kelia nai keli ni nomudou i tau.

²⁸ Ia dou lomavinaka mada, dou raici au mai; Ni na macala vei kemudou kevaka ka'u lasu.

²⁹ Dou lesu mada mai, kakua ni kaya ni'u sa cala; Ia dou lesu mada, ni sa tu kina na noqu caka dodonu.

³⁰ Sa tiko beka na ka tawa dodonu e yamequ? A gusuqu beka sa sega ni kila rawa na ka e ca?