Jope 28 - AI VOLA TABU

Sa tukuna ko Jope na vuku e na ka vakavuravura e so, 1-11. Ia na vuku dina, sa solia ga na Kalou, a sa ka vinaka sara duaduaga, 12-28.

¹ E dina ni sa dua nai keli ni siliva, kei na yasana sa vakasavasavataki kina na koula.

² Sa kauti mai na qele na aironi, a sa vakawaicalataki na kopa mai na vatu.

³ Sa vakaotia na butobuto ko koya, a sa vakasaqaqara na ka kece sara ga: ia na vatu ni butobuto, kei na yaloyalo ni mate.

⁴ A wai sa vure mai vua sa tiko kina; sa guilecavi e na yava: sa mamaca mai, sa lako tani vei ira na tamata.

⁵ Ia na qele, sa tubu maikina na kakana: a sa cukiti mai rukuna na ka e vaka na buka.

⁶ A kena veivatu na yasana ni safairi, a sa tu kina na kuvu ni koula.

⁷ Sa dua na sala sa sega ni kila e dua na manumanu vuka, a sa sega ni kunea na mata ni vulituri:

⁸ sa sega ni butuka na luve ni laioni, a sa sega ni lako voli kina na laioni kata.

⁹ Sa dodoka ko koya na ligana ki na uluvatu; a sa vukica na veiulu-ni-vanua mai vuna.

¹⁰ Sa basia na dreke ni wai e na maliwa ni veivatu; a sa kunea na ka talei kecega na matana.

¹¹ Sa vauca na uciwai ko koya, me kakua ni vuabale; a sa kauta mai ki na rarama na ka sa vuni.

¹² Ia ka sa kune maivei na vuku? a sa evei na yasana ni yalomatua?

¹³ A tamata, sa sega ni kila na kenai voli; a sa sega ni kune e na vanua ni bula.

¹⁴ Sa kaya na vanua titobu, Sa sega vei au: a sa kaya na wasawasa, Sa sega vei au.

¹⁵ Ena sega ni voli rawa e na koula talei; ia na siliva, ena sega ni vakarau me kenai voli.

¹⁶ Ena sega ni vakatauvatani na kenai voli kei na koula mai Oferi, se na onikisa talei, se na safairi.

¹⁷ Na koula kei na karisitala sa sega ni tautauvata kaya: ia ena sega ni voli rawa e nai yaya koula dina.

¹⁸ Ena sega ni cavuti na lase, se na mata-ni-civa ni sai yau talei na vuku, kai yau lailai na rupi.

¹⁹ A topasa ni Kusi sa sega ni tautauvata kaya; ena sega talega ni vakatauvatani kaya na koula dina.

²⁰ Sa na qai lako maivei na vuku? ia sa evei na vanua me kune kina na yalomatua?

²¹ Ni sa vuni ki na matadra kecega era bula tiko, a sa tabonaki vei ira na manumanu kei lomalagi.

²² O Rusa kei Mate, erau sa kaya, Keirau sa rogoca na kenai rogo e na daliga i keirau.

²³ A Kalou ga sa kila na kenai lakolako, a sa kila ko koya na kena yasana.

²⁴ Ni sa rai ko koya ki nai yalayala kei vuravura, a sa kunea na veiyasana kecega e ruku i lomalagi;

²⁵ me cakava na kenai vakabibi na cagi; a sa vakatovolea na wai e nai vakarau.

²⁶ Ni sa lesia nai valavala ni uca ko koya, kei na sala ni livaliva ni kurukuru:

²⁷ sa qai kunea na ka o qori ko koya, ka tukuna; sa vakarautaka, ka vakadikeva talega.

²⁸ A sa kaya vua na tamata, Raica, na rerevaka na Turaga, o qori na vuku; kei na biuta na ka ca, na yalomatua.