EFƐ́ZI KHÚBHƐ́NƐ́N 1 - Ebrié New Testament 1996

Phɔ́lu ébhi néphan

¹ Mɛn Phɔ́lu khɛ́n Yankan pɔ sa mɛn ní Jezwi-Krisi-mranchɛ́wo ɔn, mɛn nɔn mɛɛ́n thu hrɔ́ lókɔn. Áhrɔ́ lókɔn, mɛn tɛ mɛɛ́n thu hɔ́n khɛ́n ɔ́n ni Yankan-gbemán abha Efɛ́zi khúbhɛ́, khɛ́n ahɔn wo bɛn nbrɛn ka Jezwi-Krisi phɔ, khɛ́n agɛ nkɛ ɔ́nmɔn li brɛ:

² Tɛmɛ lo The Yankan le lo Hwánthe Jezwi-Krisi ɔ́nmɔn osé hɔ́n áphɔlíman le ńthɛ́nkhwálé.

Yankan yíbhwá akhɔ Jezwi-Krisi phɔ tɛ se lo

³ Tɛmɛ lo lri Yankan hwa, mɛ́n nɔn ńni lo Hwánthe Jezwi-Krisi mɛ́n The! Ńmɔ lo ndu dɔndɔn, ali átho ndubhɔ́ khúnbrɛn khɛ́n achan Nánnánmi Créncré yé, Krisi phɔ lo bha hɛ́nthé.

⁴ Átɛsalé lóka Yankan ka tɛ áthéji bhrɔ́ɔ́, lónɔn ńsan lo tre njɛ, sa lo bha lí mɛ́n néphan Krisi hɛ́n hrómɛn, ló ochɛ́sé lo tɛ́ créncré mɛ́n hɛ́nmɛn, olépɛ yíléle lo phɔ. Yankan mɛ́n pɔ́ hrómɛn,

⁵ ńdɛn tre sa ánman khɔ́ Jezwi-Krisi phɔ chɛ́ lo lí mɛ́n miɔn, átɛsalé ńpɔ lóbhwe lókɔn, ló álimɛn.

⁶ Tɛmɛ olri Yankan hwa, mɛ́n phɔlíman khóo hɛ́nthé, áphɔlíman khɛ́n ńkhɔ mɛ́n Bhi ńpɔ phɔ mo se lo wɛ́-nwɛ́.

⁷ Átɛsalé Krisi khú hrómɛn nɔn wo khɔ swa lo, Krisi khú hrómɛn nɔn wo khɔ yɔ lo ne phɔ́ lo. Lóhrómɛn nɔn Yankan khɔ lie lo sa,

⁸ mɛ́n phɔlíman nfɛkhuwú thúbhɔ nkhóo. Ló ńmo thubhɔ se lo, ochɛ́sé lo pɛ hɛ́nphe, ló lo yɛ́n bhwe thúbhɔ:

⁹ Áyí ahrɔman tre, khɛ́n mɛ́n nbrɛn ánman khɔ́ Krisi phɔ tɛ́, ńchɛ lo yɛn lóyí lókɔn.

¹⁰ Lóka áthéji cí bha sí, Yankan nbrɛn bha tɛ́ lóyí lókɔn phú, lónɔn ali salé, wo bhá khwɛ́n áyí khúnbrɛn abha átho, le ló abha áthéji ɔ́nmɔn bhɔha sibrɛ, ábha bhá athe brɛ mɔ́n mɛn, athe lókɔn, mɛ́n nɔn ńni Krisi.

¹¹ Lo le Krisi ɔ́nmɔn brɛ lo li nɔn achɛ Yankan swa lo, Yankan phrɛ thwasi san lo tre, sa lósi ńkhɔ tɔ lóbhwe tre a. Yankan nbrɛn yí apɔ khɛ́n adɛn tre ebhá tɛ́, ánman tɛ́ lóyí lókɔn cɛ́ɛ́.

¹² Lo khɛ́n lo li néphan aphrɛ pɛ mwasrui bha Krisi tho ɔn, tɛmɛ lo lri Yankan lephan khóo ali hwa!

¹³ Lóka ɔ́n ye ábhwe mímí, ali Ábhwe Bhwábhwá ado hɔ́n ka ɔn, hɔ́n lɔ ɔ́n mu Krisi mímí. Nánnánmi Créncré khɛ́n Yankan tɔ nkɛ bhwe tre ɔn, ńmo se hɔ́n ló átrɛ́ hɔ́n tre.

¹⁴ Adóká atɛsa ajayí khɛ́n Yankan tɔ lóbhwe tre mɛ́n hwannɛ́n lé, Nánnánmi Créncré obhó sé hɔ́n, lónɔn ali lo wɔbha oha tre. Anchɛ́ lo yɛ́n sa, mímí nbrɛn, lóka wo bhá swa lo phú hwáán, lónɔn lo bhá gɛ lóyí lókɔn. Tɛmɛ olri Yankan lephan khóo ali hwa!

Phɔ́lu Yankan éla

¹⁵ Lóbhwe khúnbrɛn hɛ́nthé nɔn, lóka wo kranman mɛn salé ɔ́n mu Hwánthe Jezwi mímí, ló hɔ́n epɔ́ Yankan néphan lɔ ɔn,

¹⁶ hɔ́n hɛ́nthé mɛɛ́n na Yankan ákakhúnbrɛn, mɛn mɛ́n le thú. Mɛn yankanla hromɛn, hɔ́n bhwe di mɛn mwanhɛ́n

¹⁷ ló mɛɛ́n mi Yankan ali lo Hwánthe Jezwi-Krisi Yankan, Yankan ali ńguhá-óthe, sa ansé hɔ́n ábhweyɛ́n Nánnánmi, Nánnánmi khɛ́n ábha bhó Yankan lie hɔ́n, khɛ́n ábha chɛ́ hɔ́n yɛ́n mɛ́n bhwethé.

¹⁸ Mɛɛ́n nɛn salé hɔ́n hɛ́nphebhú hrómɛn opɛ áyéfí, ochɛ́sé ɔ́n yɛ́n mwasrui khɛ́n Yankan khɔ lóhrómɛn éche hɔ́n, ló ɔ́n yɛ́n ajayí mímí ali áyíbhwá khɛ́n ńmo tre mɛ́n hwannɛ́n lé,

¹⁹ ló lo yɛ́n sɛ́npɛ́ yábhɛ khɛ́n ńmo tre lo khɛ́n lo li mímíbhúmán lé. Lósɛ́npɛ́ yábhɛ brɛ lókɔn hromɛn nɔn,

²⁰ Yankan khɔ chɛ Krisi chan khúnɔn mɛn fe, ló ńchɛ nkɛ chre mɛ́n liémɔn si átho lóne.

²¹ Krisi chre átho lóne, ńsrɛn mɔ́nkáthomán khúnbrɛn, ńsrɛn sɛ́npɛ́mán khúnbrɛn le áyí khúnbrɛn khɛ́n atre lókhúnbrɛn lókɔn lé le ńhɛ́n khúnbrɛn khɛ́n wo elú. Léli ńhɛ́n abha áthéji krɛn pán, khɛ́n ló atre hɛ́nmɛn ebhá lɔ.

²² Yankan chɛ Krisi chaya áyí khúnbrɛn tho, ló ńhɔn Krisi se Yankan-gbemán sa anní wo khúnbrɛn wo The.

²³ Yankan-gbemán li Krisi nánmí, ló wo hromɛn nɔn Krisi bha, ló Krisi lókɔn ɔn, mɛ́n nɔn ńpi áthé le átho ɔ́nmɔn.