Jope 15 - AI VOLA TABU

Sa vunauci Jope ko Elifasi e na vuku ni sa vakadonui koya vakai koya, 1-16; a sa tukuna na nodra tawa cegu rawa na tamata ca, 17-35.

¹ SA qai vosa ko Elifasi na kai Temani, ka kaya,

² Me cavuta li na vuku tawa yaga na vuku, ka vakamamautaka na ketena e na cagi tokalau?

³ Me vosataka beka na vosa tawa yaga? kei nai vakavuvuli sa sega ni vakabetena?

⁴ Ia ko iko, ko sa biuta tani na rere, ka tarova na masu e na mata ni Kalou.

⁵ Ni sa tukuna na gusumu na nomui valavala ca, ko sa digitaka na vosa dauveivaqaseni.

⁶ A gusumu ga sa vakacalai iko, ka sega koi au: ia na tebenigusumu ga sa tukuni iko.

⁷ O iko beka nai matai ni tamata ka sucu? se ko buli mada eliu ko iko ka qai buli emuri na veiulu-ni-vanua?

⁸ O sa rogoca beka na bose vuni ni Kalou? se ko sa tarova li na vuku me nomu ga?

⁹ A cava ko kila, me keitou tawa kila talega? se ko vakasama na cava, me sega talega vei keitou?

¹⁰ Sa tiko vei keitou na ulu sika kei na qase dina talega, sa gone ko tamamu.

¹¹ Sa ka lailai beka vei iko na veivakacegui ni Kalou? se dua beka na ka vuni sa tu vei iko?

¹² A cava sa kauti iko vakatani kina na lomamu? se cava sa goleva na matamu,

¹³ mo sa vakaukauwataka kina na yalomu vua na Kalou, ka laiva na gusumu me cavuta mai na vosa vakaoqori?

¹⁴ A cava na tamata, me savasava ko koya? kei koya sa sucu vua na alewa, me yalododonu ko koya?

¹⁵ Raica, sa sega ni vakadinati ira na nona era yalosavasava; ia sa sega ni savasava na lomalagi e matana.

¹⁶ A sa vakaevei na kena vakasisila kei na kena dukadukali na tamata, o koya sa daugu-nuva na ca me vaka na wai?

¹⁷ Au na vakatakila vei iko, rogoci au mai; ia na ka kaʼu a raica kaʼu na tukuna;

¹⁸ o qori era sa tukuna maivei ira na nodra qase ko ira na vuku, a ra sa sega ni vunia:

¹⁹ o ira ga ka soli kina ko vuravura, ka sega na kai tani me veilakovi kei ira.

²⁰ Sa dauvakararawataki koya vakai koya na tamata ca e na nona siga kecega, i a sa vunitaki vua na dauivalavala kaukauwa se na vica beka na nona yabaki.

²¹ Sa rorogo tu e daligana na ka rerevaki: ni sa sautu tiko, ena yacovi koya na dau-veivakarusai.

²² Sa sega ni dinata ni na lesu tale mai na butobuto, a sa waraki koya tu nai seleiwau.

²³ Sa qara sese voli tu na kena, ka kaya, Sa evei? sa kila ko koya ni sa voleka sara vua na siga ni butobuto.

²⁴ Sa vakarerei koya na rarawa kei na yaluma: ena gumatua vua, me vaka na tui sa vakarau ki nai valu.

²⁵ Ni sa laveta na ligana vua na Kalou, a sa vakaukauwataki koya me veivala kaya sa Kaukauwa.

²⁶ Sa cici vakadomoqa vei koya, e na nonai sasabai sukusukura:

²⁷ e na vuku ni sa ubia na matana e nona uro, a sa uro mai na nonai ivi.

²⁸ Ia ena tiko ga ko koya e na veikoro lala, e na veivale sa sega e vakatawa, ka sa voleka ni rusa:

²⁹ ena sega ni vutuniyau ko koya, ena sega ni dei na nona ka, ena sega talega ni vakadedetaka na kena vinaka e vuravura.

³⁰ Ena sega ni lako tani mai na butobuto; ena malai yani na tabana e na yameyame-ni-buka, ena takali talega ko koya e na cegu ni gusu i Koya.

³¹ Me kakua na dau vakacalai me vakararavi e na ka tawa yaga: ni na ka tawa yaga na kenai sau.

³² Ni sa tawa taucoko na kena gauna sa rusa ga, ena sega talega ni bulabula na tabana.

³³ Ena kuretaki sobu na vuana vou me vaka na vaini, ena mimira na sena me vaka na olive.

³⁴ Ni na lala na nodrai soqosoqo na dauveivakaisini, ia na buka ena katia na nodra veivale era tarai yau ni vere.

³⁵ Era sa kunekune taka na ca, ka vakasucuma na lasu, a sa vakarautaka na veivakaisini na lomadra.