Yb 1 - Kalate Zambe Nnomo a Mfefe Mfefé Nkôñelan

Satan a ve'ele Yob

¹ Môt éziñ a nga too si ya Uts jôé na Yob. Môt ate a mbe nya *mvo'é a zôsôô; a mbe a ko Zambe woñ a sa'ale fe *abé.

² A nga biaé bobefame zamgbwa a bobebinga belaa.

³ Mbame biyeme wé ô nga bili mintômba toyini zamgbwa, bekamel toyini éla, benyak toyini, beyale bijakas mintete mitan, nalé fe abui bebo bisaé. Môt ate nye a nga dañ éwôlô ézezañe bôte bese ya jôp da tôô.

⁴ Bobefame bé be nga bili fulu ya ke bo ésulane bidi e *nda be môt ase y'été, môt ase éyoñe jé, be mbe be bañete'e bekale bab belale na ba be be be di a nyu.

⁵ Eyoñ melu ya ésulan bidi me lôteya, Yob a mbe a lo'one bobefame bé a tune be. Wôna ndibe tyé a nga kôlô si a ve metuna'a ma di'ibane ngumba asu môt ase y'été, amu Yob a mbe a simesa'ane na: Ndô'ôtô bobefame bam be maneya bo *abé a ndô'ôtô be maneya kobô Zambe ébiasé e minleme miab été.

⁶ Môs éziñ bone be Zambe be nga zu tebe asu Zambe, nde satane fe a nga suan e zañe jap.

⁷ Zambe a nga sili Satane na: Wo so vé? Satane nye Zambe na: A so ma ndeñendeñe *si nyô, a wulu li a li été.

⁸ Zambe a nga sili Satane na: Ye ô yeneya fo'o mbo ésaé wom Yob? E *si nyô môte mfe a nji bo ane nye; nyô a ne nya *mvo'é a *zôsôô, a ko Zambe woñ, a sa'ale'e *abé.

⁹ Satan a nga yalane Zambe na: Ye Yob a ko Zambe woñe zezé'

¹⁰ Ye ô nji lôñe nye nka'alé, émien, *nda bôte jé, a biôm bise a bili? Ô maneya botan ésaé ya mo mé, a mbame biyeme wé wo fôé a mialane *si nyô.

¹¹ Ve tame same wo wôé a nnambe jôm ése a bili, ma bele na a ye kobô wo ébiasé womien ô too.

¹² Ane Zambe a nga jô Satan na: E bo'o nalé! Akume dé ese e ntoo e mo môé. Ve da, te same wo wôé a nambe émien. Nde Satan a nga kôlô e vôme Zambe a né.

¹³ Môs éziñ bobefam a bobebinga be Yob be ja'ak a nyu woon e *nda be monyañe *mvendé wop,

¹⁴ nde *nlôman wo kui be Yob a jô nye na: Benyak ba be be sena'ane si, beyale bijakase ki be ja'ak e fefele jap;

¹⁵ nde Besabééñ ba te kui be bita a nyoñe be a wôé bebo bisaé a nkpwaté mekôn, ma étam ma te tube na me zu kate wo foé.

¹⁶ A ngenan a kobô'ô nde *nlôman ôfe wo zu jô na: Nduan Zambe ja te so yôp a di'i mintômba, bikela a bebo bisaé, a mane mine be, ma étam ma te tube na me zu kate wo foé.

¹⁷ A ngenan a kobô'ô nde ôfe wo so a jô nye na: Bekaldééñ, minsamba milaa, ba te kubu bekamel yôp a nyoñe be a wôé bebo bisaé a nkpwaté mekôn. Ma étam ma te tube na me zu kate wo foé.

¹⁸ A ngenan a kobô'ô nde ôfe wo suan a jô nye na: Bobefame bôé a bobebinga bôé ba too be ja'ak a nyu woon e *nda be monyañe wob a ne mvendé;

¹⁹ ateme na beta évuñulu ve ke so mfa'a ya *nkôte si, ve jimbi meku'u menyine ya nda; nde *nda ja te ku bongô yôp, éyoñe ji be maneya wu. Ma étam ma te tube na me zu kate wo foé.

²⁰ Nde Yob a nga kôlô si, a nyabe mengômesane mé, a sôté nlô, ve ku a kute meboñe si a jô na:

²¹ Soé me nga so je abume nyia wom nje fe ma ye bulane je. Zambe nye a nga ve, Nye fe a vaaya; jôé Zambe nde é bo'o ébotan!

²² E mam mete mese Yob a nji bo *abé, nge bo akute ya bo'olô Zambe jam.