Barukɩ 4 - A SƐB-SÕW

¹ A Yã-bãwfʋ a, a Naaŋmɩn nɛ-ƴãwnɩ sɛbɛ n'ʋ, a Wulu na be kʋralɛ a n'ʋ. Bɛlɩ dem za na tuur ʋ a, bɛ na vʋʋrɛ na, bɛlɩ dem za na zawr'ʋ bɛr a, bɛ na kpi na.

² Nyɩ lɩɛbɩ nyɔw ʋ, Zakɔb bʋʋrɛ ɛ! Nyɩ lo a sɔ́r cere a cãà zie, a ʋ cãà pʋɔ.

³ A nyɩ yúor na yi a, nyɩ ta bɛr ʋ kʋ̀ nɩ-yoru ɛ, a alɩ bome nɛ ƴãw nyɩɩm yõ na tɛr sɔ́r a, nyɩ ta bɛr a kʋ̀ nɩ-bʋʋr-yoru ɛ.

⁴ Zu-nʋ̃ɔ̀ dem'ɩ tɩ, Ɩsɩrayɛl nɩbɛ ɛ! Bʋ̃ʋ n'ʋ vɛ̃, tɩ bãw nɩ a ʋlɩ bom nɛ na mɩ́ pɛlɩ a Naaŋmɩn pʋɔ a.

A NAAŊMƖN NƖ-BƲƲRƐ MƆWLƲ 4:5—5:9 A fɛr'a k'aa nɩbɛ bɛ na diw a bɛ tẽw pʋɔ cen nɩ a, ƴãw fãw

⁵ Ɩ̃ nɩbɛ ɛ, nyɩ ƴãw fãw, nyɩɩm na ɩ bɛ cãà bãwnɩ a Ɩsɩrayɛl a!

⁶ Bɛ kʋ̀ɔrɩ nyɩ na kʋ̀ a nɩ-bʋʋr-yoru, ɛcɛ a bɛ ɩ a nyɩ kʋ-pàw-pɛr ƴãw ɛ. Nyɩ na ɩ a Naaŋmɩn suur ìr a n'a so ʋ bɛr nyɩ kʋ̀ a nyɩ dɔ̃ dem.

⁷ Nyɩ ɩ na a nyɩ Íre nyɛ̃ suur, nyɩ na bɛ maalɩ bagɛ kʋ̀ ʋ, ɛ́ maalɩ kʋ̀ kɔ̃tɔmɛ a.

⁸ Nyɩ yiir'ɩ a Naaŋmɩn na be kʋralɛ a bɛr, a ʋl na guoli nyɩ a. Nyɩ ɩ na a nyɩ mã-guole Zerizalɛm tɛr pʋ-sãwna.

⁹ Ʋ nyɛ̃ nɩ a Naaŋmɩn suur na ìr a nyɩ ƴãw a, ɛ́ yel: «Nyɩ bɛrɛ wone, tẽ-bɛrɛ na kpɔwlɩ a Sɩyɔ̃ a, Naaŋmɩn ƴãw mɛ̃ nɩ kpɩɛrʋ-kpɛ̃ɛ.

¹⁰ Ɩ̃ nyɛ̃ nɩ a lɛ a Naaŋmɩn, a Na-be-kʋralɛ, na fɛr a ɩ̃ bidɛbr nɩ a ɩ̃ pɔwyaar bɛ cen a tẽ-yũo a.

¹¹ Ɩ̃ tɩ guoli bɛ na nʋ̃ɔ̀ kpɛ m, ɛ́ pʋ-sãwna nɩ kpɩɛrʋ n'a ɩ̃ tɩ tɛr nyɛ̃ nɩ bɛ bɛ cen.

¹² Nʋ̃ɔ̀ ta ɩrɛ nɩr za ʋ na nyɛ̃ m ɩ̃ ɩ pɔw-kʋɔr, ɛ́ nɩ-yaga zawrɩ mɛ̃ bɛr a ɩ. Ɩ̃ ɩ n ɩ̃ yõ, a ɩ̃ bibiir yel-bebe zũú, bɛ na zawrɩ a Naaŋmɩn wulu bɛr a ƴãw.

¹³ Bɛ bɛ sàw a ʋ nɛ-ƴãwnɩ ɛ, a bɛ ɩb bɛ tu a lɛ ʋ na tɩ yere kʋ̀rɛ bɛ a ɩ, bɛ bɛ tu a mɩnʋ sɔ́r ʋ na tɩ wule bɛ a ɩ.

¹⁴ Nyɩ wa, nyɩɩm Sɩyɔ̃ tẽ-bɛr-kpɔwlɩ i! Nyɩ cãà bãwnɩ a k'aa Naaŋmɩn, a Na-be-kʋralɛ, fɛr'ɩ a ɩ̃ bidɛbr nɩ a ɩ̃ pɔwyaar bɛ cen tẽ-yũo.

¹⁵ Ʋ ɩ na nɩ-bʋʋrɛ na yi zi-zãána a, wa a bɛ ƴãw, nɩ-bʋʋrɛ na ɩrɛ pʋr-ɩb, ɛ́ ƴɛ̀rɛ ƴɛ̀r-sãan a, nɩbɛ na bɛ ƴãwnɛ a dɛb-nyamɛ, ɛ́ bɛ zɔrɛ a bibiir nɩbaalʋ a.

¹⁶ Bɛ tɛr'ɩ a pɔw-kʋɔr bibiir ʋ na nɔnɛ yaga za a, cen nɩ, ɛ́ bɛr ʋ ʋ ɩ ʋ yõ, bɛ cãà tɛr a ʋ pɔwyaar ɛ.»

A Zerizalɛm lɛb'a kʋ̀rɛ fãw a ʋ bibiir

¹⁷ Ɩ̃ bibiir i, ŋmɩŋmɩn n'a ɩ̃ na tʋ̃ɔ́ sõw nyɩ?

¹⁸ A sob nɛ na ɩ a kpɩɛrʋ á ŋá páw nyɩ a, ʋlɛ n'ʋ na faa nyɩ a nyɩ dɔ̃ dem nuru pʋɔ.

¹⁹ Nyɩ cere, ɩ̃ bibiir i, nyɩ cere! Mãa a, ɩ̃ be n ka, bɛ bɛr mɛ̃ ɩ̃ ɩ ɩ̃ yõ.

²⁰ Ɩ̃ yaa nɩ a ɩ̃ nʋ̃ɔ̀ bibie kparʋ bɛr, ɛ́ su a ɩ̃ yãayãa-zɛlʋ kparʋ. Ɩ̃ na cɩɩrɛ nɩ a Naaŋmɩn zie, a Na-be-kʋralɛ-a zie, a ɩ̃ bibi-vɩɛrɩ za.

²¹ Nyɩ ƴãw fãw, ɩ̃ bibiir i! Nyɩ cɩɩrɛ a Naaŋmɩn zie, ʋʋ na faa nyɩ nɩ a dɔwrʋ bɛ na dɔwrɛ nyɩ a pʋɔ, nɩ a nyɩ dɔ̃ dem nuru pʋɔ.

²² Mãa a, a Naaŋmɩn, a Na-be-kʋralɛ-a n'ʋ ɩ̃ tɩɛrɛ k'ʋʋ na faa nyɩ na. Ɛ́ a ʋl, a Naaŋmɩn na ɩ sõw a, ƴãw mɛ̃ nɩ nʋ̃ɔ̀ ŋa: a Na-be-kʋralɛ, a nyɩ faarɛ, kʋ̃ yaa kɛ́ wul nyɩ a ʋ su-ɓaarʋ ɛ.

²³ Kpɩɛrʋ nɩ pʋ-sãwna n'a ɩ̃ tɩ tɛr bɛr'ɩ nyɩ nyɩ cen. Ɛcɛ Naaŋmɩn na lɛb'a bɛr nyɩ kʋ̀ m kʋralɛ, cuw nɩ nʋ̃ɔ̀ cɛlsɩ ŋmɛb pʋɔ.

²⁴ Dɩ̃a a, a Sɩyɔ̃ tẽ-bɛr-kpɔwlɩ nyɛ̃ na nyɩ na be a diw-cenu zie a. Ɛcɛ a kʋ̃ yaa kɛ́ nyɛ̃ a faafʋ na na yi a nyɩ Naaŋmɩn zie a ɩ. A faafʋ na ta n nɩ a Na-be-kʋralɛ-a yúor-vɩɛlʋ-danʋ na nyɩwrɛ, ɛ́ vɩɛl vɩɛl a.

²⁵ Ɩ̃ bibiir i, nyɩ dɩ kanyir ɛ́ sàw a Naaŋmɩn suur na ìr a nyɩ ƴãw a. A dɔ̃ sob dɔwrɛ nyɩ na, ɛcɛ nyɩ kʋ̃ yaa kɛ́ nyɛ̃ a ʋ loba ɩ, ɛ́ nyɩ na ír'ɩ gbɛ́r dĩ nɩ ʋ a kpalimí.

²⁶ A ɩ̃ bibiir na bɛ tɛr fãw a lo n sɛ́ɛ na bɛ vɩɛl a cen. Bɛ ír bɛ na mɛ̃ dʋn dɔ̃ dem na zu a.

²⁷ Nyɩ ƴãw fãw, ɩ̃ bibiir i, nyɩ cɩɩrɛ a Naaŋmɩn zie! A sob nɛ na wa n nyɩ a ka a kʋ̃ yiiri nyɩ bɛr ɛ.

²⁸ Nyɩ nyɛ̃ na a ɩ vla nyɩ taw zãá nɩ a Naaŋmɩn. Ƴɛrɛŋa a, nyɩ lɛb wa a ʋ zie, ɛ́ ƴãw fãw gb'aa pie a ʋ bɔb ƴãw.

²⁹ A sob nɛ na ƴãw nyɩ a kpɩɛrʋ á ŋá a, ʋlɛ n'ʋ na faa nyɩ. À à ŋá n'a ʋ na kʋ̀ nyɩ nʋ̃ɔ̀ na kʋ̃ bãw baarʋ a.

Ƴãw fãw, Zerizalɛm i

³⁰ Ƴãw fãw, Zerizalɛm i! A Naaŋmɩn na bʋɔlɩ a fʋ yúor a, na mɔwlɩ fʋ na.

³¹ Baw-bio dem'ɩ a bɛlɩ dem na dɔwrɩ fʋ, ɛ́ a fʋ loba ɩ bɛ nʋ̃ɔ̀ a!

³² Baw-bio páw nɩ a tẽ-bɛrɛ al na tɩ tɛr a fʋ bibiir bɛ ɩ gbãgbaar a! Baa zuo a za, baw-bio páw nɩ a tẽ-kpɛ̃ɛ ʋl na nyɔw bɛ a!

³³ Mɛ̃ a lɛ ʋ na tɩ cɩlɩ a fʋ loba ƴãw, ɛ́ nʋ̃ɔ̀ kpɛ ʋ a fʋ sãwfʋ ƴãw a, lɛ n'a pʋ-sãwna na tɛr ʋ, a ʋl mɩŋa loba ƴãw.

³⁴ Ɩ̃ na ɩ na ʋ bɛ cãà tɛr a ʋ nɩ-yaga yaga ɩ, bɛl na ɩ a ʋ nʋ̃ɔ̀ a, ɛ́ a ʋ pɔ̀lʋ na lɩɛb'ɩ ko-tuolu.

³⁵ A Naaŋmɩn, a Na-be-kʋralɛ, na ɩ na vũu dɩ ʋ bɛr ʋ gã bibi-yaga, ɛ́ kɔ̃tɔmɛ n'a na kpɩɛr a ʋ pʋɔ, a cãà tɩ cɛlɩ zuo lɛ.

³⁶ Zerizalɛm i, jɩ́r a saa-pɛrɩ́ ɛ́ nyɛ̃ a nʋ̃ɔ̀ a Naaŋmɩn na waar'ɩ a fʋ kʋ̀ b a.

³⁷ Jɩ́r nyɛ̃, bɛ waar'a, a bidɛbr fʋ na tɩ nyɛ̃ bɛ cere a. Bɛ yi n ziir za waar, a saa-pɛrɩ́ tɩ tɔ a mʋ̃tɔ̃w-kpɛb-lowr, ɛ́ a ɩ a Naaŋmɩn na ɩ sõw a ƴɛ̀rʋ n'ʋ bʋɔlɩ bɛ ɓã taa. Nʋ̃ɔ̀ ɩrɛ bɛ nɩ yaga, a Naaŋmɩn yúor-vɩɛlʋ-danʋ zũú.