Barukɩ 5 - A SƐB-SÕW

¹ Zerizalɛm i, yaa a fʋ wʋ̀ʋr nɩ a fʋ zu-bio kparʋ bɛr, ɛ́ su a Naaŋmɩn yúor-vɩɛlʋ-danʋ kpar-vla kʋralɛ.

² Su a faafʋ na yi a Naaŋmɩn zie a, mɛ̃ kpar-kpɛ̃ɛ a, ɛ́ vɔblɩ a Na-be-kʋralɛ yúor-vɩɛlʋ-danʋ mɛ̃ nãà-kpawʋɔ a, a fʋ zũú.

³ Bʋ̃ʋ n'ʋ vɛ̃, Naaŋmɩn na wul'ɩ a fʋ vɩɛlʋ a tẽw za.

⁴ Yúor ŋa n'ʋ ʋ na por fʋ kʋralɛ: «Mɩnʋ ƴã-ɓaarʋ nɩ Pùor-bɛ-lɛbrʋ yúor-vɩɛlʋ-danʋ»

⁵ Ìr, Zerizalɛm i! Àr a zie na kɛrɩ a zu, ɛ́ jɩ́r a saa-pɛrɩ́. Nyɛ̃ a fʋ bibiir, a Naaŋmɩn na ɩ sõw a ƴɛ̀rʋ na bʋɔlɩ ɓã taa, bɛ yi a saa-pɛrɩ́ tɩ tɔ a mʋ̃tɔ̃w-kpɛb-lowr a. Bɛ cɩlɛ na, a Naaŋmɩn na lɛb bãwnɩ bɛ a ƴãw.

⁶ Bɛ tɩ yi n nɩ gbɛ́ɛ a fʋ dɩ̃dɛɛ ƴãw, a bɛ dɔ̃ dem darɛ bɛ. Ɛcɛ Naaŋmɩn tɛr bɛ na lɛb waar'ɩ a fʋ zie, bɛ tuo bɛ na nɩ dɛpaalʋ mɛ̃ na-mɩnɛ na zɩ̃ nãà-dà-kɔw zu a.

⁷ Bʋ̃ʋ n'ʋ vɛ̃, a Naaŋmɩn yel'a kɛ́ bɛ ɩ a tã-kɛrɩ nɩ a tãli-kore a siw. Ʋ ƴãw na bɛ paalɩ a fʋɔlɩ, k'aa tẽsɔw man taa, a Ɩsɩrayɛl nɩbɛ tʋ̃ɔ́ bɛr yã ɛ́ cere, ɛ́ a Naaŋmɩn yúor-vɩɛlʋ-danʋ bɩɛlɛ bɛ.

⁸ A Naaŋmɩn na yel a zũú n'a a tuwr nɩ a tɩɩr a puuru na nyùur a, na kʋ̀ ɓaarʋ a Ɩsɩrayɛl nɩbɛ.

⁹ Bʋ̃ʋ n'ʋ vɛ̃, a Naaŋmɩn na tɛr bɛ na lɛb wa n nɩ nʋ̃ɔ̀. Ʋ na caalɩ bɛ na nɩ a ʋ yúor-vɩɛlʋ-danʋ, ʋ na bɩɛlɩ bɛ na nɩ a ʋ su-ɓaarʋ nɩ a ʋ mɩnʋ.