Jope 23 - AI VOLA TABU

Sa via lako ko Jope ki na mata ni Kalou ni sa vakararavi vua, 1-9. Sa vaka ni sa kila na Kalou na nonai valavala ni sa dodonu, 10-12. Sa rerevaka tale na lewa ni Kalou, 13-17.

¹ A SA vosa ko Jope, ka kaya,

² E na siga edaidai o qo sa gaga na noqu tagi: sa ka bibi na ligamu sa tauci au ka mamada na noqu vutugu.

³ Meʼu kila mada na vanua meʼu kunei koya kina! meʼu torova sara na nonai tikotiko!

⁴ Kaʼu na qai vakadodonutaka na noqu ka e matana, ka vakasinaita na gusuqu e na vakatusa:

⁵ kaʼu na qai kila na vosa ena tauca mai vei au, ka vakasama na ka ena kaya vei au.

⁶ Ena veilewai kei au ko koya e nona kaukauwa levu? E segai; ena vakaukauwataki au ga.

⁷ Ena veilewai rawa kaya maikea ko koya sa yalododonu: ia kaʼu na qai vakabulai sara mai vua sa lewai au.

⁸ Raica, kaʼu sa lako kiliu, a sa sega kina ko koya; kimuri, kaʼu sa sega ni kunea:

⁹ ki na liga i mawi, na yasana sa cakacaka kina ko koya, ia kaʼu sa sega ni kunea: sa tabonaki koya e na liga i matau, au sa sega ni raici koya rawa kina.

¹⁰ Ia ka sa kila ko koya na sala kaʼu sa muria: ni sa vakatovolei au oti ko kova, kaʼu na qai lako mai me vaka na koula.

¹¹ Sa taura na nonai lakolako na yavaqu; a nona sala kaʼu sa vakabauta, ka sega ni lako tani kina.

¹² Au sa sega talega ni biuta na vunau ni tebenigusuna; a vosa ni gusuna kaʼu sa vinakata, ka cata na kequ kakana.

¹³ Ia ka sa dua bau ga na lomana, o cei me saumaka tani? a ka sa vinakata na yalona, sa kitaka ga.

¹⁴ Ni sa ia na ka sa lesia vei au; a sa vuqa na ka vakaoqo sa tiko kaya.

¹⁵ O koya o qo kaʼu sa kidroa kina e matana: niʼu sa vakasama, kaʼu sa rerevaki koya.

¹⁶ Ni sa vakamalumalumutaka na yaloqu na Kalou, a sa vakararawataki au ko Koya sa Kaukauwa:

¹⁷ e na vuku niʼu a sega ni muduki tani ni sa bera ni yaco na butobuto; a sa sega ni tabonaka ko koya na butobuto mai na mataqu.