ག་ལ་ཏི་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

^1-2 ང་སྐུ་ཚབ་ པའུལ་དང་ ང་དང་གཅིག་ཁར་ཡོད་མིའི་དདཔ་ཅན་སྤུན་ཆ་ག་ར་གིས་ ག་ལ་ཏི་ལུ་ཡོད་མིའི་ཆོས་ཚོགས་ཚུ་ལུ་ཨ་ནི་ཡི་གུ་འདི་འབྲི་དོ་ སྐུ་ཚབ་ཀྱི་འགན་ཁུར་འདི་མི་ལས་མ་ཐོབ་ མི་ག་གིས་ཡང་སྐྱེལ་སྐྱེལཝ་མེན་ དེ་འབདཝ་ད་ ཨ་ནི་ལཱ་འདི་ཡེ་ཤུ་ཁིརཱིས་དང་ ཁོ་གཤགས་ས་ལས་གསོན་པོ་སྦེ་ བཞེངས་གནང་མིའི་ཡབ་དཀོན་མཆོག་གིས་ ང་ལུ་གནང་གནངམ་ཨིན།

³ ཡབ་དཀོན་མཆོག་དང་ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་ཐུགས་རྗེ་དང་ཞི་བདེ་ ཁྱེད་དང་གཅིག་ཁར་བཞུགས་བཅུག

⁴ ང་བཅས་ཀྱི་ཡབ་དཀོན་མཆོག་གི་ཐུགས་དགོངས་བཞིན་དུ་ ང་བཅས་ཀྱི་སྡིག་པ་བཀའ་དྲིན་བསྐྱང་ནིའི་དོན་ལུ་ ཡེ་ཤུ་ཁོ་རའི་སྐུ་སྲོག་གནང་སྟེ་ ད་ལྟོ་གི་འཛམ་གླིང་ངན་པ་འདི་ལས་ང་བཅས་ལུ་སྐྱབས་མཛད་གནང་ཡི།

⁵ དུས་རྟག་བུ་རང་དཀོན་མཆོག་ལུ་གཟི་བརྗིད་ཡོངས་སུ་བབ་པར་ཤོག་ ཨ་མཱེན།།

གཏམ་བཟང་འདི་གཅིག་ལས་བརྒལ་མེད་པའི་སྐོར།

⁶ ཁྱེད་ལུ་ཁིརཱིས་ཀྱི་ཐུགས་རྗེ་ལས་སྦེ་འབོ་མི་དཀོན་མཆོག་ལུ་ དེ་འཕྲོ་ལས་རང་བཀོག་བཞག་སྟེ་ ཁྱེད་ཆ་ཁྱབ་ཀྱིས་གཏམ་བཟང་མ་འདྲཝ་གཅིག་གི་རྟིང་བདའ་འགྱོ་མི་འདི་ལུ་ ང་གནམ་མེད་ས་མེད་ཧ་ལས་ཅི།

⁷ ཨ་ནི་འདི་གཏམ་བཟང་ངོ་མ་མེན་ མི་ལ་ལུ་ཅིག་གིས་ཁྱེད་ཀྱི་སེམས་དཀྲུག་ནི་དང་ ཁིརཱིས་ཀྱི་གཏམ་བཟང་དེ་དོན་དག་གཞན་ལུ་བསྒྱུར་གཏང་ནི་སྦེ་ཨིན་མས།

⁸ ང་བཅས་ཀྱིས་ཧེ་མ་བཤད་མིའི་གཏམ་བཟང་ལས་འགལ་མི་གཅིག་འོང་པ་ཅིན་ ད་རུང་ལོག་སྟེ་ང་བཅས་རང་གིས་བཤད་རུང་འདྲ་ ཞིང་ཁམས་ཀྱི་ཕོ་ཉ་འོངས་ཏེ་བཤད་རུང་འདྲ་ ཁོ་ལུ་མཐའ་མེད་པའི་ཆདཔ་ཕོག་བཅུག

⁹ ང་གིས་ད་ལྟོ་སླབ་དོཝ་བཟུམ་སྦེ་ ད་རུང་ཡང་སླབ་དོ་ ག་གིས་རང་འབད་རུང་ ཁྱེད་ཀྱིས་ཧེ་མ་ལས་གོ་མིའི་གཏམ་བཟང་འདི་ལས་འགལ་མི་གཅིག་ གཞན་གཅིག་གིས་བཤད་པ་ཅིན་ དེ་ལུ་མཐའ་མེད་པའི་ཆདཔ་ཕོག་བཅུག།

པའུལ་དཀོན་མཆོག་གིས་འབོ་པའི་སྐོར།

¹⁰ གོང་ལས་སླབ་མི་འདི་ ང་གིས་མི་གི་སེམས་ལྷུ་ནི་གི་དོན་ལུ་སླབ་ཨིན་ན་ ཡང་ན་དཀོན་མཆོག་གི་ཐུགས་དགྱེས་བཅུག་ནི་གི་དོན་ལུ་སླབ་ཨིན་ན་ ག་དེམ་ཅིག་སྦེ་ ང་གིས་ད་ལྟོ་ཡང་ མི་གི་སེམས་ལྷུ་ནི་གི་དོན་ལུ་ཐབས་ཤེས་འགྱིརཝ་ཨིན་པ་ཅིན་ ང་ཁིརཱིས་ཀྱི་ཕྱག་ཞུ་མི་མེན།

¹¹ ངེ་གི་སྤུན་ཆ་ཚུ་ ང་གིས་བཤད་མིའི་གཏམ་བཟང་འདི་ མི་གིས་བཟོ་བཟོཝ་མེན་ཟེར་ ཁྱེད་ཀྱི་དོན་ལུ་གསལ་ཏོག་ཏོ་སྦེ་སླབ་དགོ་མནོ་ཡི།

¹² ཨ་ནི་གཏམ་བཟང་འདི་ ང་ལུ་མི་ག་གིས་ཡང་བྱིན་བྱིནམ་མེན་ མི་གིས་སྟོན་སྟོནམ་ཡང་མེན་ དེ་འབདཝ་ད་ ཡེ་ཤུ་ཁིརཱིས་ཀྱིས་ ང་ལུ་དངོས་སུ་སྦེ་མཇལ་ཁ་གནང་སྟེ་ ང་གིས་འདི་ཁོ་ལས་ཐོབ་ཐོབ་ཨིན།

¹³ ག་ཅི་སྨོ་ཟེར་བ་ཅིན་ ཡ་ཧུ་ད་པའི་ཆོས་ལུགས་འདི་ ང་གིས་གནམ་མེད་ས་མེད་བརྩོན་ཤུགས་བསྐྱེད་དེ་སྡོད་པའི་བསྒང་ལུ་ དཀོན་མཆོག་གི་ཆོས་ཚོགས་ལུ་བསམ་པ་ངན་པ་གིས་གནོད་འཚེ་བཀལ་ཏེ་ མེདཔ་གཏང་ནི་གི་ཐབས་ཤེས་འགྱིར་བའི་བློ་འདི་ཚུ་ ཁྱེད་ཀྱིས་གོ་ཡི།

¹⁴ ང་བཅས་ཀྱི་ཕ་བརྒྱུད་ཀྱི་ལུགས་སྲོལ་ལྟར་དུ་ གནམ་མེད་ས་མེད་བརྩོན་ཤུགས་བསྐྱེད་མི་ཅིག་ཨིནམ་མ་ཚད་ ང་དང་ན་ཚོད་མཉམ་མི་འདི་ཚུ་ལས་ཡང་ལྷག་པའི་ ཡ་ཧུ་ད་པའི་ཆོས་ལུགས་དེ་ ང་གིས་འབད་ཡི།

¹⁵ དེ་འབདཝ་ད་ ང་ཨའི་གི་མངལ་ལས་བཙག་འཐུ་མཛད་དེ་ དཀོན་མཆོག་གི་ཐུགས་རྗེ་དེ་གིས་ ང་ལུ་འབོ་ནི་གི་འོས་འབབ་མེད་རུང་རང་ ཁོ་གིས་ཐུགས་དགྱེས་ཏེ་ ང་ལུ་འབོ་འབོཔ་ཨིནམ་མ་ཚད།

¹⁶ ང་གིས་ཡེ་ཤུ་གི་སྐོར་ལས་གཏམ་བཟང་འདི་ ཕྱིའི་མི་རིགས་ཚུ་ལུ་བཤད་ནི་གི་དོན་ལུ་ དཀོན་མཆོག་གིས་ཁོ་རའི་སྲས་དངོས་སུ་སྦེ་ ངེའི་ནང་བཏོན་གནང་ཡི་ དེ་ལས་ང་གིས་མི་ག་དང་ཡང་འབྲེལ་བ་མ་འཐབ་མ་ཚད།

¹⁷ རྒྱལ་ས་ ཡེ་རུ་ཤ་ལེམ་ལུ་སྐུ་ཚབ་ཚུ་དང་འཕྱད་པ་ཡང་མ་སོང་པར་ དེ་འཕྲོ་ལས་རྒྱལ་ཁབ་ ཨ་ར་བི་ཡ་ནང་འགྱོ་སྟེ་ དེ་གི་ཤུལ་ལས་ཁྲོམ་ ད་མཱས་ཀཱོས་ནང་ལོག་འོང་ཡི།

¹⁸ དེ་ལས་ལོ་གསུམ་གྱི་ཤུལ་ལས་ ང་ ཀེ་ཕཱས་དང་འཕྱད་ནི་སྦེ་ ཡེ་རུ་ཤ་ལེམ་ལུ་སོང་སྟེ་ ཁོ་དང་གཅིག་ཁར་ཉིནམ་བཅོ་ལྔ་སྡོད་རུང་།

¹⁹ གཙོ་བོ་གི་ནུ་གཅུང་ ཡ་ཀོབ་མ་གཏོགས་ སྐུ་ཚབ་གཞན་ག་ཡང་མ་འཕྱད།

²⁰ (དོན་ལས་རང་ང་གིས་ དཀོན་མཆོག་གི་གཟིགས་སར་ ཤོབ་མ་རྐྱབ་པར་ ཁྱེད་ལུ་བདེན་པ་འདི་འབྲིཝ་ཨིན།)

²¹ དེ་གི་ཤུལ་ལས་ ང་ལུང་ཕྱོགས་ སི་རི་ཡ་དང་ ཀི་ལི་ཀི་ཡ་ལུ་སོང་ཡི།

²² དེ་ལས་ ཡུ་དེ་ཡ་ལུང་ཕྱོགས་ལུ་ཡོད་མི་ ཁིརཱིས་ཀྱི་ཆོས་ཚོགས་ཚུ་གིས་ མ་པ་ལས་རང་ང་ལུ་ངོ་མ་ཤེས།

²³ དེ་འབདཝ་ད་ ཧེ་མ་ང་བཅས་ལུ་གནོདཔ་བཀལ་མི་དེ་གིས་ མེདཔ་གཏང་ནི་འབད་མིའི་ཆོས་དེ་རང་ ད་ལྟོ་ཁོ་གིས་ཁྱབ་བསྒྲགས་གཏང་དེས་ཟེར་ མི་གཞན་གྱི་ཁ་ལས་ ཁོང་གིས་གོ་ནུག

²⁴ དེ་གིས་འབད་ ང་ལུ་ག་བྱུང་མི་ལས་སྦེ་ ཁོང་གིས་དཀོན་མཆོག་ལུ་བསྟོད་པ་ཕུལ་ནུག།