Jope 22 - AI VOLA TABU

Sa tukuna ko Elifasi ni sa ka tawa yaga vua na Kalou na yalododonu ni tamata, 1-4. Sa beitaki Jope e nai valavala ca, 5-11. Sa tukuna nai valavala vakaturaga ni Kalou, 12-20. Sa vunautaka na veivutuni, kei na kena yaga, 21-30.

¹ SA qai vosa ko Elifasi na kai Temani, ka kaya,

² Me dua beka na tamata me yaga vua na Kalou, me vaka sa yaga vua vakai koya na tamata vuku?

³ Sa marautaka na nomu yalododonu ko Koya sa Kaukauwa? se na vakaivau kina ko koya, ni ko sa vakadodonutaka na nomu sala?

⁴ Ena vunauci iko e na vuku ni sa rerevaki iko? ena ia na veilewai kei iko?

⁵ E sega beka ni ka levu na nomu ca? ka tawa wiliki rawa na nomui valavala ca?

⁶ Ni ko sa kauta tani walega na nona ka na wekamu, ka luvata tani na nodrai sulu era luvawale.

⁷ O sa sega ni solia na medra wai ni gunu era sa oca, ko sa bureitaka talega na kakana vei ira era viakana.

⁸ Ia ko koya na ligamatua, sa nei koya ko vuravura, a sa tiko kina ko koya sa daudokai.

⁹ Ia na alewa dawai ko sa vakatalai ira tani, a ra sa lala tu, a sa musuki na ligadra na luveniyali.

¹⁰ O koya o qo sa voliti iko kina nai cori, a sa vakidroataki iko na rere e veivakidacalataki;

¹¹ se na butobuto, mo kakua ni rai rawa; a sa luvuci iko na wai levu.

¹² Sa sega beka ni tiko na Kalou mai na lomalagi cecere? ia mo raica na kedra cecere na kalokalo, ni sa cecere vakaidina!

¹³ Ia ko sa kaya, Sa kila vakaevei na Kalou? e rawa beka vui me lewa mai na loma ni o?

¹⁴ sa tabonaki koya na o vavaku, a sa sega ni rai rawa kina; a sa lako voli tu e na dela ni drodrolagi.

¹⁵ O sa vakabauta beka na sala makawa, era sa daulako kina na tamata ca?

¹⁶ o ira ka muduki dole na nodra bula, ka ualuvu na ka era tiko dei kina:

¹⁷ o ira ka kaya vua na Kalou, Mo lako tani vei keitou: se cava beka me na kitaka ko Koya sa Kaukauwa me nodra?

¹⁸ A sa vakasinaita ga na nodra veivale e na ka vinaka! a sa yawa ga vei au na nodra lewa na tamata ca!

¹⁹ Era sa kunea ko ira na yalododonu, ka reki kina: a sa dredrevaki ira ko koya sa tawa cala.

²⁰ A sa tawa muduki na neitou ka, ia na ka sa vo tu vei ira sa vakamai e na buka.

²¹ Mo drau veikilaki mada kaya, mo drau veivinakati: ena yaco kina vei iko na vinaka.

²² Mo vakabauta mada na vunau ni gusuna, ka binia na nona vosa ki lomamu.

²³ Kevaka ko sa lesu mai vei Koya sa Kaukauwa, o na tara cake; o na vakayawataka nai valavala ca ki na nomu vale.

²⁴ O na qai biuta na koula ki na dela ni soso; kei na koula ni Ofiri ki na veivatu ni wai drodro.

²⁵ Io, ena qai yaco me nomu bai ni valu ko Koya sa Kaukauwa, me nomu siliva levu talega.

²⁶ Ni ko na qai rekitaki Koya sa Kaukauwa, ka ta cake e na matamu vua na Kalou.

²⁷ O na kitaka vua na nomu masu, ia ena rogoci iko, o na ia talega na ka ko sa yalataka vua.

²⁸ O na lesia na ka, ia ena vakataudeitaki vei iko: ena cilava talega na nomu sala na rarama.

²⁹ Ni sa ia na veivakabalei, ko na kaya, Me laveti cake: ia ena Vakabula ko koya na yalomalumalumu.

³⁰ O koya sa tawa cala ena vakabulai koya sa cala: ia ena vakabulai e na vuku ni sa savasava na ligamu.