MINYÔN 1 - Kalate Zambe Nnomo a Mfefe Mfefé Nkôñelan

Yérusalém a ntoo v'ane nkus

¹ Za aka'a étame tisone nyô é ntoo di nyô é nga too bôte ne lut melu mvus! Nyô é nga wum e *meyoñ été é ntoo ane nkus. Nkpwe'e tison ô nga jôô bifuse mesi o ntoo éyoñe ji asu bisaé bi'alo.

² Ja yône ngum alu, milik me lene je memañ. Ba bese be nga nyenye'e je teke môte wua a volô je *nlem. Bemvôé bé bese be boya je njoñ, be ntoo besiñe bé.

³ Eyoñe Yuda a ke minkôm, ôsame a éto *ôlo bi lateya nye. Yuda a too bikule zañ, ve a kate bi awo'on. Bekpwe'ele bé be diliya nye ôfanefane vôm.

⁴ Mezene ma ke Siôn me ne ôlun été amu bezuu abôk be li'iya me ébooé. Mevôme mé ya bôte ba sulan me ntoo ne ngongongo, a betuni bé ba sôôé abuk. Bengo be binga bé ba wô'ô ôlun; jame te e n'ayô mfa'a wé.

⁵ Bôte be ne nye ngame yat be dañeya nye besiñe bé be too *mvo'é. Nti nye a tulu nye nlem amu abui melo dé. Ayôme bongô dé da ke minkôm be tele nsiñ ôsu.

⁶ Yérusalém a dimiliya étôto'o jé ése bivete bié bi ntoo ane minkok mi nji fe yene jôme ya di, a mmie mia ke ñwua ngal ôsu, ngule momo.

⁷ E biyoñe ya ôsame wé nyô a ényiñe ndeñendeñe jé ji, Yérusalém a simesane mam mese a nga bili me mbe mvaé melu mvus, éyoñe bôte bé be nga ku e mo besiñ, teke môt a volô be, bôt be ne nye ngame yat be nga yene nye a woé njañane wé.

⁸ Yérusalém a nga bo *abé dé abui abui ajô te a ntoo jôm é ne mvin; ba bese be mbe be semé'é nye ba biasé nye éyoñe ba yene soé jé; mfa'a wé a li'iya nye ve na a sôôé abuk a lume mvus.

⁹ Ezingi jé é be'e mebate ya mvine jé, a nji bo'o a yemek e jam da ye kui be nye; ajô te nkuane wé ô kuiya be nye atemetem, ve teke môt a volô nye *nlem. A Nti! Ô lôô ôsame wom! Amu nsiñe wom a dañeya!

¹⁰ Nsiñ a maneya sa jôm ése Yérusalém a nga bili é too ny'édima. A Yérusalém a maneya yene meyoñe bikuu me nyi'in e vôme wé a n'étyi, e ma ô nga ve atiñe na me bo te nyiin ésulane bôte jôé.

¹¹ Bôte bé bese ba tat: ba jeñe bidi; be maneya ve jôm be nga bili é too édima asu bidi, ane be ne beta ve binyiñe biabe ngu. Tame yen a Nti a fombô ane me ntoo nsilibane si.

¹² Avale jame di e ngenane te kui be mia mia lôte njoñ, fomba'an a yen nge mintaé mife mia funan émiam e mie Nti a veya ma e môse ya beta ayaa wé.

¹³ A too yôb été, a lômeya nduan é di'i ma bives, a dañe bie ngu; a yaaya avot e mebo mame si a sô'ôlô ma kayale; a boya ma me tabe étam a kone *môs ôse.

¹⁴ Nti a lôô bikobe biam me nga bo, bi boya *atiñ e wo wé été, bi beteya a kui me *tyiñ. Nti a boya ngule jame momo jôm, a kalaneya ma e mo besiñ mbe me se nguleya bo jam.

¹⁵ Nti a maneya titane biwôlô bezimbi bise me nga bili; a nga tôkane nkane bita ya wosane ma a mane wôé bisoé bi bôte biam. Nti a maneya miate éndune ngone ya Siôn an'ébuma ndi'i woon e vôm ba miate bibuma.

¹⁶ Mam mete mme ma bo na me yi, milik ma kui me mis amu nyô a ne volô ma nlem a beta wômôlô ényiñe jam a keya ma ôyap. Bone bam be ntoo éngôngo amu nsiñ a maneya dañ.

¹⁷ Siôn a same mo môte ya volô nye *nlem a ne momo; Nti a maneya ve besiñ ba bômane Yakob na be tebe nye ngame yat, Yérusalém a ntoo jôm é ne mvin ézezañe jap.

¹⁸ Nti a ne zôsôô amu me nga bo abendé dé melo. Vô'ôla'an, mia *meyoñ me bôte mese, yenane nju'u wom. Bengone bam a bendômane bam be maneya ke minkôm.

¹⁹ Me nga loone bôt be mbe be nyeke'e ma, ve be maneya du'u ma. Betuni bam a bemvendé bam be nga wu e tison été: Valé be jeñe jôme ya di mfa'a ya beta nyoñe ngu.

²⁰ A Nti, tame yen aval ôlun me tele été, *miñya mia bo'o m'abum été nleme fe ntya'an amu me nga bo fo'o wo melo. Mfa'a y'atan nkpwaté mekôn ô maneya jiane mvoñe jam, e be mamien été ki fo'o v'awu.

²¹ Be nga wôk ane ma tat ve teke môt a volô me nlem; besiñe bam bese be nga wô'ôtane nju'u wom, be nga vak amu wo ô nga bo me de; bo'o na e *môs ô nga telé ô zu, éyoñe te be fe ba ye tôban ane me bili.

²² Abé dab ese e za'ak asu dôé ô bo be ane ô nga bo ma, amu mbia mimboone miam mise. Amu mintate miam mi n'abui a nleme wom wo wô'ô mintaé.