Jope 27 - AI VOLA TABU

Sa vaka ko Jope ni sa yalodina ko koya, 1-7. Sa na ca ga ko koga na dauveivakaisini, 8-10. Ena saumaki na nona ka vinaka na tamata ca me ca kina ko koya, 11-23.

¹ A SA kitaka tiko na nona vosa vakaibalebale ko Jope, ka kaya,

² Me vaka ni sa bula dina na Kalou, o koya sa sega ni via lewai au; ia ko Koya sa Kaukauwa, e sa vakararawataka na yaloqu;

³ ni sa tiko e lomaqu na noqu cegu, kei na cegu ni Kalou e na qara-ni-ucuqu;

⁴ ena sega dina ni vosataka na ka cala na tebenigusuqu, se cavuta na ka veivakaisini na yamequ.

⁵ Me yawa vei au me vakadonui kemudou: au na sega ni biuta tani vei au na noqu yalododonu, ka yacova na siga kaʼu na mate kina.

⁶ A noqu yalododonu kaʼu sa taura matua, kaʼu na sega ni biuta: ena sega ni vunauci au na lomaqu e na veisiga kece ni noqu bula.

⁷ Me tautauvata na noqu meca kei na tamata ca, o koya talega sa tu cake vei au kei na tawa dodonu.

⁸ Ia kevaka sa vutuniyau mai ko koya na dauveivakaisini, a cava na ka me vakararavi kina, ni sa kauta tani na yalona na Kalou?

⁹ Ena rogoca beka na Kalou na nona tagi ni sa qai yacovi koya na ka rarawa?

¹⁰ Ena marautaki Koya beka sa Kaukauwa? ena masu tikoga ki na Kalou?

¹¹ Au na vakavulici kemudou ni sa vukei au na Kalou: au na sega ni vunia na ka sa tiko vei Koya sa Kaukauwa.

¹² Raica, oi kemudou kecega dou sa kunea oti; a cava dou sa qai via vakawalewale sara ga kina?

¹³ O qo na nonai votavota na tamata ca mai vua na Kalou, kei na ka era na taukena nai valavala kaukauwa maivei Koya sa Kaukauwa.

¹⁴ Kevaka eratou sa vakalewevuqataki mai na luvena, eratou na mate e nai seleiwau: era na sega ni mamau talega na nona kawa e na madrai.

¹⁵ 0 ira era vo tiko vua era na buluti e na mate: era na sega talega ni tagi na watina.

¹⁶ Kevaka sa binia vata na siliva me vaka na kuvu-ni-soso, ka vakarautaka nai sulu me vaka na qele;

¹⁷ ena vakarautaka ko koya, ia ena vakaisulu kina na yalododonu, ena vota talega na siliva na tawa cala.

¹⁸ Sa tara na nona vale me vaka na nuve, ka vaka nai cili sa cakava nai vakatawa.

¹⁹ Sa koto sobu na tamata vutuniyau, ia ena sega ni vakasoqoni: sa yadra na matana, a sa yali ko koya.

²⁰ Sa tauvi koya na domobula me vaka na waluvu; sa butakoci koya e na bogi na cava.

²¹ Sa kauti koya tani na tokalau e cake, a sa lako laivi ko koya: a sa cagina tani mai na nona yasana e na cava.

²² Ena biliraki koya, ka sega ni cegu: sa na via dro tani ko koya mai na kena kaukauwa.

²³ Ena cobo vua na cava, ka vakaisaisataki koya tani e na nona yasana.