ཀོ་རཱིན་ཐི་གཉིས་པ་ལེའུ་ 1 - རྫོང་ཁ་

བཀྲ་ཤིས་བདེ་ལེགས་ཞུ་བའི་སྐོར།

¹ དཀོན་མཆོག་གི་ཐུགས་དགོངས་བཞིན་དུ་ ཁིརཱིས་ཡེ་ཤུ་གི་སྐུ་ཚབ་སྦེ་བཀལ་གནང་མི་ ང་ པའུལ་དང་ ང་བཅས་ཀྱི་སྤུན་ཆ་ ཏི་མོ་ཐི་ལས་ ཁྲོམ་ ཀོ་རཱིན་ཐི་ལུ་ཡོད་མི་དཀོན་མཆོག་གི་ཆོས་ཚོགས་དང་ ལུང་ཕྱོགས་ ཨ་ཀེ་ཡ་ལུ་ཡོད་མི་ དཀོན་མཆོག་ཁོ་རའི་དམ་པའི་མི་ཚུ་ལུ་ ཡི་གུ་འདི་བྲིས་དོ།

² ང་བཅས་ཀྱི་ཡབ་དཀོན་མཆོག་དང་ གཙོ་བོ་ཡེ་ཤུ་ཁིརཱིས་ཀྱིས་ ཁྱེད་ལུ་ཐུགས་རྗེ་དང་ཞི་བདེ་གནང་བཅུག།

སེམས་གསོ་གི་སྐོར།

³ ང་བཅས་ཀྱི་གཙོ་བོ་ཡེ་ཤུ་ཁིརཱིས་ཀྱི་ཡབ་དཀོན་མཆོག་ལུ་ བསྟོད་པ་ཕུལ་བར་ཤོག་ ཁོ་ང་བཅས་ཀྱི་དོན་ལུ་ སྙིང་རྗེ་གཟིགས་མི་ཡབ་དང་ སེམས་གསོ་གནང་མིའི་དཀོན་མཆོག་ཨིན།

⁴ ང་བཅས་དཀའ་ངལ་དང་ སྡུག་བསྔལ་མྱོངམ་ད་ དེ་ཚུ་ག་ར་ནང་ལས་ཁོ་གིས་ སེམས་གསོ་གནངམ་ཨིན་ དེ་འབདཝ་ལས་ ང་བཅས་སེམས་གསོ་ཐོབ་མི་ཚུ་གིས་ གཞན་དཀའ་ངལ་མྱོང་མི་ཚུ་ལུ་ དཀོན་མཆོག་གིས་གནང་མིའི་སེམས་གསོ་འདི་ ཁོང་ལུ་བྱིན་ཚུགས།

⁵ ག་ཅི་སྨོ་ཟེར་བ་ཅིན་ དོན་ལས་རང་ ང་བཅས་ཀྱིས་ ཁིརཱིས་ཀྱི་དོན་ལུ་སྡུག་བསྔལ་ག་དེ་ཅིག་མྱོངམ་ཨིན་ན་ དེ་ལས་ཡང་ལྷགཔ་སྦེ་ ཁིརཱིས་ཀྱི་ཐོག་ལས་ དཀོན་མཆོག་གིས་ང་བཅས་ལུ་སེམས་གསོ་གནངམ་ཨིན།

⁶ དེ་འབདཝ་ད་ ང་བཅས་དཀའ་ངལ་དང་སྡུག་བསྔལ་མྱོངམ་ད་ འདི་གིས་ ཁྱེད་ཡང་སེམས་གསོ་དང་ཐར་པ་ཐོབ་ནི་གི་དོན་ལུ་ཨིན་ ད་རུང་ང་བཅས་ལུ་སེམས་གསོ་གནངམ་ད་ འདི་ཁྱེད་ཀྱི་དོན་ལུ་ཡང་སེམས་གསོ་གནངམ་ཨིན་ ག་ཅི་སྨོ་ཟེར་བ་ཅིན་ ཁྱེད་ཀྱིས་ཡང་ ང་བཅས་བཟུམ་སྦེ་དཀའ་ངལ་མྱོངམ་ད་ སེམས་གསོ་དེ་གིས་འབད་ བཟོད་སེམས་བསྐྱེད་དེ་ དཀའ་ངལ་དང་སྡུག་བསྔལ་བཟོད་ཚུགས།

⁷ དེ་གིས་འབད་ ཁྱེད་ཀྱིས་ཡང་ ཁིརཱིས་ཀྱི་དོན་ལུ་མྱོང་མི་དཀའ་ངལ་འདི་ ང་བཅས་དང་མཉམ་གཅིག་མྱོང་པ་ཅིན་ ཁོ་གིས་ང་བཅས་ལུ་གནང་མི་སེམས་གསོ་འདི་ ཁྱེད་ཀྱིས་ཡང་ཐོབ་འོང་ཟེར་ ང་བཅས་ཀྱིས་ཐད་རི་བ་རི་ཤེས།

⁸ ཁྱེད་སྤུན་ཆ་ཚུ་གིས་ ཨ་ནི་འདི་ཤེས་དགོ་ཟེར་མནོ་ཡི་ ང་བཅས་ལུང་ཕྱོགས་ ཨེ་སི་ཡ་ནང་དཀའ་ངལ་མྱོངམ་ད་ བཟོད་མ་ཚུགས་པའི་ སྡུག་བསྔལ་སྦོམ་གྱིས་ ང་བཅས་ཀྱི་གུ་ལུ་མནན་ཡི་ དེ་བསྒང་ལུ་ང་བཅས་གསོན་པོ་ སྡོད་ནི་གི་རེ་བ་ཡང་རྫོགས་སོང་ཡི།

⁹ ང་བཅས་ཐད་རི་བ་རི་རང་ཤི་ནི་མས་ཟེར་ མནོ་བསམ་གཏང་ཡི་ དེ་ཚུ་བྱུང་བའི་ཐོག་ལས་ རང་གིས་རང་ལུ་ བློ་གཏད་ནི་མེད་ཟེར་ཤེས་ཅི་ དེ་འབདཝ་ད་ ཤི་ས་ལས་གསོན་པོ་ ལྷོང་གནང་མིའི་དཀོན་མཆོག་ལུ་བློ་གཏད་དགོཔ་ཨིན་མས་ཟེར་ཡང་ཤེས་ཅི།

¹⁰ དེ་ལས་ཁོ་གིས་ང་བཅས་ལུ་ ཤི་བའི་ལམ་ལས་སྐྱབས་མཛད་དེ་གནང་ཡི་ ད་ལྟོ་ཡང་ སྐྱབས་མཛད་གནང་དོ་ ཤུལ་མ་ཡང་སྐྱབས་མཛད་གནང་འོང་ཟེར་ ང་བཅས་ཁོ་ལུ་ཆ་བཞག་སྟེ་ རེ་བ་བསྐྱེདཔ་ཨིན།

¹¹ དེ་ལས་ཁྱེད་ཀྱིས་ཡང་ ང་བཅས་ཀྱི་དོན་ལུ་སྨོན་ལམ་བཏབ་སྟེ་ ཆ་རོགས་འབད་དགོ་ དེ་སྦེ་འབདཝ་ལས་བརྟེན་ ཁྱེད་ཀྱི་སྨོན་ལམ་འདི་ དཀོན་མཆོག་གིས་གསན་ཏེ་ ང་བཅས་ལུ་སྲུང་སྐྱོབས་མཛད་གནངམ་ད་ མི་ལེ་ཤ་གིས་བཀྲིན་དགའ་ཚོར་འཕུལ་འོང་།།

པའུལ་གྱིས་ཁོ་རང་གི་འཆར་གཞི་བསྒྱུར་བཅོས་འབད་བའི་སྐོར།

¹² ང་བཅས་ཀྱི་བྱ་སྤྱོད་དེ་ མི་ག་ར་གི་སྦུག་ལུ་འབད་རུང་ ལྷག་པར་དུ་ ཁྱེད་ཀྱི་སྦུག་ལུ་འབད་རུང་ དྲང་སེམས་དང་སེམས་དམ་པ་གི་ཐོག་ལས་ སྤྱོད་ལམ་ལེགས་ཤོམ་བཏོན་སྡོད་ཅི་ འདི་མི་གི་ཤེས་རབ་ཀྱི་ཐོག་ལས་མེན་པར་ དཀོན་མཆོག་གི་ཐུགས་རྗེ་ལས་སྦེ་ཨིན་ འདི་ཚུ་གི་སྐོར་ལས་ རྣལ་རིག་གསལ་ཏོག་ཏོ་ རང་ལུ་འཛོལ་བ་མེད་པར་ བློ་བདེ་ཏོག་ཏོ་གི་ཐོག་ལས་སླབ་ཚུགས།

¹³ ང་གིས་ཁྱེད་ལུ་བྲིས་མིའི་ཡི་གུ་ནང་ ཁྱེད་ཀྱིས་ལྷག་མ་ཚུགས་མི་དང་ ཧ་མ་གོ་མི་ ག་ནི་ཡང་མ་བྲིས་ ད་ལྟོ་ ཡི་གུ་དེ་ག་ར་ལེགས་ཤོམ་སྦེ་ཧ་མ་གོ་སྟེ་འབད་རུང་ མཐའན་མཇུག་ལུ་ ཁྱེད་ཀྱིས་ག་ར་ཧ་གོ་འོང་ཟེར་བའི་རེ་བ་ཡོད།

¹⁴ ད་ལྟོ་ཁྱེད་ཀྱིས་ང་བཅས་ལུ་ ལེགས་ཤོམ་སྦེ་ཧ་མ་གོ་རུང་ ཤུལ་ལས་ཁྱེད་ཀྱིས་ཧ་གོ་འོང་ དེ་ལས་གཙོ་བོ་ཡེ་ཤུ་ལོག་སྟེ་བྱོན་པའི་ཉིནམ་ལུ་ ཁྱེད་ང་བཅས་ལུ་བལྟ་སྟེ་ངལ་རངས་ནི་བཟུམ་སྦེ་ ང་བཅས་ཡང་ཁྱེད་ལུ་བལྟ་སྟེ་ ངལ་རངས་ནི་ཨིན།

¹⁵ ང་བཅས་ཀྱི་སྦུག་ལུ་མཐུན་ལམ་ལེགས་ཤོམ་ཡོདཔ་ལས་བརྟེན་ཏེ་ ཁྱེད་ཆ་ཁྱབ་བྱིན་རླབས་ལོག་བཏབ་སྦེ་ཐོབ་གེ་ཟེར་མནོ་སྟེ་ ང་གིས་ འགོ་དང་པ་རང་ཁྱེད་སྡོད་སར་ཚར་གཉིས་འོང་ནིའི་འཆར་གཞི་བརྩམས་ཡི།

¹⁶ འདི་ ག་དེ་སྦེ་ཨིན་ན་ཟེར་བ་ཅིན་ ང་ མ་ཀེ་དོ་ནི་ཡ་ལུ་འགྱོཝ་ད་ ཁྱེད་དང་འཕྱད་ ད་རུང་ལོག་སྟེ་འོངམ་ད་ཡང་ ཁྱེད་སྡོད་སར་ཐོན་ནི་སྦེ་ཨིན་ དེ་ལས་ཁྱེད་ཀྱིས་ང་ལུ་ ལུང་ཕྱོགས་ ཡུ་དེ་ཡ་གི་ལམ་འགྲུལ་གྱི་དོན་ལུ་ ཁག་ཆེཝ་འདི་ཚུ་བྱིན་གཏང་འོང་ཟེར་མནོ་བསམ་བཏངམ་ཨིན།

¹⁷ ཁྱེད་ཆ་ཁྱབ་ཀྱིས་ དེ་སྦེ་ དྲིས་འོང་ག་མི་ཤེས་ ཁྱོད་ཀྱིས་འཆར་གཞི་ ག་ཅི་འབད་འགྱུར་ཏེ་གཏངམ་སྨོ་ཟེར་ དེ་འབདཝ་ད་ ང་གིས་ང་རང་གི་སེམས་ཁར་ སྣང་མེད་སྦེ་བརྩིས་ཏེ་ ངེ་གི་འཆར་གཞི་འགྱུར་ཏེ་མ་གཏང་ ང་གིས་ ད་རེས་བཏུབ་ཟེར་སླབ་ ནངས་པ་མི་བཏུབ་ཟེར་སླབ་མིའི་མི་ ང་མེན།

¹⁸ ང་བཅས་ཀྱིས་ཁྱེད་ལུ་ བློ་ག་ཅི་སླབ་རུང་ ཚར་གཅིག་བཏུབ་ཟེར་སླབ་ དེ་གི་ཤུལ་ལས་ མི་བཏུབ་ཟེར་སླབ་སྟེ་ བསྒྱུར་བཅོས་འབད་མི་མེན་ དེ་ཚུ་ག་ར་ དཀོན་མཆོག་ཁོ་རང་གིས་གཟིགས་ཏེ་ འཛོམ་དཔང་མཛད་གནང་འོང་།

¹⁹ ག་ཅི་སྨོ་ཟེར་བ་ཅིན་ སཱིལ་ཝ་ནུས་དང་ ཏི་མོ་ཐི་ དེ་ལས་ང་གིས་ དཀོན་མཆོག་གི་སྲས་ ཡེ་ཤུ་ཁིརཱིས་ཀྱི་སྐོར་ལས་ ཁྱེད་ཀྱི་སྦུག་ལུ་ཆོས་བཤད་ཅི་ ཡེ་ཤུ་ཁིརཱིས་ཀྱིས་ ཁོ་རང་གི་ཐུགས་བསམ་ བཏུབ་དང་མི་བཏུབ་ཟེར་ནམ་ཡང་བསྒྱུར་བཅོས་མི་མཛད་ ཁོ་གི་ཐོག་ལས་སྦེ་ དཀོན་མཆོག་གིས་བཏུབ་ཟེར་གསུངས་མི་དེ་ མངོན་སུམ་དུ་འབྱུང་འོང་།

²⁰ ག་ཅི་སྨོ་ཟེར་བ་ཅིན་ དཀོན་མཆོག་གིས་ ཡེ་ཤུ་ཁིརཱིས་ཀྱི་ཐོག་ལས་ ཁས་བླངས་ག་དེ་ཅིག་བཞེས་ཡི་ག་ འདི་ཚུ་ག་ར་བཏུབ་ཟེར་དོན་དག་གྲུབ་གནངམ་ཨིན་མས་ དེ་སྦེ་འབད་ནི་དེ་གིས་ ང་བཅས་ཀྱིས་ ཁོ་གི་ཐོག་ལས་ཡང་ དཀོན་མཆོག་ལུ་བསྟོད་པ་ཕུལ་ནི་སྦེ་ ཨ་མཱེན་ཟེར་ཞུཝ་ཨིན།

²¹ ད་དཀོན་མཆོག་གིས་ ཁྱེད་དང་ང་བཅས་ལུ་ ཁིརཱིས་ནང་དད་པ་སྒྲིང་སྒྲིང་སྦེ་ མཛད་གནངམ་ཨིནམ་མ་ཚད་ ཁོ་གིས་ང་བཅས་ལུ་ བཙག་འཐུ་མཛད་གནང་སྟེ་ཡོད།

²² དེ་ལས་ང་བཅས་ ཁོ་གི་ཨིན་ཟེར་བཏོན་ནིའི་དོན་ལུ་ རྟགས་དང་ཐིའུ་འདི་ ཁོ་གི་ཐུགས་ཉིད་ ང་བཅས་ཀྱི་སེམས་ཀྱི་ནང་ན་བཙུགས་གནང་སྟེ་ ཐུགས་ཉིད་དེ་ ང་བཅས་ཀྱི་དོན་ལུ་ ཁས་བླངས་རེ་རེ་གི་རྒྱབ་མི་སྦེ་ཡང་གནང་ནུག

²³ ད་ང་གིས་དཀོན་མཆོག་གི་སྐུ་མདུན་ཕྲང་སླབ་ཨིན་ ང་ ཁྲོམ་ ཀོ་རཱིན་ཐི་ལུ་ལོག་མ་འོང་མིའི་དོན་དག་དེ་ ཁྱེད་ལུ་ཚོགས་བརྡ་བཏང་སྟེ་ ག་ཅི་འབད་སེམས་ཕམ་བཅུག་ནི་ཟེར་མནོ་སྟེ་ཨིན།

²⁴ མ་གཞི་ ང་བཅས་ཀྱིས་ཁྱེད་ལུ་ ཁྱེད་རའི་དད་པ་ ག་དེ་སྦེ་ལག་ལེན་འཐབ་དགོཔ་ཨིན་ན་ཟེར་སླབ་ད་ ཁྱེད་ལུ་དབང་ནི་སྦེ་མེན་ དེ་འབདཝ་ད་ ང་བཅས་ཁྱེད་དང་གཅིག་ཁར་ ལཱ་འབད་དེ་ ཁྱེད་ཀྱི་སེམས་ཁར་ དགའ་སྤྲོ་བྱུང་བཅུག་ནི་སྦེ་ཨིན་ ག་ཅི་སྨོ་ཟེར་བ་ཅིན་ ཁྱེད་ཀྱི་དད་པ་འདི་ ད་ལྟོ་ཡང་སྒྲིང་སྒྲིང་སྦེ་འདུག།