MIKÉ 1 - Kalate Zambe Nnomo a Mfefe Mfefé Nkôñelan

Nti a bo'olô e bôte bé

¹ Nkobô Nti ô nga kui be Miké, môte ya Morését, melu Yôtam, e ma me Akaz a ma me Ezékias, bejô bôte ya Yuda be nga too, nkobô te ô too ajô bitison: Samari a Yérusalém.

² Mia *meyoñ mese vô'ôla'an! Ke'e alo a si, a jôm ése ô bili! Nti Emien a zu bo ngaa ya bo'olô wo, Nti, Nyô a so étaba'a jé é n'étyi!

³ Amu ô lôô Nti a so étaba'a jé, a sis, a wulu e mevôme ya si nyô me n'ôyabe yôp.

⁴ Minkô mia nyemé e mebo mé si, mimbi'ili mia kandeban ane éko é ne fefele nduan, ane mendim ma lôt avô ayo nkô.

⁵ Jame te ese da boban amu mbia mboone Yakob, amu mam *abé ya *nda Israél! Mbia mboone Yakob a ne jé' Ye sa Samari, nlô tison Israél' Bito bikôndô'ô yôbe ya Yuda bi ne jé' Ye sa Yérusalém, nlô tison Yuda'

⁶ Ajô te Nti a jô na: Ma ye kôñelane Samari a bo avise *mekok e n'afan asu ya bé afube ndi'i woon; ma ye sô'ôlô meko'o mé mbi'ili si, a ma ye bo mimbôka'a mié mi yené atan.

⁷ Bengunemelane bé bese ba ye bu'ubane bifus, a memvaka a nga nyoñ ma ye di'ibane nduan, bive'ela'a bezambe bié, ma ye bo bie bifus, amu a nga kuse biôm bite bise a tañ ja so ébamba jé, a bia ye fe volô asu ya ya'ane bebo ébamba befe.

Nkulu mejô Miké a yôn

⁸ Ajô te, ma Miké, ma zu yi a yôn, ma zu wulu minsoé mebo a nyôle nsoé, ma zu yôn ane benyôk, a yi ane beéngutu.

⁹ Amu be se nguleya saé aveñe Samari, e ne anen a kui e Yuda. Ntyaman ô keya kui e Yérusalém émien, e tison ényiñe ya bôte bam é tii.

¹⁰ Te katane foé éte e tisone Gat, môt éziñ a bo'o te kuli mili'i mis ne tya! E Bét-Léafra, ma bume mbulu'u été.

¹¹ E minga a too Safir a lôtôk a too soé, nalé fe njalan a ôson e minga a too Sanan, a nji bo ayo'o ya kui e tison atan. Minyôn mia so e tisone Bét-Essél, amu é nji ke fe bo mia asoé.

¹² E minga a too tisone Marôt a bili mvaé, ve *nlem ô kumeta'an, amu bidime Nti a lôm, bi kuiya e mimbé ya Yérusalém.

¹³ A mia bôt mi too Lakis, tiñeta'an bevagoñ a bikabela bienan! Amu mi nga vu mbia mimboon mi Israél, a dutu Yérusalém na a bene njôane wom.

¹⁴ Ajô te mia ye kandane bôte be too tisone Morését-Gat, wôna tisone Akzib ki ja ye bo te volô bejô bôte ya ayoñ Israél.

¹⁵ A mia bôt mi too Maréka, Nti a ye kalane mia e mo me mfefé môt mfa'a mewosan. Bivete ya Israél bi ne njalan a duma bia ye ke sobô mbas ako'o Adulam.

¹⁶ Téane bisile bienan miabebien, sôtéba'an mintui, a bôt be too Yérusalém! Nalé nlô wônan wo ye bi ayan ane nlô ndôé. Yônane bone benan mia dañe nye'e, amu ba ye kee be mekaban, ôyap a mia.