Jope 20 - AI VOLA TABU

Sa tukuna ko Sofari na ka ena yaco vei ira nai valavala ca.

¹ SA qai vosa ko Sofari na kai Neema, ka kaya,

² O koya o qo sa kitaki au kina na nanuma ni lomaqu meʼu vosa, kaʼu sa kusarawa e na vuku ni ka o qo.

³ Au sa rogoca na vunau meʼu madua kina: a sa ciqeti au na yaloqu matua meʼu tabana yani.

⁴ O sa tawa kila makawa beka na ka o qo, mai na gauna sa vakatikori kina na tamata e vuravura,

⁵ ni sa ka lekaleka na nodra vakaue nai valavala ca, a sa oti rawarawa sara na marau ni dauveivakaisini?

⁶ Kevaka sa vueta na nona totoka ki lomalagi, ka sa yala ki na o na uluna;

⁷ ena yali laivi sara ga me vaka na dena: o ira sa raica era na kaya, Evei ko koya?

⁸ Ena vuka tani yani ko koya me vaka na tadra, ka tawa kune tale: ia ena vakasevi tani me vaka na raivotu e na bogi.

⁹ A mata i koya talega ka kunea ena tawa kunea tale; ena sega ni raici koya tale na nona yasana.

¹⁰ A luvena era na via vakayalovinakataki ira na kaisi, ena vakasuka talega na ligana na nodrai yau.

¹¹ A suina sa sinai tu e nonai valavala ca ni ka cauravou, ena koto sobu kaya e na kuvu-ni-soso.

¹² Kevaka sa kamikamica nai valavala ca e na gusuna; ka sa vunia e ruku ni yamena;

¹³ ka sa maninitaka, ka sega ni biuta; ka sa maroroya tiko ga e gusuna:

¹⁴ ke sa dua tani mai na kena kakana e ketena, a sa mi ni gata mai e lomana.

¹⁵ Sa tiloma oti nai yau, ia ena luaraka tale: ena biuta tani mai na ketena ko na Kalou.

¹⁶ Ena sucuma na wai gaga ni gata; ena vakamatei koya na yame ni gata loa.

¹⁷ Ena sega ni raica na soniwai, kei na uciwai, kei nai davedave oni kei na uro ni wai-ni-sucu.

¹⁸ A ka sa oca kina ena vakasuka tale, ka sega ni tiloma: me vaka na nonai yau ena solia tale ko koya, ena sega ni rekitaka.

¹⁹ E na vuku ni sa vakasaurarataka ka biuta na dravudravua; a sa kovea na vale sa sega ni tara ko koya;

²⁰ ena sega dina ni cegu na ketena; ena sega ni drotaka ko koya na ka sa domona.

²¹ Ena sega e vo me kania na kena; o koya o qo ena sega kina na nonai yau me vo tu.

²² Ni sa vutuniyau sara tiko ena dravudravua mai: ena yacovi koya na ligadra kecega nai valavala ca.

²³ Ni sa laʼki vakamamautaka na ketena, ena vakatauca vua na Kalou na nona cudru katakata, ena vakatauca vua ni sa kana tiko.

²⁴ Ena dro tani mai nai yaragi aironi, ia na gasau ni dakai parasa ena laubasikataki koya.

²⁵ Sa ucuni mai, sa laubasikataka na yagona; io, nai seleiwau makamakalivata ena laubasikataka na mina: sa tauvi koya na domobula.

²⁶ A butobuto kecega ena vuni tu e nona yasana vuni: a buka sa sega ni irivi ena kati koya; ena ca ko koya sa vo tiko e nona vale.

²⁷ Ena tukuna na nonai valavala ca ko lomalagi; ena tu cake talega vua ko vuravura.

²⁸ Ena lako tani nai yau sa tubu e nona vale, ena dave yani e na siga ni cudru i Koya.

²⁹ O qo nai votavota ni tamatai valavala ca mai vua na Kalou, kei na ka sa rotaka na Kalou me nona.