Barukɩ 3 - A SƐB-SÕW

¹ «Sore kpɛnʋ-za-sob, Ɩsɩrayɛl Naaŋmɩn i, tɩ kone na cɔwr fʋ nɩ socie kpɩɛrʋ na tɛr a, nɩ tɩɛrʋ na bàl a za a.

² Sore e, bɛr wõ tɩ, zɔ tɩ nɩbaalʋ, tɩ na maalɩ yel-bebe sãw fʋ a ƴãw.

³ Fʋ̃ʋ a, fʋ dɩrɛ nɩ naalʋ kʋralɛ, ɛ́ tɩɩm wɛ!

⁴ Sore kpɛnʋ-za-sob, Ɩsɩrayɛl Naaŋmɩn i, bɛr wõ a tɩɩm nɩ-kũuni bɛ ŋa puoru. Sore tɩ Naaŋmɩn i, tɩ ɩ n a bɛlɩ dem na maalɩ a yel-bebe sãw fʋ a bibiir, a bɛlɩ dem na bɛ bɛr wõ a fʋ ƴɛ̀rʋ a. Lɛ so a kpɩɛrʋ nyɔw tɩ.

⁵ Ta tɩɛrɛ a tɩ sãàkʋm-kore sãwnɩ ɛ, nɩ̃ɛ tɩɛrɛ a fʋ kpɛnʋ nɩ a fʋ yúor, a vuo ŋa pʋɔ.

⁶ Yel-mɩŋa za, fʋ̃ʋ n'ɩ a Sore tɩ Naaŋmɩn, ɛ́ tɩ na danɛ fʋ na, Sore e!

⁷ Fʋ ƴãw tɩ nɩ a fʋ zɔba tɩɛrʋ, kɛ́ tɩ tʋ̃ɔ́ mɩ́ bʋɔlɩ fʋ fʋ wa sõw tɩ. Tɩ na danɛ fʋ nɩ a tɩ diw-cenu zie. Bʋ̃ʋ n'ʋ vɛ̃, a faa al za a tɩ sãàkʋm-kore na tɩ maalɩ sãw fʋ a, tɩ ɩ na a zãá nɩ a tɩ socie.

⁸ Tɩmɛ n'ɩ bɛ ŋan dɩ̃a zãá nɩ a tɩ tẽw, be a be fʋ na diw tɩ yaarɩ a. A be a, bɛ tɩ tʋ tɩ nɩ zʋmɛ, ɛ́ ŋmɛ ƴãw tɩ, ɛ́ dɔwrɩ tɩ yáa a tɩ sãàkʋm-kore sãwnɩ za san, bɛl na tɩ bɛr a fʋ̃ʋ Sore tɩ Naaŋmɩn a.»

A YÃ-BÃWFƲ 3:9—4:4 A Yã-bãwfʋ bɛ na yiiri bɛr a

⁹ Ɩsɩrayɛl nɩbɛ ɛ, nyɩ bɛrɛ wone a nɛ-ƴãwnɩ na tɩrɛ a nyɔ-vʋʋrʋ a. Nyɩ ƴãw tobr, tʋ̃ɔ́ bãw bom.

¹⁰ Ɩsɩrayɛl nɩbɛ ɛ, ŋmɩŋmɩn n'a a ɩ? Bʋ̃ʋ n'ʋ so nyɩ kpɩɛr a nyɩ dɔ̃ dem tẽw pʋɔ? Bʋ̃ʋ n'ʋ so nyɩ kòre tẽ-sãan pʋɔ?

¹¹ Bʋ̃ʋ n'ʋ so nyɩ tɔ kũuni tɛr dɛwr, ɛ́ bɛ sɔ́r a nyɩɩm tɛɛ za ƴãw a bɛlɩ dem na be a kpɩmɛ tẽw a pʋɔ?

¹² Nyɩ na zawrɩ a yã-bãwfʋ bul-nʋɔr bɛr a n'a so.

¹³ Nyɩmɛ tɩ tu a Naaŋmɩn sɔ́r a, nyɩ nãá be n a ƴã-ɓaarʋ pʋɔ kʋralɛ.

¹⁴ Nyɩ bãw a be a bãwfʋ, a fãw, a yã na be a, kɛ́ nyɩ mɩ̀ tʋ̃ɔ́ bãw a be a nyɔ-vʋʋr-wogo na be a, a be a mimie cãà nɩ a ƴã-ɓaarʋ na be a.

A nɩsaalbɛ kʋ̃ tʋ̃ɔ́ bãw a yã-bãwfʋ ɛ

¹⁵ Ãa n'ʋ nyɛ̃ a Yã-bãwfʋ kpɛb zie? Ãa n'ʋ kpɛ a ʋ na-bome dĩó?

¹⁶ A nɩ-bʋʋrɛ nɩ-bɛrɛ nɔ̃w nɛbɛ bɩɩ? Bɩɩ a bɛlɩ dem na pɔwlɛ a wɛ-dʋn a nɛbɛ?

¹⁷ Bɩɩ a bɛlɩ dem na mɩ́ pɔwlɩ a mʋ̃ɔ pʋɔ lili a nɛbɛ? Bɩɩ a nɩbɛ a tɛra na bɛ tɛr tɛwfʋ zie a, na mɩ́ bɔ a salm-pla nɩ a salm-zɩɛ gbõ taa a, a al ƴãw a nɩsaalbɛ na mɩ́ ƴãw a bɛ tɩɛrʋ a nɛbɛ bɩɩ?

¹⁸ Bɩɩ nɩbɛ na mɩ́ ƴãw fãw maal tõ n a salm-pla a nɛbɛ ɛ? Ɛcɛ a bɛ tome bãwfʋ kãw za bɛ mɩ́ cãà be a pùorí ɛ.

¹⁹ Bɛ bɔr'a, bɛ siw nɩ a kpɩmɛ tẽw, ɛ́ nɩ-yoru lɩɛrɩ bɛ.

²⁰ Nɩbɛ bɩɛrɩ na nyɛ̃ a cãà ɛ́ kpɛ a tẽw zu, ɛcɛ bɛ bɛ tɩ bãw a sɔ́r na cere a Yã-bãwfʋ zie a ɩ,

²¹ bɛ bɛ tɩ cɛlɛ a ʋ sɛ́ɛ zie ɩ, bɛ bɛ tɩ ŋmɛlɩ kaa ʋ ɛ. A bɛ bibiir tɛɛ za bɛ tu a sɔ́r a bɛ sãà mɩnɛ na tɩ tu a ɩ.

²² Nɩr bɛ wõ a Yã-bãwfʋ yele a Kanãa tẽw pʋɔ ɩ, bɛ bɛ nyɛ̃ ʋ a Teman tẽw ɛ.

²³ A Agaar bʋʋrɛ tɛɛ za na bɔbr ʋ a tẽw zu a, a Madian nɩ a Teman ten yɛ-yɛrbɛ, a suol-suolbɛ nɩ a bãwfʋ bɔbr-bɔbrbɛ, bɛ tɩ bãw a sɔ́r na cere a Yã-bãwfʋ zie a ɩ, bɛ bɛ tɩ cɛlɩ a sɛ́ɛ na wɩɛr a ʋ zie a zie ɩ.

²⁴ Ɩsɩrayɛl nɩbɛ ɛ, nyɩ nyɛ̃ a tẽ-daa, a Naaŋmɩn yir ŋa, na ɩ kpɛ̃ɛ sɛw a! Nyɩ nyɛ̃ a zie ʋ na so a na yɛlmɛ a!

²⁵ Ʋ ɩ n kpɛ̃ɛ kpɛ̃ɛ ɛ́ bɛ tɛr tɛwfʋ zie ɩ, ʋ do n saa ɛ́ bɛ tɛr manʋ ɛ.

²⁶ Be n'a a nɩ-jarmam jarmam dɔw, a koro za nɩ-yée bɛ ŋa, nɩbɛ na kɛrɩ kɛrɩ, ɛ́ bãw a zɛbr yele a.

²⁷ Ɛcɛ bɛlɛ bɛ nɛbɛ a Naaŋmɩn kaa ír, k'ʋʋ wul bɛ a Yã-bãwfʋ sɔ́r ɛ.

²⁸ Bɛ kpi na, bɛ na bɛ tɩ bãw yã a ƴãw, bɛ kpi n a bɛ dãbolu zũú.

²⁹ Ãa n'ʋ do a salom zu k'ʋʋ tɩ de a Yã-bãwfʋ, ɛ́ tɛr ʋ a saa-zu be siw wa n?

³⁰ Ãa n'ʋ gãw a kʋ̃ɔ-kpɛ̃ɛ k'ʋʋ tɩ nyɛ̃ ʋ, ɛ́ tɛw nɩ ʋ salm-zɩɛ mɩŋa mɩŋa lɛb wa n?

³¹ Nɩr za bɛ bãw a Yã-bãwfʋ sɔ́r ɛ, nɩr za bɛ bãw a lɛ ʋ na na ɩ páw ʋ a ɩ.

Naaŋmɩn yõ n'ʋ bãw a Yã-bãwfʋ ɛ́ kʋ̀ ʋ a Ɩsɩrayɛl

³² Ɛcɛ a Naaŋmɩn na bãw bom za a bãw nɩ a Yã-bãwfʋ vla, a ʋ yã zũú n'a ʋ nyɛ̃ ʋ. Ʋ cɔbr'ɩ a tẽw k'ʋʋ be kʋralɛ, ɛ́ paal'ʋ nɩ dʋ̃-gbɛ́ɛ anaɩ.

³³ Ʋ mɩ́ tõ n a cãà, ʋ cen. Ʋ lɛb bʋɔl'ʋ, ʋ màwr sàw nɩ a ʋ nʋɔr.

³⁴ A ŋmar-bie nyɩwrɛ nɩ a beba zie nɩ nʋ̃ɔ̀.

³⁵ A Naaŋmɩn mɩ́ bʋɔlɩ a na, a sàw: «Tɩ be n ka!» A nyɩwrɛ nɩ nɩ nʋ̃ɔ̀ a Sob nɛ na ír a a ƴãw.

³⁶ A Íre ŋa n'ɩ a tɩ Naaŋmɩn, ʋ bɛ tɛr ʋ tɔ ɩ.

³⁷ Ʋ nyɛ̃ nɩ a sɔ́r za na cere a Yã-bãwfʋ zie a, ɛ́ wul ʋ a ʋ tõ-tõ-bie Zakɔb nɩ-bʋʋrɛ, a ʋ nɩ-nɔna Ɩsɩrayɛl nɩ-bʋʋrɛ.

³⁸ A pùorí n'a bɛ nyɛ̃ a Yã-bãwfʋ a tẽw zu, ʋ kpɛ a nɩsaalbɛ sɔgɔ.