Ebree gʊɔɔ 1 - Wosoci Gu̳aasi̳babaa Daa Nouveau Testament en Bissa

Woso meer ba kan wɔɔ kɩ a Nyɩ bɩ lɛ m

¹ Biisi bɩ, Woso meer ba kan wɔɔ yaabɔɔ wɔɔ kɩ a lɛsinnɩsorazannɔ lɛ m, gallɛm hɔka, zaa y'a hʊnhɔ m.

² Bɩ, kɛɛrɛ naa, jɛ dɔmɩm kʊ wɔɔ n ta ʊ naa ma bɩ, Woso meer ba kan wɔɔ kɩ a nyɩ bɩ lɛ m. A Nyɩ bɩ tɔ ma y'a ka an durnya bɩ da, a Nyɩ bɩ bɔ a ʊ sɔ k'an a so hɔ haay ʊ.

³ Nyɩ bɩ nɩ Woso mɩŋŋa lɛbɔʊrɛ hɩnkam, kʊ Woso lʊnlɔ bɩ, a mɩŋŋa maam, an n'a kam durnya bɩ nɩ gɔɔtarɛ a bɩncɛ ʊ, a lɛ meerbaa paŋŋa m. K'a gʊɔɔ mimbʊnyaarɔ gʊ ŋ ma zi ba an a nya bɩ, a a hʊr an aa nyɩnta Woso k'a nɩ cirbəə m bɩ bɩsɩ ra arzana ʊ.

⁴ Woso Nyɩ bɩ tɔ bɩ lɛ da malɛɛkarɔ wɔɔ tɔ m soyy…. Naa n'a hɩnkam wɔɔ m, ʊ a dɔ ʊ ʊ, a lɛ da malɛɛkarɔ wɔɔ m gʊta maam-maam.

Woso Nyɩ bɩ lɛ da malɛɛkarɔ m

⁵ Woso n meer ba kan malɛɛka kɩ cɩna, a ʊ: Ɩbɩɩ m mɔɔ Nyɩ, an a sa her ma, mɔɔ n'ɩbɩɩ Zɩ y. A n a hɩ malɛɛka ma sɔ cɩna, a ʊ: Mɔɔ yɩrɛ a Zɩ, an yɩ mɔɔ Nyɩ y.

⁶ Bɩ, Woso k'a bʊr k'a Nyɩ lɛɛkarɛzaa bɩ nyɔɔ durnya ʊ bɩ, a a hɩ, a ʊ: Bɩ kʊ Woso malɛɛkarɔ haay n kukurə zɛ a taa.

⁷ Hɔ kʊ Woso a hɩ malɛɛkarɔ mim nɔ ʊ bɩ ba n nɩ: Malɛɛkarɔ wɔɔ, ŋ ba a ʊ, ɩ ʊ hɩnhɛr nɩ ŋ mɩ, a zibəənyɩnɔ m, am sɛ nɛɛnnɔ m.

⁸ Bɩ meerbaa k'a a ba a Nyɩ bɩ mim nɔ ʊ bɩ ba n nɩ, a ʊ: Ɩbɩɩ m Woso, ɩ cirbəə nyarɛ ba ʊ y. Ɩ so ɩbɩɩ nawʊrɛ ɩ cirbəə kʊ b'ʊ tɩrgabaa nɔ ʊ.

⁹ Ɩbɩɩ hɔ k'an tɩrga ŋʊa, ɩ n'ɩ sɔm hɔ bʊnyaa m. Bɩ y'a ka, Woso, ɩ Woso bɩ n'ɩ bɔ ʊ, an heernyɔɔ nyɔɔ tɔ ɩ mim ʊ. A ɩbɩɩ ŋʊa an cem ɩ muno wɔɔ han, bɩ tɔ ma m an ɩ bɔ ʊ.

¹⁰ A a ya, an a hɩ sɔ, a ʊ: Zuuba, durnya sɩŋŋɩda ʊ bɩ, ɩbɩɩ ɩ tara burə da, bɩ, brama k'an ta ʊ naa, ɩbɩɩ wɔ zibəə m.

¹¹ Brɔɔ cenim, b'ɩbɩɩ gɔɔtam tee…. Brama kan tara bɩ kɩ zarm am huu hɔ bɩ m,

¹² ɩbɩɩ yɩ ŋ huŋŋum am huu hɔ bɩ m, denter m, ɩbɩɩ yɩ ŋ lʊrm am huuro m. Bɩ, ɩbɩɩ bɩr ɩ lʊrlɛ y, ɩbɩɩ cenle ba ʊ y.

¹³ Woso n a hɩ malɛɛka m cɩna, amba a a hɩ a Nyɩ bɩ m, a ʊ: Bʊr ɩ nyɩnta mɔɔ bɩsɩ ra, kʊ m a ka k'ɩ jɩnnɔ n bɩ nyɩnta ɩ taa y.

¹⁴ Malɛɛkarɔ wɔɔ, nyiro m, ŋn'ɩ Woso zi bam, Woso n ŋ nyɔɔ kʊ ŋ nɩ bɩ ziro ba ŋn'a da gʊɔɔ kʊ ŋ nɩ zɛm bɩ bʊmbɔrɛ hɔjirle yɩ rɔ wɔɔ han.